Balibalin Hardin

NENGNENG moy dalin! Balibali awa? Nengneng mo ray dikarika, kakiewan, rosas tan ayayep. Iturom pa no iner ditay elepante tan leon?

Panon ya agawa iyan marakdakep ya hardin? Nengnengen tayo no antoy ginawa na Dios.

Unona, imbilkag na Dios iray birdin dika. Insan, nanggawa na nanduruman klase na tanaman tan kakiewan. Kanian, lalon binmalibali so dalin, tan dakel ed saraya so manbubunga na masasamit a naakan.

Kayari na satan, nanggawa so Dios na sirasira ya onlalangoy ed danum tan nanduruman siwit ya ontetekiab ed tagey. Sikatoy nanggawa na aso, pusa, tan kabayo; angkakabaleg tan angkekelag ya ayayep. Anto ran ayep so walad sikayo? Maliket ka kasi ta ginawa na Dios iraya parad sikatayo?

Insan, ginawa na Dios ya espisyal so sakey a parte na dalin. Tinawag to iyan hardin na Eden. Talagan marakdakep! Balibalin amin so wadia. Tan labay na Dios ya magmaliw ya onia so interon dalin.

Balet, nengneng mo lamet so litrato na sayan hardin. Antam no antoy kulang? Nengnengen tayo.