Kasin Marakep Labat a Libro so Biblia?

• Dinmalan so Biblia ed dakel ya graben panangataki na maimpluensyan totoo. Singa bilang, diad saray “Kristianon” bansa nen koma 13 anggad koma 15 siglo, “saramay walaan na Biblia tan manbabasa ed satan diad mismon lenguahe ra [lenguahe na karaklan] et impasen ya onkokontra o agmipakna ed doktrina na simbaan,” kuan na libron An Introduction to the Medieval Bible. Saray scholar ya angipatalos na Biblia ed lenguahe na karaklan odino angidaulod totoo ya aralen itan et impeligro day bilay da. Pinatey ni ingen so arum.

• Anggano dakel so mamubusol ed Biblia, siansia nin satan so sankarakelan ya nibubunog a libro ed interon mundo. Diad kalkulasyon, say interon Biblia o kabiangan na satan et niyimprinta la ed limaran bilyon a kopya diad masulok ya 2,800 a lenguahe. Arawrawi iya ed saray libro ed philosophy, science, tan arum nin libron aaralen na totoo, a daiset labat so nibubunog tan magangganon ondaan.

• Say Biblia et akatulong pian saray lenguahe ya walay patalos na Biblia et agnaandi tan onaligwas. Baleg so impluensya na German a patalos nen Martin Luther diad satan ya lenguahe. Say unonan edisyon na King James Version et tinukoy ya “nayarin sankaimpluensyaan a libron im-publish” ed English.

• Say Biblia et “baleg met so impluensya tod kultura na saray bansa ed Europa tan North America, aliwa labat a diad relihyon, noagta dia met ed art, literatura, ganggan, politika, tan arum ni.”​—The Oxford Encyclopedia of the Books of the Bible.

Pigara labat iratan ed saray ebidensya ya talagan duma so Biblia ed arum ya libro. Akin balet et popular a maong so Biblia? Akin ya impeligro na arum so bilay da parad satan? Niraya so kabiangan ed dakel ya rason: Karga na Biblia iray bangat no panon so manbilay tan nawalaay relasyon ed Dios a pakapatnagan na agnaparaan ya karunongan. Tutulongan itayo na Biblia a natalosan no panon ya ginmapo so paniirap tan agpankakasakey na totoo. Nagkalalo la, ipropromisa to ya manampot la iratan ya problema tan ipapaamta to no panon ya nagawa itan.

Ibabangat na Biblia No Panon so Manbilay tan Nawalaan na Relasyon ed Dios

Importante so edukasyon. Balet “say edukasyon . . . ya suldongan toy ngaran mo na titulo . . . et aliwan garantiya ya marundunong ka lan mandesisyon,” kuan na sakey ya editoryal ed dyaryo ed Canada ya Ottawa Citizen. Dakel ya totoon atagey so edukasyon da​—kaiba iray walaan na posisyon ed negosyo tan gobierno—​et mantitila, mansasaol, tan mantatakew, kanian “naeekalan na tiwala iray totoo,” base ed impanaral ed interon mundo ya im-publish na Edelman, sakey ya ahensia ed public relation.

Say manunan ibabangat na Biblia et no panon so manbilay tan nawalaan na relasyon ed Dios. Ibabangat tod sikatayo ‘no antoy maptek, matunong, tan matua. Naamtaan tayo no antoy nepeg tayon gawaen.’ (Probirbio 2:9, Maung a Balita) Alimbawa, walay lakin 23 años ya ingaran tayoy Stephen ya nipriso ed Poland. Legan ya walad prisoan, ginapoan ton aralen so Biblia tan naapresya to ray maabig ya bilin ditan. Insulat to: “Amtak la natan no antoy labay ya ibaga na ‘igalang moy amam tan inam.’ Naaralan ko met ya kontroley liknaan ko, lalo la no manpapasnok ak ya maong.”—Efeso 4:31; 6:2.

Say prinsipyon impapuso nen Stephen et samay nabasa ed Uliran 19:11: “Say kalakal na too manggawa ed sikato ya matantan a manpasnok, et gayaga to so pamalabas na pakalukso.” Natan, no nipapaarap si Stephen ed mairap ya situasyon, kalmado ton aaralen so situasyon tan uunoren to ray makatulong ya prinsipyo ed Biblia. Imbaga to: “Apruebaan ko ya sankamaongan a giya so Biblia.”

Si Maria, a sakey ya Tasi nen Jehova, et ininsulto ed arap na totoo na sakey a biin agto labalabay iray Tasi, kanian nanggawa iya na iskandalo. Balet imbes ya ebatan nen Maria, sikatoy kalmado ya inmalis. Pagbabawian na samay bii so ginawa to tan labay ton napinengnengan lamet iray Tasi. Kalabas na manga sakey bulan, anengneng to lamet si Maria, nilakap to tan nan-sorry ed sikato. Atalosan to met ya say rason no akin ya kakkalmado si Maria tan walay kontrol tod sarili to et lapud pananisia to. Antoy resulta? Samay bii ya datin agto labalabay iray Tasi nen Jehova et nanaral na Biblia ed sikara, pati say limaran kapamilya to.

