No Walay Trahedya

AMIN lawarin too et nayarin makaeksperiensyay trahedya. Kaiba la anggan saramay totoon singa wala lad sikaran amin.

SAY IBABAGA NA BIBLIA:

“Samay maples ya ombatik et agnaynay a manatalo ed lumba, samay mabiskeg et agnaynay a manatalo ed guerra, samay marunong et agnaynay a walaay naakan, samay intelihente et agnaynay a walaay kayamanan, tan saramay makabat et agnaynay ya ontatalona, ta say panaon tan saray ag-iilaloan a nagawa et onsasabid sikaran amin.”​—Eclesiastes 9:11, New World Translation.

Say tepet sirin et aliwan no kasin posible ya nipaarap kad trahedya noagta no antoy gawaen mo no onsabi itan ed sika. Singa bilang:

• Panon to no naandin amin iray kaykayarian mo lapud kalamidad?

• Panon to no naamtaan mon walay graben sakit mo?

• Panon to no inatey so sakey ya inad-arom ed bilay?

Saray Tasi nen Jehova, say publisher na sayan magasin et manisia ya tulongan ka na Biblia aliwa labat lan pian nasarag moy epekto na trahedya noagta pian nawalaan ka met na malet a basiyan parad ilalo. (Roma 15:4) Imanoen iray taloran eksperiensya no panon.