Mangusar na Saray Nanengneng a Katulongan ed Panagbangat
1. Panon ya angusar si Jehova na saray nanengneng a katulongan pian ibangat iray lingkor to nensaman, tan antoy epekto na satan?
1 Pian nipasabi so importantin impormasyon ed saray lingkor to nensaman, no maminsan et mangusar si Jehova na saray pasingawey tan kugip. Nonoten pa so pasingawey nen Ezequiel nipaakar ed mangatatawen a karwahe nen Jehova. (Eze. 1:1-28) Isipen pa labat so alikna nen Daniel kayari ton naawat so mapropetikon kugip a mangililitrato ed pantutumbokan na sankamundoan iran pakayari. (Dan. 7:1-15, 28) Tan anto met so nipaakar ed makapasagyat a pasingawey a nirepresenta “diad saray tanda” ed si apostol Juan nipaakar ed saray bengatlan nagawa legan na “agew na Katawan”? (Apo. 1:1, 10, NW) Imbangat nen Jehova iratan a lingkor to nensaman diad impangusar toy mabitabitar iran kolor tan makapanyari iran kiwas, kanian nipaslep itan a maong ed nonot da.
2. Antoran nanengneng a katulongan so nayari tayon usaren pian ibangat ed arum so katuaan na Biblia?
2 No labay tayon ipaliwawa iray katuaan na Biblia ed arum diad paraan a mairap dan nalingwanan, nayari tayo met ya usaren iray video ed pambangat. Saray video tayo et mangilaktip ed nanduruman tema tan mamabiskeg na talek tayo ed Biblia, ed organisasyon nen Jehova, tan ed saray prinsipyo a mamaaligwas ed Kristianon kabibilay. Nonoten pa so pigaran paraan a nausar tayoray video ed pambangat. Say onggendan et alimbawa na saray video a nayarin usaren.
3. Antoy nausar yo pian iwanwan so iyaaralan na Biblia ed organisasyon?
3 Diad Ministeryo: Kasin intongtong yo la ed iyaaralan yo na Biblia so nipaakar ed sankagloboan a Kristianon impanaagi tayo? Ipanengneng itan ed sikato panamegley na video ya Our Whole Association of Brothers. Balanglan ipabayes itan ed sikato pian nabantayan to antis na ontumbok a panaral yo odino bantayan yon dua sano ontumbok a panagaral. Insan singbaten iray repason tepet a naromog ed Hunyo 2002 a Ministeryo Tayo ed Panarian.
4. Antoran kagawaan ed panagbangat so nayarin usaren na kalangweran a Tasi diad eskuelaan?
4 Sikayoran kalangweran, nayari yon itongtong ed maestro o maestra yo so nipaakar ed posibilidad a nipabantay ed klase yo so dokumentaryon video a Jehovah’s Witnesses Stand Firm Against Nazi Assault odino Faithful Under Trials—Jehovah’s Witnesses in the Soviet Union. Iyopresi so pangiparaan na tepet, ya itukoy ed diskusyon na klase yo iray tepet ed Hunyo 2001 odino Pebrero 2003 a Ministeryo Tayo ed Panarian.
5. Antoy nitarya parad atateng ya usaren da ed panagaral na pamilya ra?
5 Diad Pamilya tan Kakaaro: Atateng, isipen pa so imbalbaleg la na ananak yo nanlapula’d inkipaway na video a Young People Ask—How Can I Make Real Friends? Akin ta no bantayan yo lamet itan ed ontumbok a panagaral yo bilang pamilya? Say Abril 2002 a Ministeryo Tayo ed Panarian so mangidadatak na saray tepet parad maligsa tan prangkan pantotongtong.
6. Panon yon niyuksoy so makapaseseg a panaon kaiba iray kakaaro?
6 Kasin walaray kakaaro ed kongregasyon a labay yon imbitaan ed abung yo? Say paniiban pambantay ed video a Respect Jehovah’s Authority et gawaen ton makapaseseg so labi, nagkalalo la no kayari na satan et repasoen yoray leksion a naaralan, ya usaren iray tepet a nilista ed Setyembre 2004 a Ministeryo Tayo ed Panarian.
7. Antoran posiblin pankanawnawa so naisip yon pangusaran ed saray video tayo?
7 Arum Niran Pankanawnawa: Anto ni ray arum a paraan a nausar yo so 20 a nanduruman video tayo? Kasin say pangipabantay ed sakey odino duara ed saratan ed bibisitaen yon regular so ontulong ed sikaton onaligwas ed espiritual? Kasin niyopresi yon ipabantay iray video diad lokal a nursing home odino center parad saray senior citizen? Kasin say video so ontulong a mamawala na maong ya impresyon ed saray aliwan-Tasi a kakanayon, kakaabay, tan saray katrabahoan? Saray video tayo so makapasagyat, makaibangat, tan epektibon nanengneng a katulongan. Usaren iratan ed pambangat.