Saray Tasi nen Jehova—Organisadon Manginabang ed Maong a Balita
Diad loob la na masulok a 100 taon, inorganisa iray Tasi nen Jehova a manginabang ed maong a balita. Diad sayan sankalaknaban a panagpulong a kampanya ed interon mundo, ipapaamta tayo iyan mensahe ed nilasus a lenguahe tan masulok a 230 a daldalin. (Mat. 24:14) Akin et importante iyan kimey? Panon iyan nagagawaan ed sankamundoan? Ebatan na video ya Jehovah’s Witnesses—Organized to Share the Good News iratan a tepet diad detalyadon pangipabantay ed dakel ya aspekto na internasyonal a kimey tayo. Kayari yon bantayan iyan video, konsideraen iray onggendan a tepet.
Panon a pinaaralem na sayan video so apresasyon mo (1) ed pansasagpot na organisasyon nen Jehova ya ipulong so maong a balita? (2 Tim. 4:2) (2) ed pamilyan Bethel diad sankamundoan? (3) ed edukasyon tan panangipasal ed saray misionero tan manangasikaso? (2 Tim. 2:2) (4) ed kaimportantian na inagew-agew a pangonsiderad sakey a teksto na Biblia tan pangiparaan ed sinimba iran pantitipon ed kongregasyon? (Gawa 17:11) (5) ed saray gunggona diad iyatendid saray Kristianon pantitipon tayo? (Heb. 10:24, 25) (6) ed saray bendisyon ya naawat mo sano magmaliw lan Paraiso so dalin? (Isa. 11:9) (7) ed pribilehyon pibiang ed peles a panagani?—Juan 4:35.
Baleg so nitulong na sayan video pian naamtaan na saray interesadon totoo so sankamundoan a kimey na saray Tasi nen Jehova. (8) Kapigan tayo ipabantay iyan video ed saray iyaaralan na Biblia, kakanayon, tan arum ni? (9) Antoy positibon reaksion na totoo sano ipapabantay yo iya?
Legan tayon nononoten so gagawaen nen Jehova, mipakna itayo ed imbaga na salmista: “Dakel iray ginawam parad sikami, O Jehova a Dios ko, saray makapakelaw a kimey mo tan saray nononoten mo nipaakar ed sikami; anggapoy makapipara ed sika.” (Sal. 40:5, NW) Komon ta usaren tayo iyan video pian tulongan so arum a mangapresyad si Jehova tan ed organisasyon to!