Balitok a Baka

AGI! Nanenengneng moy gagawaen da? Manpipikasi rad sakey ya baka! Akin ey?

Sanen abayagan si Moises ed tagey na palandey, imbaga na totoo: ‘Agtayo amta no antoy agawad si Moises. Kanian manggawa tayoy dios ya mangipaway ed sikatayo ed sayan lugar.’

‘Sige, ekal yo ray balitok ya ikaw yo tan iter yod siak,’ so kuan nen Aaron ya kuya nen Moises. Et tinunaw nen Aaron iratan tan ginawa ton balitok odino gold ya baka. Tan imbaga na totoo: ‘Saya so Dios tayo, ya angipaway ed sikatayo diad Ehipto!’ Insan nanliliket iray Israelita, tan indayew da may baka.

Sanen anengneng nen Jehova iya, nampasnok a maong. Kanian imbaga tod si Moises: ‘La ka, leksab ka. Ta saray totoo et manggagaway mauges. Alingwanan da ray ganggan ko tan dinmakmomo rad balitok a baka.’

Nanapuran inmepas si Moises. Tan nen asingger la, anengneng to ray totoo ya mangakansion tan mansasayaw ed paliber na balitok a baka! Nampasnok ya maong si Moises kanian imbantak toy duaran tapyak a bato ya akasulatan na ganggan, tan amisimisi itan. Insan to inala may ginawa ran balitok a baka, tinunaw to, tan tinemek ton singa pulbo.

Mauge-uges so ginawa ra. Kanian ingganggan nen Moises so arum a lalaki ya alaen iray espada ra. ‘Kaukolan ya ompatey iray mauges a totoon nandayew ed balitok a baka,’ kuan nen Moises. Tan 3,000 ya totoo so pinapatey da! Agta ipapanengneng na saya a si Jehova labat so nepeg tayon dayewen, tan aliwan saray palson dirios?