Inibaan na Saray Pulis si Joseph ya Manpulong

No sakey ka ed Saray Tasi nen Jehova, kasin naimadyin mo ya ibaan ka na pulis ya manpulong ed saray abung? Ontan so naeksperiensya nen Joseph ya taga ed Micronesia nen 2017. Kaiba to ed saman so taloran Tasi legan na espisyal a kampanya ya pulongan iray totoo ya manaayam ed arawrawin isla.

Asingger lay ugto nen sinmabi iran apat diad melag ya isla a panaayaman na manga 600 a totoo. Sikaray in-welcome na mayor na isla kasabi ra. Inistorya nen Joseph so tinmumbok ya agawa: “Imbaga na mayor ya ipatnubang kami na luluganan na pulis paonla ed saray kaabungan. Makakaliket kami, balet magalang min imbaga ya anggan andi la. Labay mi so onla ed saray kaabungan na totoo diad paraan ya singa datin gagawaen mi.”

Kanian inggapo na apatiran Tasi so manakar tan akitongtong ira ed saray totoo. “Mapatuloy ira tan interesado ira ed mensahe tayo,” so imbaga na saray Tasi. “Kanian, binmayag kami laingen ed saray kaabungan.”

Diad saman ya agew, amidua ya alabasan na luluganan na pulis si Joseph, tan tinmunda diad komatlon inlabas to. Intepet na saray pulis no sarag dan ipatnubang si Joseph ed saray kaabungan ya laen to. “Imbagak ya anggan andi la,” so kuan nen Joseph. “Pero mapilit ira tan imbaga dad siak ya, ‘Kulang lay oras mo, iyakar mi ka lad saray agmo ni nakar ya kaabungan.’ Agak la makaandi ta amayamay ni iray kaukolan kon laen. Kasabi mi ed kada abung, ibabaga na saray pulis so ngaran na manaayam ed abung, tan imbaga ra ya no bilang ta anggapoy ompaway no ontawag ak, businaan da so abung.”

“Diad tulong da, nakar min amin so abung ed saman ya agew. Amayamay so niiter min literatura, tan akaromog kami na saray interesado ya pawilen mi.”

Imbaga na saray pulis ed si Joseph ya na-enjoy day mangipasabi na maong a balita. Onlalabi la nen inmalis iray Tasi, tan nen paalis la ra, akaimis ya nanpayapay iramay pulis ya bemben da iray literatura na Biblia ya inter mid sikara.