Kasin Manisia Iray Tasi nen Jehova ed Creationism?

Andi. Saray Tasi nen Jehova et manisia ya say Dios so amalsad amin. Balet agkami manisia ed creationism. Akin? Ta wala ray bangat na creationism ya kontrad Biblia. Niay duaran alimbawa:

1. Karukey na anemiran agew na impamalsa. Ibabaga na arum ya creationist ya samay anemiran agew na impamalsa et literal ya 24 oras so kada agew. Balet say salitan “agew” diad Biblia et nayarin ontukoy ed andukey ya panaon.​—⁠Genesis 2:4; Salmo 90:4.

2. Kabayag la na mundo. Ibabangat na arum ya creationist ya pigaran libon taon ni labat so mundo. Balet base ed Biblia, wala la so mundo tan say universe antis na anemiran agew na impamalsa. (Genesis 1:1) Lapud satan, agkokontraen na Saray Tasi nen Jehova iray scientific research ya mamuprueban binilyon lan taon so mundo.

Anggano manisia iray Tasi nen Jehova ed Amalsa, agkami kontra ed science. Manisia kami ya agmankontraan so Biblia tan science.