Say Inmunan Laki tan Bii

ANTOY duma ed sayan litrato? Duga, wala lay too. Sikara so inmunan laki tan bii. Siopay nanggawad sikara? Say Dios. Antam no antoy ngaran to? Jehova. Tan say laki tan bii et tinawag ya Adan tan Eva.

Onyay impanggawa na Dios ed si Adan. Angala na dabok ed dalin tan ginawa ton perpekton laman. Insan to sinibokan so eleng na laki, tan binmilay si Adan.

Walay ipapagawa nen Jehova a Dios ed si Adan. Binilin toy Adan ya ngaranan iray nanduruman klase na ayayep. Anganko abayag ya inobserbaan nen Adan iray ayayep pian makapili na inangay dan ngaran. Balet, walay apansin nen Adan. Antam no anto?

Walay asawa na amin ya ayep. Walay elepanten tatay tan elepanten nanay, walay leon ya tatay tan leon ya nanay. Pero si Adan anggapoy asawa to. Kanian, pinaugip nen Jehova si Adan tan angala na sakey ya taglang to. Ginawa iya nen Jehova a bii parad si Adan tan nagmaliw ya asawa to.

Malikeliket la natan si Adan! Tan seguradon malikeliket met si Eva ya manayam ed balibalin hardin! Natan, nayari la ran manpamilya tan manbilay a maliket.

Labay nen Jehova a mantultuloy ya manbilay si Adan tan Eva. Labay ton pabalibalien da so interon dalin a singa say hardin na Eden. Seguradon malikeliket si Adan tan Eva no iimadyinen da iya! Sika ey, labay mo met ya parakepen so dalin? Balet, agnantultuloy ya maliket si Adan tan Eva. Nengnengen tayo no akin.