Epekto na Saray Video a Mangiiter na Pantasi
1 “Say anak min laki so manbabantay na video nanlapula’d nen agni makaakar. Ulit-uliten ton babantayan itan. Agaylan abig so pakawalaan na onia iran uusaren a mangipupurek na panangaro ed si Jehova ed ananak mi!” Dinan a video so dedeskribien na sayan Kristianon ateng? Samay apauloan na Noah—He Walked With God. Sakey ya aliwan-Tasin ina a say anak ton laki so akabantay ed video a Noah diad sananey ya abung so angipawit ed sangan opisina na $90 a donasyon tan ontetepet no kasin walaan itayo ni na arum iran video parad saray ugugaw. Saray video a pinawala na organisasyon nen Jehova so walaan na mabiskeg ya epekto ed saray kalangweran ontan met ed saray matatken la.
2 Diad Pamilya: Kayarin binantayan na sakey a Tasin pamilya so Jehovah’s Witnesses Stand Firm Against Nazi Assault, insalaysay na ina: “Inumameng kon sanagew no panon a tinulongan nen Jehova iray ordinaryon totoo a nasungdoan iray nikadkaduman bengatla! Diad paniisip ed satan et anonotan ko no panon kamelag iray dilin problemak. Say impanbantay mi ed sayan video kaiba so ananak mi so tinmulong ed sikara pian lalon natebek a malinew so pankaukolan a manmatalek ed si Jehova. Diad impangisingbat ed satan ed sikara kayari to, atulongan mi iray ananak min bibii pian lalon nakinlongan a mangarap ed antokaman iran desdes tan panamasegsegang a nayarin sagmaken da.”
3 Diad Eskuelaan: Bilang kabiangan na report, sakey a tin-edyer a Tasi so angipabantay na kabiangan na video ya Stand Firm ed klase to. Dati et inkuan na maestra ya agto labay iray Tastasi. Kayari ton binantayan so video, inkuan to: “Saya so sigpot ya anguman ed panmoriak ed saray Tastasi nen Jehova. Isipan ko a diad ontumbok ya onla ra ed abung ko, ondengel ak ed sikara tan igapok so paiyaralan na Biblia ed sikara!” Anto so akapanguman na impresyon to ed sikatayo? Inkuan to a satan et lapud “tuan aro tan katooran.”
4 Diad Ministeryo: Sakey a sister so akaabet na bii a masuyat a mangawat na literatura, anggaman walaray tepet to nipaakar ed sikatayo tan ed saray sisiaen tayo. Pinmawil so agi ya awit toy video a Jehovah’s Witnesses—The Organization Behind the Name tan impabantay to itan ed bii tan say masiken to. Sikaran sanasawa so nandinayew tan inmabobon a paiyaralan na Biblia. Bilang resulta na maabig ya impantasi ed sikara, ginapoan dan itunos so kabibilay da ed linawa na Dios.
5 Kasin sigpot yon uusaren iray video tayo pian nawalaan na sankaabigan iran resulta?