Sinmabi si Jesus Bilang Ari

KAYARIN pinaabig nen Jesus so duaran bulag, sikatoy akasabid melag a baryo ya asingger ed Jerusalem. Imbaga tod duaran disipulo to: ‘Loob kayod baryo tan naromog yoy sakey ya asno. Ukbaran yo tan iyakar yod siak.’

Insan linmugan ed satan ya asno si Jesus paarap ed Jerusalem. Nen asingger lad syudad, dakel so totoon inmabet ed sikato. Tan imbilkag na dakel sikara so latop a kawes da diad dalan. Saray arum et namputer na sanga na palma. Inyan da met iraya ed dalan, tan inyeyag da: ‘Narayew so arin onsasabi ed ngaran nen Jehova!’

Nensaman, saray balon ari ed Israel et onlulugan ed asno paarap ed Jerusalem pian nanengneng na totoo. Kanian ontan so ginawa nen Jesus. Tan labay na sarayan totoo a magmaliw ya ari da si Jesus. Balet, aliwan amin et malabay. Nanengneng tayo iya sanen linmay Jesus ed templo.

Diman et pinaabig to iray bulag tan lupoy. Sanen anengneng iya na ugugaw, indayew day Jesus. Balet nampasnok iray saserdote, tan imbaga rad si Jesus: ‘Narerengel moy ibabaga na ugugaw?’

‘On,’ so ebat nen Jesus. ‘Agyon balot sirin abasa: “Manlapud sangi na saray kapangiyanak tan mansususo et angawat ka na panangidayew?”’ Kanian intultuloy na ugugaw ya indayew si Jesus.

Labay tayon aligen iraman ya ugugaw awa? Nayarin sebelan itayo na arum ya itongtong so nipaakar ed panarian na Dios. Balet itultuloy tayon ibagad arum so marakdakep ya gawaen nen Jesus parad totoo.

Pero agni ginmapon nan-ari si Jesus sanen wadiad dalin. Kapigan sirin so pan-ari to? Labay itan ya naamtaan na saray disipulo. Tan saya so onsublay ya basaen tayo.