Lakin Agtinmakot

SANEN amayamay lay too diad dalin, dakel ed sikara et mauges a singa si Cain. Balet, walay sakey a lakin duma. Say ngaran to et Enoc. Sikatoy makpel. Saray totoo ed kaliberliber nen Enoc et mauge-uges, balet sikatoy siansian mandadayew ed Dios.

Antam no akin ya mauge-uges iray totoo nensaman? Nonot mo pa, siopa may nansugsog ed si Adan tan Eva pian kanen so bungan ibabawal na Dios? Duga, samay mauges ya anghel. Diad Biblia et sikatoy tinawag ya Satanas. Tan labay ton magmaliw ya mauges so amin.

Aminsan, ingganggan nen Jehova si Enoc ya ibagad saray totoo ya ‘deralen na Dios so amin ya mauges a totoo.’ Agda itan labay a narengel kanian ampetang so ulo rad sikato. Sinali da ni ingen ya pateyen si Enoc. Kaukolan sirin ya pabiskegen nen Enoc so linawa to pian nibaga tod sikara so gawaen na Dios.

Ag-inabuloyan na Dios si Enoc ya manbilay na andukey kaiba na saray mauges. Sikatoy nambilay labat na 365 ya taon. Akin et imbaga tayon “labat”? Kasi saray totoo nensaman et mas mabiskeg tan mas andukey so bilay da. Say anak nen Enoc ingen a si Matusalem et nambilay na 969 a taon!

Kayari impatey nen Enoc, inmuges lan inmuges iray totoo. Ibabaga na Biblia ya ‘puros mauges so walad isip da’ tan ‘napno na mauges so dalin.’

Antam no akin et magulon maong nensaman? Ta walay balon paraan nen Satanas pian manggawa na mauges iray totoo. Saya so ontumbok ya aralen tayo.