“Natan Ko Labat ’tan Amta!”

SI Soo-jeong, guidance counselor ed sakey a high-school ed South Korea, et mangipapabantay ed klase to na saray video ed website ya jw.org. Imbaga to: “Balibali reaksion na saray estudyante ed video ya What’s a Real Friend? Kayari dan binantayan so video, oniay maslak ya ibabaga da: ‘Agkon balot naisip ya onman manayay pikakaaro. Natan ko labat ’tan amta!’ Wala ray angibaga ya lukasan da yan website no kaukolan day advice.” Imbaga ni nen Soo-jeong: “Inrekomendak iyan video ed dakel nin managbangat ya kaparak, tan malikeliket ira ta walay balibalin nausar da diad klase da.”

Say sakey nin video ya makakatulong ed dakel ya estudyante ed South Korea et say whiteboard animation ya Taloen so Bully ya Agmilalaban. Walay manag-lecture ed Juvenile Violence Prevention Foundation ya impabantay to itan diad saray estudyante. “Labalabay na dakel ya kabataan iyan video ta balibali ray drowing to,” so kuan to. “Insan, talagan makatulong iyan video ta agto labat ipanengneng no antoy gawaen no walay man-bully noagta ibaga to met no panon itan ya naiwasan.” Impatanir na foundation ya usaren da iyan video diad saray lecture da ed dakel ya elementary tan high-school. Inabuloyan iran ipabantay itan. Anggan saray pulis et uusaren da ray video ya walad jw.org.

Balibali no salien mon lukasan iyan website. Matmainomay itan ya usaren, tan sarag mon i-download iray audio tan video, pati say Biblia tan arum nin publikasyon—ya libre!