Antoy Labay ya Ibaga na Pagmaliw ya Masanto?
Say ebat na Biblia
Say pagmaliw ya masanto et ontutukoy ed kipapasen ya akabiig ed karutakan. Say Hebreon salita ya impatalos a “masanto” et nanlapud salitan say labay ton ibaga et “akabiig.” Kanian, say masanto et akabiig ed saray mabetbet ya uusaren, odino ipapasen ya sagrado, lalo la ta malinis tan puro itan.
Say Dios so sankasantosan. Ibabaga na Biblia ya: “Anggapo so masanto a singa si Jehova.”a (1 Samuel 2:2) Kanian karapatan na Dios so mangiter na estandarte no antoy masanto.
Say salitan “masanto” et onaplika ed anggan anto ya direktan mikonektaan ed Dios, lalo la iray imbiig ya para labat ed panagdayew. Singa bilang, bibitlaen na Biblia iray:
Masanton pasen: Oniay imbaga na Dios ed si Moises nen walad asingger ed mandarlang a kiew: “Say pasen ya akaalageyan mo et masanton dalin.”—Exodo 3:2-5.
Masanton okasyon: Saray Israelita nensaman et regular ya nandayew ed si Jehova diad saray relihyoson piesta a tatawagen ya “masanto iran pandaragup.”—Levitico 23:37.
Masanton kagawaan: Saray gamit ya uusaren ed panagdayew ed Dios diad templo ed Jerusalem nensaman, et tinawag ya “masanton kagawaan.” (1 Arari 8:4) Nepeg ya marespeto so pangusar ed saratan ya sagradon kagawaan, balet ag-iratan nepeg ya dayewen.b
Nayari kasin magmaliw ya masanto so too ya aliwan perpekto?
On. Ingganggan na Dios iray Kristiano: “Nepeg a magmaliw kayon masanto, lapud masanto ak.” (1 Pedro 1:16) Siempre, say perpekton estandarte na Dios ed inkasanto et agbalot napantayan na aliwan perpekton totoo. Balet, saramay uunoren day matunong iran ganggan na Dios et nibagan “masanto tan makapaliket ed Dios.” (Roma 12:1) Napatnagan ed salita tan gawa na sakey ya too ya pankikimeyan toy magmaliw a masanto. Singa bilang, uunoren toy bilin na Biblia ya “magmaliw kayon masanto tan paliisan yoy seksual ya imoralidad” tan “magmaliw kayon masanto diad amin a kagagawa yo.”—1 Tesalonica 4:3; 1 Pedro 1:15.
Nayari kasin naekal so inkasanto na sakey ed pakanengneng na Dios?
On. No agla tumboken na sakey iray estandarte na Dios, sikatoy agla ipasen na Dios ya masanto. Singa bilang, say libro na Biblia ya Hebreo et parad saray “masanton agagi,” balet papasakbayan ira na sayan libro ya ompan walad sikaray nawalaan na “mauges a puso ya andiay pananisia diad iyaarawi tod mabilay a Dios.”—Hebreo 3:1, 12.
Saray lingon pakatalos tungkol ed pagmaliw a masanto
Lingon pakatalos: Magmaliw kan masanto no agmo papaliketen so sarilim.
Katuaan: Ipapaamta na Biblia ya say “panamairap ed laman,” odino sobran siblet ed sarili, et “anggapoy kakanaan na saratan pian nadaeg iray pilalek na laman.” Kanian anggapoy kana na satan ed pakanengneng na Dios. (Colosas 2:23) Imbes, labay na Dios ya panliketan tayo iray maong a bengatla. “Balang sakey et nepeg a mangan tan oninum tan manliket ed amin a pansasagpot to. Saya et regalo na Dios.”—Eclesiastes 3:13.
Lingon pakatalos: Magmaliw kan mas masanto no agka mangasawa o miasawa.
Katuaan: Nayarin mandesisyon so sakey a Kristiano ya mansiansian anggapoy asawa, balet aliwan automatiko ya no agka mangasawa o miasawa et masanto ka la ed pakanengneng na Dios. Tua ya saramay mansiasiansian anggapoy asawa et makapanpokus irad panagdayew da. (1 Corinto 7:32-34) Balet, ipapanengneng na Biblia ya saramay walaay asawa et sarag da met so magmaliw ya masanto. Diad tua, say apostol nen Jesus ya si Pedro et walay asawa to.—Mateo 8:14; 1 Corinto 9:5.
a Jehova so ngaran na Dios. Dakdakel ya bersikulo ed Biblia so mangikokonekta ed sayan ngaran ed saray salita ya “masanto” tan “inkasanto.”
b Ipapanengneng na Biblia ya mauges so pandayew ed saray rebulto.—1 Corinto 10:14.