Inter nen Jehova Iray Ganggan To

MANGA duay bulan kayarin tinmaynan iray Israelita ed Ehipto, akasabi rad Palandey Sinai, ya tatawagen met a Horeb. Dia may akitongtongan nen Jehova ed si Moises manlapud mandarlang a kiew. Tan dia nanayam ya agano iray totoo.

Legan ya manaalagar ed leksab iray totoo, tinmatdang si Moises ed palandey. Diman ed toktok na palandey, imbaga nen Jehova ed si Moises ya labay Ton sikatoy unoren na saray Israelita tan magmaliw iran pinilin totoo To. Linmeksab si Moises tan imbaga to iya ed saray Israelita. Tan imbaga da ya unoren day Jehova lapud labay dan sikaray magmaliw a totoo to.

Walay nikadkaduman ginawa nen Jehova. Pinaasewek toy palandey tan nampakarol na maksil. Sikatoy akitongtong met ed saray totoo: ‘Siak si Jehova a Dios yo, ya angipaway ed sikayo ed Ehipto.’ Insan ingganggan to: ‘Agkayo mandadayew ed arum a dirios likud ed siak.’

Inikdan na Dios iray Israelita na siamera nin ganggan. Manggiwgiw iray totoo. Imbaga dad si Moises: ‘Sika lay misalita, ta natatakot kami no mitongtong so Dios ed sikami, ompano ompatey kami.’

Kayari na saya et imbaga nen Jehova ed si Moises: ‘Tatdang ka ed palandey. Iter ko ed sika iray tapyas na bato ya angisulatan ko ed ganggan ya labay kon gawaen na saray totoo.’ Inunor itan nen Moises tan nansiansia dimad palandey ed loob na 40 ya agew tan labi.

Dakdakel ya ganggan so inter na Dios. Insulat irayan amin nen Moises. Inter met na Dios so duaran tapyas na bato ed si Moises. Dia insulat a mismo na Dios so Samploran ganggan ya imbaga tod saray totoo.

Say Samploran Ganggan et importantin maong. Ontan met ed arum ni ran ganggan ya inter na Dios ed saray Israelita. Sakey ed saraya et: ‘Arom si Jehova a Dios mo ed interon pusom, interon nonot, interon kamarerwa tan ed interon biskeg mo.’ Tan say sakey ni et: ‘Arom so kaparam a too a singa ed sikan dili.’ Imbaga na Anak na Dios a si Jesu-Kristo, a saya so duaran sankaimportantian a ganggan ya inter nen Jehova ed Israel.