Panon Kan Mandesisyon na Duga?

Kasin ginawa na Dios so uniberso tan say bilay odino basta labat iratan ya linmesa? Samay imbaga na duaran physicist ed gapo et duman maong ed ebat na Biblia ed satan ya tepet. Parehon dakel so manisia tan onsusuporta ed saratan ya ideya. Balet dakel met so aliwan segurado no antoy panisiaan da. Tan pande-debatian iya na saray totoo diad saray sikat ya libro tan palabas ed telebisyon.

Nayarin imbangat ed sika na teacher mo ya say uniberso tan bilay et nanlapud anggapo, ya anggapoy Amalsa ed saratan. Pero kasin wala ray impanengneng na teacher mo ya ebidensyan manpatunay ya anggapoy Amalsa? Ontan met, nayarin arengelan mo lan ibabangat na saray lider na relihyon ya wala so Amalsa. Pero wala kasi impanengneng dan ebidensya ya onsuportad satan ya ibabaga da? Odino basta da labat imbagad sika ya dapat mon panisiaan ya walay Dios ta atan so doktrina na simbaan?

Seguradon naisip mo la irayan tepet, balet ta pakaliknam et anggapoy makapangibaga ed sika no talaga kasin walay Amalsa. Tan nayarin naisip mo lamet: Kasin importante ya naamtaan koy ebat?

Diad sayan isyu na Onliing!, naamtaan mo nin unona iray ebidensya no akin ya manisia so dakel ya walay Amalsa. Insan mo naamtaan so ebat ed satan ya tepet tungkol ed nanlapuan na bilay diad dalin.