Nanakar si Enoc a Kaiba so Dios Diad Sakey a Mundon Agmaridios

IPIPILIT na Diablo a sarag ton pabenegen so amin a totoo ed Dios, tan no maminsan et singano sikatoy manatalo. Diad loob na ngalngali limaran siglo kayari impatey nen Abel, anggapoy abidbiran a matoor a lingkor nen Jehova. Diad kasunian, kaslakan lay makasalanan tan agmaridios a kondukta.

Legan na satan a panaon na abebbeban kipapasen ed espiritual so impanbilay nen Enoc. Ipapatnag na kronolohiya na Biblia a sikatoy nianak nen 3404 K.K.P. Sikato so aliwan singa saray kapanaonan to, ta pinaneknekan nen Enoc a sikato so toon naabobonan na Dios. Sikatoy imbilang nen apostol Pablo ed saramay lingkor nen Jehova a walaay pananisia a matalonggaring ya alimbawa parad saray Kristiano. Siopa si Enoc? Antoray probleman kaukolan ton arapen? Panon ton atalonaan iratan? Tan antoy pisiglaotan na integridad to ed sikatayo?

Diad saray agew nen Enos, a ngalngali apatiran siglo sakbay na panaon nen Enoc, “ginmapo so totoo ya ontawag ed ngaran nen Jehova.” (Genesis 4:26) Say madibinon ngaran so nauusar la nanlapula’d gapo na awaran na too. Kanian, say ginmapo sanen manbibilay si Enos et aliwan say pananawag ed ngaran nen Jehova unong ed pananisia tan puron panagdayew. Sisiaen na arum a Hebreon iskolar a say Genesis 4:26 so nepeg a nabasan “ginmapon namudmora” odino “insan ginmapo so panagmudmora.” Nayarin inngaran na totoo so ngaran nen Jehova ed inkasikaran dili odino ed arum a totoo a no iner et sikaray mankuankuanan ya onaasingger ed Dios ed panagdayew. Odino sikato so nayarin inngaran da ed saray talintao.

‘Akiulop-ulop si Enoc ed Tuan Dios’

Anggaman apaliberan si Enoc na ag-inkamaridios, sikatoy “akiulop-ulop ed [tuan] Dios,” si Jehova. Agnibaga no saray inmunan atateng to​—di Set, Enos, Cainan, Mahalaleel, tan Jared​—so nanakar a kaibay Dios. No bilang ta ontan, satan so agpareho ed impankurang nen Enoc, a say dalan na bilay to so mapatnag a nidumaruma ed sikara.​—Genesis 5:3-27.

Say impanakar a kaiba si Jehova so mangisusuheri na pikabisado tan inkamaapit ed Dios a posibli lambengat lapud si Enoc so nambilay a mitunosan ed linaway Dios. Inabobonan nen Jehova so debosyon nen Enoc. Diad tua, inkuan na Griegon Septuagint a “si Enoc so makapalikliket ed” Dios, sakey a kaisipan ya imbalikas met nen apostol Pablo.​—Genesis 5:22; Hebreos 11:5.

Say sankaimportantian ed maong a relasyon nen Enoc ed si Jehova et say pananisia to. Maseguron sikatoy angagamil na pananisia ed nisipan a “bini” na “bii” na Dios. No aktual ya akabkabat to si Adan, agamoran komon nen Enoc so impormasyon nipaakar ed impideneng na Dios ed inmunan sanasawan too diad Eden. Lapud pikakabat to nipaakar ed Dios et nagmaliw si Enoc a sakey a toon “masimoon a manaanap ed sikato.”​—Genesis 3:15; Hebreos 11:6, 13, NW.

Diad kipapasen nen Enoc tan sikatayo, kakaukolanen na maong a relasyon ed si Jehova so mas ni nen say pikakabat lambengat ed Dios. No talagan papablien tayo so inkamaapit ed sakey a too, agta tua a saray kanonotan tan kiwas tayo et naiimpluensyaan na saray panmoria to? Papaliisan tayoray salita tan kakikiwas a maneral ed ontan a relasyon. Tan no iisipen tayon umanen iray dilin sirkumstansya tayo, agta ikonsidera tayo met no panon iyan mangapekta’d satan a relasyon?

Say pilalek a mantinien so maapit a relasyon ed Dios so mangapekta ed no antoy gagawaen tayo. Say kakaukolanen et say suston pikakabat ed no antoy aabobonan to tan agto aabobonan. Insan kaukolan tayo so paigiya ed ontan a pikakabat, a pambabanikelan a sikatoy paliketen diad kanonotan tan kiwas tayo.

