Si David tan si Saul

Nen atalo nen David si Goliat, sikatoy ginawa nen Arin Saul ya lider na saray sundalo to. Lanang ya mananalo si David no migi-guerra kanian nagmaliw ya sikat. Kada no onsempet lay David ya nanlapud guerra, onsayaw iray bibii tan ikakansion da: ‘Nilibo so pinatey nen Saul, tan samplon libolibo so pinatey nen David!’ Lapud satan, nainggit ya maong si Saul ed si David, kanian labay ton pateyen.

Marundunong ya mantogtog na arpa si David. Aminsan, legan ya mantotogtog si David na arpa parad si Saul, tinira nen Saul na gayang. Maong labat ta alikiran nen David, tan pinmanek ed dingding so gayang. Kayari to ’tan, aminpiga nin sinali nen Saul ya pateyen si David. Kanian tinmakas lay David tan nanamot-amot ed desierto.

Impila nen Saul so 3,000 ya sundalo to pian anapen tan pateyen si David. Aminsan, linmoob si Saul ed kuweba ya panaamotan nen David tan saray bataan to. Inyesaes dad si David: ‘Patey mo lay Saul, pagkakataon mo la ’ya.’ Marendeen ya inmasingger si David ed kawalaan nen Saul. Ag-alikas na ari ya pinutot nen David so saloy na kawes to. Pero akonsiensia si David ta agto nirespeto so ari ya nilanaan nen Jehova. Aga pinmayag si David ya sakitan na saray bataan to si Saul. Kapaway nen Saul ed kuweba, inyeyag nen David ya sarag to la komon ya pateyen si Saul pero agto ginawa. Tundaan la kasi nen Saul ya usilan si David?

Andi. Labay to nin siansia ya pateyen. Aminsan ya labi, legan ya nanaugip si Saul tan saray sundalo to, agnampalikas ya linmoob si David tan say kaanakan ton si Abisai ed kampo da. Pati say guardia nen Saul ya si Abner et nanaugip. Imbaga nen Abisai: ‘Pagkakataon tayo la ’ya. Anto ey, pateyen ko la?’ Imbaga nen David: ‘Si Jehova lay akauley ed si Saul. Alaen ta labat tay gayang to tan pananginan toy danum insan ta la onla.’

Linmay David ed palandey ya ditan et sankanengneng toy kampo nen Saul. Inyeyag nen David: ‘Abner, akin et agmo babantayan so ari? Kulaan na gayang tan pananginay danum nen Saul?’ Abirbir nen Saul so boses nen David kanian imbaga to: ‘Pagkakataon mo lan pateyen ak nen niman pero agmo ginawa. Antak ya sika so onsublay ya ari na Israel.’ Kayari to man, pinmawil lay Saul ed palasyo to. Balet aliwan amin ya kapamilya nen Saul et kabusol day David.