Tepet na Saray Manbabasa
No Perpekto si Adan, Akin et Sikatoy Akapankasalanan?
Posible parad si Adan so pankasalanan lapud sikatoy pinalsa na Dios a walaan na bulos a panagdesisyon. Satan a regalo et agbalot onsumlang ed inkaperpekto nen Adan. Diad tua, say Dios labat so sigpot a perpekto. (Deuteronomio 32:3, 4; Salmo 18:30; Marcos 10:18) Say inkaperpekto na sakey odino dinanman a bengatla et limitado. Nibaga labat a say sakey a bengatla et perpekto no nagagawaan na satan so angigagalaan ed satan.
Parad anton gagala sirin a pinalsa na Dios si Adan? Gagala na Dios a diad panamegley nen Adan et napawala so intelihentin katooan a walaan na bulos a panagdesisyon. Nipatnag iya na saramay malabay a mamaaligwas ed panangaro ra ed Dios tan ed saray dalan to diad pamili ran ontulok ed saray ganggan to. Say katutulok sirin et aliwan niprograma ed panagnonot na too, noagta boluntaryon manlapud puso. (Deuteronomio 10:12, 13; 30:19, 20) Kanian, no anggapoy pakasarag nen Adan a manggaway sarili ton desisyon, sikatoy aliwan kompleto odino aliwan perpekto. Ipapanengneng na rekord na Biblia no panon a pinili nen Adan ya usaren so bulos a panagdesisyon to, a tinumbok toy asawa to diad ag-intulok ed ganggan na Dios nipaakar ed “kiew a pakaamtaan na maong tan mauges.”—Genesis 2:17; 3:1-6.
No ontan, kasin pinalsa na Dios si Adan a walaay depekto ed moral, kanian agto nasarag so manggawa na maabig iran desisyon odino agto nalabanan so tukso? Antis na insumlang nen Adan, inusisa nen Jehova a Dios so amin a pinalsa to ed dalin, pati say inmunan paris a too, tan inkuan ton “maong iran tuloy.” (Genesis 1:31) Kanian, sanen nankasalanan si Adan, agto labay ya ibagan walay depekto na impamalsa ed sikato, noagta say natetel et sikaton mismo. (Genesis 3:17-19) Ag-inabuloyan nen Adan a sikatoy pakiwasen na panangaro ed Dios tan ed maptek a prinsipyo pian tuloken so Dios a nagkalalo ed amin.
Isipen met a sanen wadiad dalin si Jesus et sikatoy perpekton too a singa si Adan. Balet, si Jesus so inlukon diad tulong na masanton espiritu, ya aliwan singa ed saray kapolian nen Adan, sirin sikatoy ag-akatawir na kakapuyan, kanian sarasarag ton labanan so tukso. (Lucas 1:30, 31; 2:21; 3:23, 38) Diad dilin panlabayan nen Jesus et sikatoy nansiansian matoor ed Ama to anggaman mabiskeg iray desdes. Diad impangagamil nen Adan ed bulos a panagdesisyon to, eebatan ton mismo so agto intulok ed ganggan nen Jehova.
Akin balet a pinili nen Adan so ag-ontulok ed Dios? Kasin say abaloan to et napaaligwas toy kipapasen to? Andi, lapud insulat nen Pablo a si ‘Adan et ag-apalingo.’ (1 Timoteo 2:14, Maung a Balita) Balet, akinonong si Adan ed panlabayan na asawa to, ya amili lan angan ed bunga na isesebel a kiew. Mas mabiskeg so pilalek nen Adan a napaliket so asawa to nen say pilalek ton tuloken so Amalsa ed sikato. Segurado a sanen niyopresi ed sikato so isesebel a bunga, agninonot nen Adan so epekto na satan diad relasyon to ed Dios. Lapud andian na aralem tan malet a panangaro ed Dios, si Adan so magmainomay a sinmuko ed desdes, pati ed panamilit na asawa to.
Nankasalanan lay Adan antis nin makapanilalak, kanian amin a kailalakan to et aliwan perpekto. Balet, singa si Adan, walaan itayo na regalon bulos a panagdesisyon. Komon ta pilien tayon dalepdepen tekep na pisasalamat so kaabigan nen Jehova tan paeleten so panangaro ed Dios, a sikatoy manepeg ed katutulok tan panagdayew tayo.—Salmo 63:6; Mateo 22:36, 37.