Say Sampot a Maong ya Ari ed Israel

WALOY taon ni labat nen Josias sanen nagmaliw ya ari na duaran tribu na Israel. Uga-ugaw ni. Kanian diad gapo et tinulongan na saray mas matatken nen say sikato pian man-ari.

Sanen pitoy taon lan ari si Josias, ginapoan ton inanap si Jehova. Tinumbok toy alimbawa na saray maong ya ari a singa si David, Jehosafat, tan Hezekias. Insan nen tin-edyer ni labat si Josias, walay ginawa to ya kaukolay pakpel.

Diad andukey a panaon, mauges so dakel ya Israelita. Mandadayew irad aliwan tuan dios. Kanian ingganggan nen Josias iray totoo to pian deralen iray idolo. Baleg iyan trabaho ta dakel so mandadayew ed aliwan tuan dios. Diad litrato et nanengneng moy Josias tan saray totoo to ya manmamaso ed saray idolo.

Kayari to, angiganggan si Josias na taloran lalaki ya mangasikaso ed pangapiger na templo nen Jehova. Wala ray kinolektan kuarta ed totoo tan inter ed sarayan lalaki parad gastos ed pampaalagey. Legan iran mangaapiger ed templo, nalmo na atagey a saserdoten si Hilkias so libro na ganggan ya impaisulat nensaman nen Jehova ed si Moises. Importante itan ya libro tan abayag lan nababalang.

Inawit dad si Josias so libro tan impaibasa to. Legan ton ondedengel, anengneng ton ag-uunoren na totoo so ganggan nen Jehova. Kanian maer-ermen si Josias, tan pinilat toy kawes to ya singa nanenengneng mod litrato. Imbaga to: ‘Mamapasnok si Jehova ed sikatayo ta ag-inunor na atateng tayo iray ganggan ya akasulat ed sayan libro.’

Ingganggan nen Josias si Hilkias ya amtaen no antoy gawaen nen Jehova ed sikara. Linmay Hilkias ed si propetesan Hulda, tan nantepet. Et oniay impaibaga nen Jehova: ‘Nadusa so Jerusalem tan amin a totoo lapud nandayew irad aliwan tuan dios tan napnoy mauges so dalin. Balet maong so ginawam, Josias, kanian agko dusaen so totoo anggad mabilay ka ni.’