Napruebaan so karunongan ed saray resulta na satan, kuan nen Jesu-Kristo. (Lucas 7:35) Kanian talagan duga iray prinsipyo ed Biblia! Gawaen to tayon maong ya too. ‘Gawaen ton makalakal so andi-amta, pagayagaen to so puso, tan liwawaan to iray mata’ pian malinew no antoy duga tan makapaliket ed Dios.​—Salmo 19:7, 8.

Ipapaliwawa na Biblia No Akin ya Maniirap tan Anggapoy Pankakasakey na Totoo

No aaralen day sakit ya nagmaliw ya epidemya, aamtaen na saray maniimbestiga so sengegan na inkayat na sakit. Ontan met so nepeg ya gawaen pian natalosan no akin ya maniirap tan anggapoy pankakasakey na totoo. Nipaakar ed saya et baleg so nitulong na Biblia, ta akasulat ditan iray agawa nen inmunan panaon nen ginmapo iray problema na too.

Ibabaga na libro na Genesis ya ginmapo so paniirap na too nen nanrebelde ed Dios so inmunan sanasawa. Nanggawa ra na sarili dan prinsipyo ed no antoy duga tan aliwa, ya say Dios labat so akankanepegan ta sikatoy nanggawa ed sikatayo. (Genesis 3:1-7) Makapaermen ta manlapu lad saman, aaligen na karaklan a totoo so ontan ya panagnonot. Anto ray resulta? Base ed saray agawad apalabas, nanengneng tayo ya imbes a bulos tan maliket iray totoo, wala ray gulo, panagpairap, tan pandudumaan ed saray prinsipyo ed moral tan pananisia. (Eclesiastes 8:9) Duga so ibabaga na Biblia: “Aliwa a wala ed too . . . a mangitonton ed saray kurang to.” (Jeremias 10:23) Balet say makapaliket a balita et magano lan manampot so makaderal ya panasali na toon manbilay ya anggapoy panangigiya na Dios.

Ibabaga na Biblia ya Walay Marakep ya Nagawad Arapen

Ipapaseguro na Biblia ya lapud inaro na Dios iray totoon rerespetoen day autoridad to tan saray ganggan to, panampoten to so kaugsan tan say paniirap ya resulta na satan. Saray mauges et ‘anien day bunga na ginawa da.’ (Probirbio 1:30, 31, Maung a Balita) Balet “saray mauyamo tawiren da naani dalin, tan manliket ira a dili ed inkadaakan na kareenan.”​—Salmo 37:11.

Sumpalen na Dios so gagala to ya gawaen a mareen so dalin panamegley na ‘Panarian to.’ (Lucas 4:43) Satan a Panarian et sakey a gobierno ya sakop toy interon mundo, tan panamegley na satan et ipanengneng na Dios ya sikatoy makanepegan ya manuley ed totoo. Oniay imbaga nen Jesus diad modelon pikakasi to: “Onsabi komon so panarian mo. Nagawa komon so linawam . . . ed dalin.”—Mateo 6:10.

On, saray uleyan na Panarian et gawaen day linawa o panlabayan na Dios, tan bidbiren dan say makanepegan ya Manuley et samay nanggawa ed sikatayo, aliwan siopaman a too. Anggapo la ray kurakot, maagum, mairap o mayaman, pambubusolan, tan guerra. Mankakasakey lay totoo, saksakey lay gobierno, tan saksakey lay tumboken ya prinsipyo ed duga tan aliwa tan ed pakawalaan na relasyon ed Dios.—Apocalipsis 11:15.

Kaukolan so panaral pian makapambilay ed satan ya balon mundo. “Say linawa [na Dios] et nilaban so amin a klase na totoo tan nawalaan ira na suston pikakabat ed katuaan,” kuan na 1 Timoteo 2:3, 4. Kaiba ed satan ya katuaan iray bangat na Biblia a nayarin nibagan konstitusyon na Panarian—saray ganggan tan prinsipyo diad panuley to, a singa saray imbaga nen Jesu-Kristo diad Sermon to ed Palandey. (Mateo, kapitulo 5-7) No babasaen mo iratan ya taloran kapitulo, isip mo no antoy magmaliw ya bilay no uunoren na amin a totoo iray imbangat nen Jesus.

Pankelawan tayo ni kasi no akin ya say Biblia so sankarakelan ya nibubunog a libro ed interon mundo? Andi! Saray bangat to et pakapatnagan ya nanlapu iratan ed Dios. Tan nanengneng ed karakel na kopyan nibubunog ya labay na Dios a sikatoy nakabat na totoo ed amin ya lenguahe tan bansa tan naawat da iray bendisyon na Panarian to.​—Gawa 10:34, 35.