Say Sankalaknaban a Panagpulong a Kampanya ya Akabatan na Mundo!
Diad loob la na masulok a 100 taon, naorganisa iray Tasi nen Jehova a mangilaknab ed maong a balita. (1 Cor. 9:23) Diad sayan sankalaknaban a panagpulong a kampanya ya akabatan na mundo, ipapaamta tayo iyan mensahe ed nilasus a lenguahe. Ipapasabi tayo itan ed masulok a 230 a daldalin. (Mat. 24:14) Balet akin ya importante iyan kimey? Tan panon a nagagawaan itan ed sankamundoan?
Ebatan na video a Jehovah’s Witnesses—Organized to Share the Good News iratan a tepet diad detalyadon pangipabantay ed dakel ya aspekto na internasyonal a kimey tayo. Legan yon babantayan itan, nonoten irayan tepet: (1) Panon ya oorganisaen tan ididirehi so kimey tayo? (2) Panon a makakatulong na baleg iray Departamento na Writing, Translation Services, Art, tan Audio/Video Services ed pangipapasabi ed maong a balita? (3) Anto so gagala na malaknab a panag-imprinta tan panangipatulor tayo? (Juan 17:3) (4) Kaunongan karakel a literatura so niiimprinta ed sakey taon? (5) Anto so nagagawaan na nibase ed Biblia iran publikasyon tayo? (Heb. 4:12) (6) Anto so peles a gagawaen pian nitarya so espiritual a tulong parad saramay walay deperensya ed pakanengneng odino pakadngel? (7) Panlalapuay gagastosen ed kimey tayo? (8) Panon itayon nagugunggonaan ed kimey na Hospital Information Services, Service Department, tan Convention Department? (9) Bilang sakey ed saray Tasi nen Jehova, panon a pinaaralem na sayan video so apresasyon tayo (a) ed sagpot a gagawaen na organisasyon nen Jehova ed panangipulong ed maong a balita? (b) ed masulok a 100 a pamilyan Bethel ed sankamundoan? (c) ed edukasyon tan panangipasal ed saray manangasikaso tan misionaryo? (d) ed kaimportantian na inagew-agew a pangonsidera ed sakey a teksto na Biblia tan pangiparaan ed sinimba iran pantitipon ed kongregasyon? (e) ed saray gunggona diad iyatendi ed saray Kristianon pantitipon tayo? (f) ed saray bendisyon ya itarok na Paraiso diad dalin? (Isa. 11:9) (g) ed pibiang a personal ed peles a nagagawan panagani?—Juan 4:35.
Anto so naimano yon maabig a resulta sanen impabantay yo iyan video ed saray kakanayon, kabkabat, saray papawilen, tan saray iyaaralan yo na Biblia? Akin ya agla inabang a tampol iyan video tan say maong a balita ed arum ni?—Mat. 28:19, 20.