On, pian makapanakar a kaibay Dios, nepeg a sikatoy paliketen tayo. Ontan so ginawa nen Enoc ed loob na nilasus a taon. Diad tua, say porma na Hebreon verb a mangipapanengneng a si Enoc et “nanakar” a kaibay Dios et kabaliksan toy paulit-ulit tan tuloy-tuloy a kiwas. Say sakey nin matoor a lakin ‘nanakar a kaibay Dios’ et si Noe.​—Genesis 6:9, NW.

Si Enoc so walaan na asawan bii tan nanilalak na “lalaki tan bibii.” Sakey ed saray ilalak to et si Matusalem. (Genesis 5:21, 22) Agpanduaruwaan, ginawa nen Enoc so anggaay nayarian to pian idaulo so sankaabungan to diad maabig a dalan. Balet, lapud apaliberan na ag-inkamaridios, aliwan mainomay parad sikato a lingkoran so Dios. Si Lamec, say ama nen Noe, so nayarin say alenleneg a kapanaonan nen Enoc ya angagamil na pananisia ed si Jehova. (Genesis 5:28, 29) Ingen, si Enoc so sipapakpel ya angagamil na tuan panagdayew.

Antoy tinmulong ed si Enoc pian mansiansian matoor ed Dios? Agpanduaruwaan ya ag-akilimog ed saray managmudmora ed ngaran nen Jehova odino ed saramay agmanepeg a kaulop parad sakey a managdayew na Dios. Say impangipikasi ed tulong nen Jehova so maseguron amabiskeg met ed determinasyon nen Enoc pian paliisay antokaman a nayarin agmamaliket ed Manamalsa to.

Say Propesiya Sumpad Saray Agmaridios

Say panmantini na saray atagey ya estandarte so mairap a tuloy sano napapaliberan itayo na saray agmaridios a totoo. Balet ta nipasabi met nen Enoc so mapekder a mensahe na panangukom sumpad saray marelmeng. Diad panangiwanwan na espiritu na Dios, mapropetikon inyabawag nen Enoc: “Nia, say Katawan onladia a tarok to so saray samplon libolibo a sasantos to, a mangukom ed ganagana, tan mangipatnag na katuaan ed saray mangaruksa a nipaakar ed mangaruksan gawa ra, tan ganagana a bengatla ya ambelat ya agagamil a saray maruksan managkasalanan sinalsalita ra sumpa ed sikato.”​—Judas 14, 15.

Antoy epekto na satan a mensahe ed saramay sumlang ya agmananisia? Makatunongan a nibagan say ontan a makapasakit iran salita et pinagmaliw ton aglabalabay si Enoc, a nayarin anagyat ni ingen na pananginsulto, panludlurey, tan panangigagaem. Maseguron walaray malabay a mamatey ni ingen ed sikato. Balet ta agtinmalaw si Enoc. Amta to no antoy agawa ed matunong ya Abel, tan singa sikato, si Enoc so determinadon manlingkor ed Dios, antokaman so nagawa.

“Sikato so Inala na Dios”

Mapatnag a wala’d kaatapan so bilay nen Enoc sanen “sikato so inala na Dios.” (Genesis 5:24) Ag-inabuloyan nen Jehova a say matoor a propeta to et pairapen na saray maruruksan kakabusol. Unong ed si apostol Pablo, “si Enoc sikato so niyalis pian agto nanengneng so patey.” (Hebreos 11:5) Dakel so mangibabaga a si Enoc so ag-inatey​—ta sikatoy inala na Dios ed tawen, a ditan et siansia nin manbibilay. Balet, malinlinew so imbaga nen Jesus: “Anggapo so too a sinmegep ed tawen, noag say linmasur nanlapu ed tawen, salanti, Anak na too.” Si Jesus so “manunaan” ed amin ya onsegep ed tawen.​—Juan 3:13; Hebreos 6:19, 20.

Kanian, anto so agawa ed si Enoc? Say ‘inkiyalis to pian agto nanengneng so patey’ et nayarin mankabaliksan a sikatoy pinanengnengan na Dios na pasingawey insan inala na Dios so bilay to legan a sikatoy walad ontan a kipapasen. Diad silong na ontan iran kipapasen, agnasagmak nen Enoc iray ot-ot na ipapatey. Kanian sikato so “agnalmo,” a nayarin ontan lapud si Jehova so angala ed laman to, a singa ginawa to’d laman nen Moises.​—Deuteronomio 34:5, 6.

