MANUNAN ARTIKULO
Say Niyamot a Katuaan Nipaakar ed Impamalsa
BINILYON ya totoo so akabasa odino akadngel lad salaysay na Biblia no panon ya ginmapoy uniberso. Diad satan ya 3,500 taon lan salaysay, nabasad gapo irayan kabkabat ya salita: ‘Diad gapo et pinalsa na Dios so katawenan tan say dalin.’
Balet ag-amta na dakel a totoo ya inuman na saray lider na Kakristianoan, kaiba la ray tatawagen ya creationist tan fundamentalist, so salaysay na Biblia nipaakar ed impamalsa tan nanggawa ray is-istorya ya midumaan ed tuan ibabangat na Biblia. Mikontraan iratan ed ibabaga na science. Anggano anggapod Biblia, lapud saratan ya is-istorya, iisipen laingen na arum ya aliwan tua iray salaysay na Biblia.
Dakel ya totoo so agmakaamta ed tuan ibabaga na Biblia nipaakar ed impamalsa. Makapaermen itan ta diad tua, makatunongan tan napanmatalkan so paliwawa na Biblia no panon ya ginmapo so uniberso. Sakey ni, satan ya paliwawa et mitunosan ed saray adiskobre ed science. On, ompan nasurprisa kad katuaan ya ibabaga na Biblia nipaakar ed impamalsa ya inyamot na arum!
SAY AMALSA YA AGPINALSA
Say salaysay na Biblia nipaakar ed impamalsa et base ed katuaan ya walay Sankatagyan a Persona, Makapanyarin-amin a Dios, ya amalsad amin a bengatla. Siopa, tan antoy inkapersona to? Ibabaga na Biblia ya baleg so pidumaan tod saray dirios a kaslakan ya papanisiaan na totoo tan dadayewen ed saray manunan relihyon. Sikato so Amalsa ed amin a bengatla, balet dagdaiset so amta na maslak ya totoo nipaakar ed sikato.
Say Dios et sakey a persona, aliwan puersa ya anggapoy personalidad tan basta labat letaw-letaw ed interon uniberso. Sikatoy walaan na nonot, liknaan, tan gagala.
Say Dios et walaan na pakayari tan karunongan ya anggapoy limitasyon. Nanengneng tayo iyad saray komplikadon desinyo ed amin ya pinalsa, lalo lad saray mabilay a bengatla.
Say Dios so amalsa ed amin ya bengatlan nanengneng. Kanian, agnayarin sikatoy gawad pisikal iran elemento ta saratan et sikaton mismoy amalsa. Imbes, sikatoy sakey ya espiritu, odino agnanengneng a persona.
Say Dios et agnalimitaan na panaon. Sikatoy lawas lan wala, tan naynay ya wala diad andi-anggaan. Kanian, anggapo sirin so amalsa ed sikato.
Say Dios et walaan na personal a ngaran, a nilibon beses ya abitla ed Biblia. Satan ya ngaran et Jehova.
Si Jehova ya Dios et inad-aro tan iyaansakit to ray totoo.
PANON KABAYAG SO IMPAMALSA NA DIOS ED UNIBERSO?
Ibabaga na Biblia ya pinalsa na Dios so ‘katawenan tan say dalin.’ Anggaman ontan, anggapoy ibabaga na saya nipaakar ed kabayag na impamalsa ed uniberso odino saray paraan ya inusar tod impanggawad satan. Panon to balet imay kabkabat ya papanisiaan na saray creationist ya pinalsa na Dios so uniberso diad loob na literal ya anemiran agew—ya 24 oras so kada agew? Sayan ideya, ya agpanisiaan na saray scientist, et base ed lingon pakatalos ed salaysay na Biblia. Imanoen pa no anton talagay ibabaga na Biblia.
Agsusuportaan na Biblia so papanisiaan na saray fundamentalist tan creationist ya literal a 24 oras iray agew na impamalsa
Agsusuportaan na Biblia so papanisiaan na saray fundamentalist tan creationist ya literal a 24 oras iray agew na impamalsa.
Mabetbet ya uusaren ed Biblia so terminon “agew” pian tukoyen so nanduruman karukey na panaon. No maminsan, ag-amta no panon kabayag irayan panaon. Sakey ya alimbawa na satan so salaysay nipaakar ed impamalsa ya nabasad libro na Biblia ya Genesis.
