Balon Klase na Naakan

ANTAM no anto tay dodokdoken na totoo? Singa itan snow, ya amputi tan pino. Balet aliwa itan ya snow, sakey itan a klase na naakan.

Manga sakey bulan ni labat sanen tinaynan na saray Israelita so Ehipto tan akasabi rad desierto. Daiset labat so naakan diman kanian nanreklamo ira: ‘Komon ta pinatey kami la nen Jehova diman ed Ehipto. Mas maong ni diman ta naakan mi labalabay mi.’

Kanian imbaga nen Jehova: ‘Manpauran ak na naakan manlapud tawen.’ Kaimbuasan to, nen anengneng na saray Israelita itan, nantetepetan ira: ‘Anto ya?’

Inkuan nen Moises: ‘Saya so naakan ya inter nen Jehova.’ Tinawag da itan ya MANA. Say taway to et singa bibingka ya nandilo.

‘Ala yo labat so sarag yon naakan,’ so imbaga nen Moises. Kanian ontan so gagawaen da kada kabuasan. Insan no onaagew la, say keran mana ed dalin et natunaw.

Inkuan met nen Moises: ‘Anggapoy mangikekera na mana parad onsublay ya agew.’ Balet agdinmengel iray arum. Antam no antoy agawa? Kaimbuasan to, say mana ya inkekera da et abigis tan binmanget!

Balet imbaga nen Jehova a kada komanem ya agew et mangala ra na doblen karakel na mana. Tan imbaga to ni ya mangikera ira na parad ontumbok ya agew, ta anggapoy napelag ya mana ed komapiton agew. Et nen angikera ira na mana para ed komapiton agew, ag-itan abigis tan agbinmanget! Sakey lamet iyan milagro!

Diad dakel a taon ya walad desierto iray Israelita, pinakan ira nen Jehova na mana.