Si Jonas tan say Baleg ya Sira

NENGNENG mo yay laki. Nalelener la! Tan nitan lay sira ya mangakmon ed sikato! Antam no siopa yan laki? Say ngaran to et Jonas. Nengnengen tayo no akin ya ontay agawad sikato.

Si Jonas et propeta nen Jehova. Agano ni labat ya inatey si propeta Eliseo sanen imbaga nen Jehova ed si Jonas: ‘La kad baleg a syudad na Ninive. Katongtong mo ra ta sobra lay uges da.’

Balet aglabay nen Jonas so onla. Kanian linmugan ed sakey ya barko a paarap ed duman direksion. Ag-agustoan nen Jehova so ginawa to, kanian angidapo na maksil a bagyo. Diad kakasil to, ngalngali onlereg so barko. Ataktakot iray akalugan tan kinmerew iray tulong ed saray dios da.

Et impatua nen Jonas: ‘Manlilingkor ak ed si Jehova, say Dios a nanggawad tawen tan dalin. Imbatikan koy pagagawa tod siak.’ Kanian intepet da: ‘Antoy gawaen mid sika pian ontunday bagyo?’

‘Ibuntok yo ak ed dayat,’ so kuan nen Jonas. Agda labay ya gawaen itan, balet lapud onggragrabe so bagyo, apilitan iran mangibuntok ed sikato. Tan tampol ya tinmunday bagyo tan dinmeen so dayat.

Nen onlelereg lay Jonas, sikatoy inakmon na baleg ya sira. Balet ag-inatey si Jonas. Sikatoy walad eges na sira diad loob na taloran agew tan taloran labi. Magbabawi si Jonas ta agto inunor si Jehova tan aglinmad Ninive. Kanian antam no antoy ginawa to?

Nampikasi ed si Jehova. Insan ingganggan nen Jehova so sira ya iyula si Jonas diad gilig na dayat. Kayari na saman, linmay Jonas ed Ninive. Di ba ibabangat na saya ya importantin unoren so pagagawa nen Jehova?