Tinmakas si David

SANEN apatey nen David si Goliat, sikatoy inawit na manunan opisyal na sundalo ed si Saul, a say ngaran to et Abner. Aliketan a maong si Saul ed sikato. Tan ginawa toy David ya opisyal na saray sundalo to tan impanayam to lad palasyo to.

Aminsan, kapawil na saray sundalon akilaban ed saray Filisteo, angansion iray bibii: ‘Si Saul amatey na nilibo, balet si David et amatey na samplon libo-libo.’ Akaibeg si Saul ta mas pinagalangan day David nen say sikato. Agbalet akaibeg so anak nen Saul a si Jonatan. Inad-aro toy David, tan inad-aro met nen David si Jonatan. Kanian impormisa da ya anggan antoy nagawa et lanang iran sankaaro.

Maong ya mantogtog na arpa si David, tan labalabay itan ya dengelen nen Saul. Balet sakey ya agew, lapud ibeg nen Saul, sikatoy akagawa na mauges. Legan ya mantotogtog si David, inala toy duyok to tan inkuan to: ‘Ipanek kod padir si David!’ Pero akalikir si David. Tan pinidua to, balet akalikir lamet. Amta la natan nen David ya kaukolan toy manalwar.

Natandaan mo ni may pormisa nen Saul? Imbaga to ya ipaasawa toy anak to ed lakin makapatey ed si Goliat. Imbagan siansia nen Saul ed si David ya sarag to lan naasawa so anak ton si Mical, basta makapatey na 100 ya kalaban a Filisteo. Agayla! Talagan labay nen Saul ya napatey na saray Filisteo si David. Balet agda apatey, kanian inter lanlamang nen Saul so anak to ed si David.

Aminsan, imbaga nen Saul ed si Jonatan tan ed amin ya aripen to ya labay ton pateyen si David. Balet imbaga nen Jonatan ed ama to: ‘Agyo tan gagawaen. Anggapoy mauges ya ginawa tod sikayo. Amin ingen ya ginawa to et parad pankaabigan yo. Impusta toy bilay to nen pinatey toy Goliat, tan aliketan kayo nen anengneng yon analo.’

Dinengel nen Saul so anak to, tan impormisa ton agto la sakitay David. Impatawag toy David, tan singa dati et nanlingkor lamet ed palasyo to. Pero aminsan, legan a mantotogtog si David, sinali lamet nen Saul ya ipanek si David ed padir. Balet akalikir si David. Komatlon beses la ya! Amta la natan nen David ya kaukolan toy ontakas!

Diad saman a labi, sinmempet si David ed abung to. Balet angibaki si Saul na mamatey ed sikato. Amta nen Mical so plano nen ama to. Kanian imbaga tod asawa to: ‘No agka ombatik ed sayan labi, nabuas inatey ka la.’ Kanian pinatakas nen Mical si David ed bintana. Manga pitoy taon ya nanamot-amot si David pian agnaanap nen Saul.