Ginmapo Iran Nanirap

DIAD paway na hardin na Eden, nanirap ira di Adan tan Eva. Kaukolan day mantrabahon maong pian walay naakan da. Imbes ya masasamit ya prutas, puros sabisabit tan dikarika so nanenengneng da. Agda tinulok so Dios kanian agto la ra kaaro.

Balet aliwan satan labat, agla ra mantultuloy ya manbilay. Di ba imbaga na Dios ya ompatey ira no kanen da may bunga na sakey ya kiew? Kanian, manlapu lad samay impangan da, sikaray nansakit, tinmakken, ya anggad inatey. Aliway ginawa ra, agda dinengel so Dios!

Awalaan na ananak si Adan tan Eva kayari iran pinapaway na Dios diad hardin na Eden. Kanian, amin ya ananak da et ontatken tan ompatey met.

No inunor da si Jehova, maliket komon so bilay da tan na saray anak da, tan tuloytuloy iran manbilay diad dalin. Ag-ira komon tinmakken, nansakit, tan inatey.

Labay na Dios ya maliket tan tuloytuloy ya manbilay iray totoo, tan impormisa to ya nasabi agew et gawaen to ’tan. Magmaliw ya marakdakep so interon dalin, tan amin a totoo et agla mansakit. Say amin et magmaliw lan sankakaaro tan kaaro na Dios.

Balet, agla kaaro na Dios si Eva. Kanian nen nan-anak, nairapan ya maong. Talagan makapaermen so ag-itulok ed si Jehova, awa?

Dakel so nagmaliw ya anak di Adan tan Eva. Say ngaran na panguloan ya anak da et Cain. Say komaduan anak da et si Abel. Antam no antoy agawad sikara?