Nansalita so Sakey ya Asno

AKANENGNENG ka lay asno odino donkey ya mansasalita? Ompan ibagam ya: ‘Andi ni, ta agmakapansalita iray ayep.’ Balet, ibabaga na Biblia ya walay sakey ya asnon nansalita. Amtaen tayo no panon itan ya agawa.

Asingger lan makasabi iray Israelita ed dalin na Canaan. Si Balak ya ari na Moab et antakot ed sikara. Kanian, impatawag toy sakey ya mautek a laki a manngaray Balaam pian isumpa ira. Impormisa nen Balak ed si Balaam ya ikdan toy dakel a kuarta, kanian linmugan si Balaam ed asno to tan nila toy Balak.

Aglabay nen Jehova ya isumpa nen Balaam so totoo To. Kanian angibaki na anghel ya aka-espada pian onsara ed dalan. Agnanengneng nen Balaam so anghel, balet nanengneng na samay asno. Kanian papaliisan na asno so anghel anggad indukol to lad dalan. Mamapasnok ya maong si Balaam, tan pinekpek toy asno to.

Insan pinansalita nen Jehova so asno: ‘Antoy kasalanan kod sika, akin et pepekpeken mo ak?’ so intepet na asno.

‘Ta lulukoen mo ak. No wala labat lay espadak, apatey ta ka la!’ kuan nen Balaam.

‘Ginawak la yad sika nensaman sirin?’ so intepet na asno.

‘Andi ni,’ so ebat nen Balaam.

Insan impanengneng nen Jehova ed si Balaam so anghel ya walay espada to tan akaalagey ed dalan. Imbaga na anghel: ‘Akin et pinekpek mo so asno? Sasaraan koy dalan mo ta pian agmo nisumpa so Israel. No agpinmaliis so asnom, ompan apatey ta ka la, balet agko sakitan so asnom.’

Imbaga nen Balaam: ‘Nankasalanan ak. Agko amta ya wadtan kad dalan.’ Pinaalis la na anghel si Balaam, tan akinengneng ed si Balak. Sinali to nin siansia ya isumpa so Israel, balet say agawa et amitlon impabendisyonan ed sikato nen Jehova so Israel.