Saray Uusaren a Pambangat, Pamakiwas, tan Pamabiskeg
1 Saratan so mabiskeg a pangibangat ed totoo nipaakar ed Biblia tan ed saray Tastasi nen Jehova. Pinakiwas na saratan so dakel pian ontalindeg a malet ed katuaan. Pinabiskeg na saratan so pananisia tan apresasyon na dedikadon totoo na Dios. Anto iratan? Saray video a pinawala na organisasyon nen Jehova. Kasin abantayan yo lan amin iratan a samploran video? Kapigan ni? Kasin uusaren yo iratan ed ministeryo yo? Panon kayon nagkalalon nagunggunaan ed sarayan alay abig ya uusaren?
2 Inrekomenda na Hulyo 1, 1999, ya artikulo na Panag-Bantayan a “Maparanay ya Aralen so Salitay Dios Bilang Pamilya” ya “isalet yo met ed panagaral yo so pambantay ed sakey a makaibangat iran video na Sosyedad . . . insan singbaten itan.” Mitunosan ed satan a maabig a simbawa, iparungtal so nanduruman video diad Service Meeting ed kada pamalabas na sakey bulan. Pasesegen min amin a bantayan so video dia ed abung sakbay a singbaten itan ed Service Meeting.
3 Igapo tayo ed sayan bulan so pilimeron video a pinawala, Jehovah’s Witnesses—The Organization Behind the Name. Bantayan tan dengelen iray ebat ed sarayan tepet:
◼ Diad anto a bantog iray Tastasi nen Jehova?
◼ Amin a gagawaen ed Bethel so nisiglaot ed anton teksto?
◼ Anton eksena ed Biblia so abantayan yon nipalabas, nilitrato, tan nidrowing ya usaren ed saray palapagan?
◼ Antoy akasagyatan yo nipaakar ed inkiparaan na literatura tayo?
◼ Nanlapula’d 1920 ya anggad 1990, kaunongan lan literatura so inimprinta na Sosyedad?
◼ Siopa ed limog na totoo na Dios so nagkalalo lan ondampot pian onkualipikan manlingkor ed Bethel?—Uli. 20:29.
◼ Diad antoran paraan ya impanengneng na pamilyay Bethel so alay abig ya alimbawa parad amin a Tastasi nen Jehova?
◼ Antoy akasagyatan yo nipaakar ed nagagawan kimey ed Bethel pian napasabian so dakel a totoo no nayadyari na maong a balita?
◼ Panon a gagastosan so sankamundoan a kimey?
◼ Anton kimey so maseseg tayon suportaan, tan diad anton awawey?—Juan 4:35; Gawa 1:8.
◼ Antoy liknaan yo nipaakar ed organisasyon ya inkatawagan tayo?
◼ Panon yon usaren iyan video ed ministeryo?
No Disyembre et repasoen tayo so videon The Bible—Accurate History, Reliable Prophecy.