Gansa ya Uleg

NENGNENG mo tay akaputipot ed poste. Singa tuan uleg awa? Ingganggan nen Jehova si Moises ya iyan itan ed sakey ya poste pian nanengneng na totoo tan manbilay ira. Balet tuan uleg iratay walad dalin. Kineketket da ray totoo kanian ompapatey ira. Antam no akin?

Ta nanreklamo iray Israelita ed Dios tan ed si Moises. Imbaga ra: ‘Akin et impaway mo kami ed Ehipto pian ompatey ed desierto? Anggapoy naakan tan danum dia. Onsasawa kami lad sayan mana.’

Balet say mana et mananam. Mamilagro itan ya inter nen Jehova ed sikara. Tan mamilagro to met iran inikdan na nainum. Pero agda amtay misalamat ed impangasikaso na Dios ed sikara. Kanian angibaki si Jehova na madeta iran uleg pian dusaen iray Israelita. Kineketket ira na saray uleg, tan dakel so inatey.

Akikasi ray totoo ed si Moises: ‘Nankasalanan kami nen nansalita kami sumpad si Jehova tan sumpad sika. Ipikasim pad si Jehova ya ekalen to la irayan uleg.’

Kanian impikasi nen Moises iray totoo. Tan sikatoy ingganggan nen Jehova ya manggaway gansa ya uleg. Iyan to itan ed poste pian siopaman ya naketket et onnengneng ed saya. Ginawa nen Moises so imbaga na Dios. Tan saray totoon aketket ya onnengneng ed gansan uleg et onabig.

Walay naaralan tayo ed saya. Amin tayo et singa saray Israelitan aketket na saraman ya uleg. Ontatatken, mansasakit, tan ompapatey tayo ta say inmunan atateng tayo ya si Adan tan Eva, et imbeneg day Jehova. Balet nanggaway paraan si Jehova pian makapambilay tayo a tuloytuloy.

Imbaki nen Jehova so Anak ton si Jesu-Kristo ed dalin. Si Jesus et impasak ed sakey a poste, ta say amta na totoo et sikatoy mauges. Balet diad tua et inter nen Jehova si Jesus pian niliktar itayo. No onnengneng tan ontumbok tayo ed sikato, makapambilay tayo a tuloytuloy. Dakel ni naaralan tayo ed saya diad ontumbok.