Diad samay salaysay na Biblia, kada agew ed anemiran agew na impamalsa et nayarin nilibon taon so karukey to.
Pinalsa la na Dios so uniberso, kaibay anggapoy bilay a planetan Dalin, sanen ginmapo so unonan agew na impamalsa.
Mapatnag ya say anemiran agew na impamalsa et andukey iran panaon na impangiparaan nen Jehova a Dios ed dalin pian panayaman na totoo.
Say salaysay na Biblia nipaakar ed impamalsa et agmikontraan ed ibabaga na science ya kabayag la na uniberso.
KASIN INUSAR NA DIOS SO EBOLUSYON?
Dakel ed saray agmanisiad Biblia so manisia ed teorya ya saray mabilay ya bengatla et linmesa manlapud andiay bilay iran kemikal panamegley na agginagalan proseso. Ibabaga ran nensaman et walay organismon singa bacteria ya sarag toy manparakel, tan satan so nanlapuan na amin ya species natan. Ipapanengneng na satan a teorya ya say toon makapakelaw so inkagawa to et nan-evolve labat kuno manlapud bacteria.
Say teorya na ebolusyon et papanisiaan met na dakel a mankuan a manisia ran say Biblia et salita na Dios. Manisia ran inggapo na Dios so bilay ed dalin, insan to labat la sinubaybayan, tan posiblin inmaneobra to so proseso na ebolusyon. Balet, aliwan ontan so ibabaga na Biblia.
Say salaysay na Biblia nipaakar ed impamalsa et agmikontraan ed ibabaga na science ya wala ray pandumaan diad sakey a klase na species
Unong ed Biblia, pinalsa nen Jehova a Dios so amin ya manunan klase na tanaman tan ayayep, ontan met ed say perpekton laki tan bii ya sarag dan kabatey sarili da, nipanengneng day aro, dunong, tan hustisya.
Saray ayep tan tanaman ya pinalsa na Dios et wala ray angumanan da tan apawala iray nanduruman klase na saratan, balet ta kapareho da lanlamang. Mapatnag ya balang species et midumaan a maong ed saray arum.
Say salaysay na Biblia nipaakar ed impamalsa et agmikontraan ed ibabaga na science ya wala ray pandumaan diad sakey a klase na species.
NAPATNAGAN SO AMALSA ED SARAY PINALSA
Diad kapegleyan na saray taon 1800, say biologist ed Britain ya si Alfred Russel Wallace et inmabobon ed si Charles Darwin ed teorya to nipaakar ed ebolusyon panamegley na natural selection. Balet, anggan sayan kabkabat ya ebolusyonista et imbaga to ya: “Parad saramay walaan na matan makanengneng tan nonot ya apasal a mandalepdep, diad sankamelagan iran selula, diad dala, diad interon dalin, tan diad interon mabitewen a uniberso . . . , walay marundunong tan ninonot ya panangiwanwan; diad antikey, walay Maniisip.”
Ngalngali duan libon taon antis nen Wallace, onia lay imbaga na Biblia: “Ta saray agnanengneng a kualidad [na Dios] et sankanengneng manlapud impamalsa ed mundo a manpatuloy, lapud natebek iratan ed panamegley na saray pinalsa, anggan say andi-anggaan a pakapanyari tan inka-Dios to.” (Roma 1:20) Panapanaon, ompan labay mon dalepdepen a magano iray makapadinayew ya inkagawa na saray pinalsa—manlapud sakey a dika ya anggad saray agnabilang ya palsa ed tawen. Diad pangusisam ed sarayan pinalsa, napatnagan moy Amalsa.
Nayarin nitepet mo, ‘No walay maaron Dios ya amalsa ed amin a bengatla, akin et aabuloyan toy paniirap? Pinaulyanan to la kasi iray pinalsa tod dalin? Antoy nagawad arapen?’ Nabasad Biblia so dakel ni ran katuaan ya ag-impaamta—saray katuaan ya tinabonan na saray ideya na totoo tan bangat na relihyon kanian niyamot so katuaan ed dakel. Saray Tasi nen Jehova, ya nan-publish ed sayan magasin, et maliket ya ontulong ed sika pian nausisam so ag-alaokan ya katuaan na Biblia tan dakel ni naaralan mo nipaakar ed Amalsa tan say arapen na saray pinalsa ton totoo.