Si Enoc so nambilay na 365 a taon​—aliwan singa ed karukey na saramay kapanaonan to. Balet say importantin bengatla parad saray mangaaro ed si Jehova et say panmatoor dan manlingkor ed sikato anggad anggaan na bilay da. Amta tayon ontan so ginawa nen Enoc ta “sakbay na inkiyalis to et atasian ton apaliket ton maong so Dios.” Ag-ipaparungtal na Kasulatan no panon nen Jehova ya impasabi iya ed si Enoc. Anggaman kuan, sakbay na impatey nen Enoc, sikatoy apaseguroan ed panangabobon na Dios, tan maseguro itayo a sikatoy nodnonoten nen Jehova diad kikioli.

Aligen so Pananisia nen Enoc

Matukotukoy a naalig tayo so pananisia na saray maridios a totoo. (Hebreos 13:7) Lapu ed pananisia et nanlingkor si Enoc bilang say inmunan matoor a propeta na Dios. Say mundo ed panaon nen Enoc so mipadpara ed sikatayo​—marawal, mabanday, tan agmaridios. Anggaman ontan et miduma si Enoc. Sikato so walaan na tuan pananisia tan sakey ya alimbawa na maridios a debosyon. On, sikatoy inikdan nen Jehova na importantin mensahe na panangukom a kaukolan ya iyabawag, ingen sikato met so pinabiskeg ton mangiproklama’d satan. Sipapakpel a sinumpal nen Enoc so kimey to, tan sikatoy tinalima na Dios diad arap na isusumpay kabusol.

No mangagamil itayo na pananisia a singa si Enoc, pabiskegen itayo nen Jehova a mangiyabawag ed mensahe to diad sarayan kaunoran ya agew. Tulongan to itayo ya onarap a sipapakpel ed isusumpa, tan say maridios a debosyon tayo et pagmaliwen to itayon nidumaruma ed saray agmaridios. Say pananisia so ontulong ed sikatayo a manakar a kaibay Dios tan onkiwas itayo ed paraan a mamaliket ed puso to. (Uliran 27:11) Lapud pananisia, tinmalona si matunong ya Enoc ed impanakar a kaiba nen Jehova diad sakey a mundon agmaridios tan ontan itayo met.

[Kahon ed pahina 30]

Kasin Angaon so Biblia Manlapud Book of Enoch?

Say Book of Enoch so walaan na makapaduaruwan autentisidad tan palson inaon a sulsulat a teksto. Satan so palson nisisiglaot ed si Enoc. Nayarin pinawala legan na komadua tan inmuna iran siglo K.K.P, satan so koleksion na alablabas tan agmaawaran iran mito na Judio, a mapatnag a produkto na masoliwet a panangisalaysay ed antikey ya impanukoy na Genesis nipaakar ed si Enoc. Diad sayan katuaan lambengat et magenap la parad saray manangaro na apuyanan a Salitay Dios pian ipulisay itan.

Diad Biblia, say libro na Judas lambengat so kawalaan na saray mapropetikon salita nen Enoc: “Nia, say Katawan onladia a tarok to so saray samplon libolibo a sasantos to, a mangukom ed ganagana, tan mangipatnag na katuaan ed saray mangaruksa a nipaakar ed mangaruksan gawa ra, tan ganagana a bengatla ya ambelat ya agagamil a saray maruksan managkasalanan sinalsalita ra sumpa ed sikato.” (Judas 14, 15) Ipipilit na dakel ya iskolar a say propesiya nen Enoc sumpad saray agmaridios a kapanaonan to so direktan inaon manlapud Book of Enoch. Posibli kasi ya inusar nen Judas so agnapanmatalkan a libron walaan na makapaduaruwan autentisidad bilang basiyan to?

Agniparungtal ed Kasulatan no panon so impakaamta nen Judas ed propesiya nen Enoc. Nayarin sikato lambengat so angaon manlapud kaslakan lan napangibasiyan, say napanmatalkan a tradisyon a nipatawir manlapud inmuna-una lan panaon. Mapatnag ya ontan met so ginawa nen Pablo sanen binitla ton si Jannes tan Jambres iramay agkabat a managsalamangka ed korte nen Faraon a sinmumpa ed si Moises. No say managsulat na Book of Enoch so walaan na ontan a klase na kadaanan a napangibasiyan, akin ya agtayo iyabuloy itan ed si Judas?a​—Exodo 7:11, 22; 2 Timoteo 3:8.

Ag-importantin pamaakaran no panon a naawat nen Judas so impormasyon nipaakar ed mensahe nen Enoc ed saray agmaridios. Say inkanapanmatalkan na satan so pruebaan na katuaan a si Judas et nansulat panamegley na puyan na Dios. (2 Timoteo 3:16) Sikatoy inwanwan na masanton espiritu na Dios ta pian agto makapangibaga na bengatlan aliwan tua.

[Paimano ed leksab]

[Litrato ed pahina 31]

Sipapakpel ya impasabi nen Enoc so mensahe nen Jehova