Si Daniel Diad Ungib na Leon

AGI, nengneng mo! Walad ungib na leon si Daniel. Balet akin et agda ngangalngalen? Siopay angibantak ed sikato ditan? Nengnengen tayo.

Say sinmublay ya ari ed Babilonia et si Dario. Labalabay toy Daniel ta maomaong tan matattalino. Pinili toy Daniel a magmaliw ya opisyal ed panarian to. Balet dakel so akaibeg ed si Daniel, kanian antam no antoy ginawa da?

Linma rad si Dario tan imbaga da: ‘Nantotongtongan mi, O ari, a kaukolan moy manggawa na ganggan ya diad loob na 30 agew et sika labat so pampikasian. No walay ag-ontulok ed saya, ibuntok ed ungib na saray leon.’ Ag-amta nen Dario no akin ya ipapagawa da iyan ganggan. Balet, agustoan to iyan ideya, kanian inmabuloy. Natan et agto la nababawi.

Nen abalitaan nen Daniel iyan ganggan, sikatoy sinmempet tan nampikasi, a singa dati to lan gagawaen. Amta na saramay mauges a lalaki ya ag-ontundan manpikasi si Daniel ed si Jehova. Malikeliket ira ta abalang da et epektibo so plano dan pamatey ed si Daniel.

Nen naamtaan nen Dario no akin ya impagawa na sarayan lalaki so ganggan, sikatoy nagbabawi. Pero agto la nauman so ganggan, kanian apilitan ya impaibuntok si Daniel ed ungib na saray leon. Balet imbaga na ari ed si Daniel: ‘Komon ta iliktar ka na Dios a panlilingkoran mo.’

Ansakit so loob nen Dario, tan agmakaugip ed saman a labi. Kaimbuasan, nanapuran linmad ungib na leon. Sikato tay walad tagey. Inyeyag to: ‘Daniel, lingkor na mabilay a Dios! Kasin inliktar ka na Dios mo?’

Et inmebat si Daniel: ‘Imbaki na Dios so anghel to tan pinepetan to ray sangi na leon pian agda ak nangalngal.’

Malikeliket so ari. Ingganggan ton agwaten day Daniel ed ungib. Insan, impaibuntok tod ungib na saray leon iramay mauges ya lalaki. Antis ni ran makadapo ed ungib, nginangalngal la ra na saray leon.

Kayari na saya, nansulat si Dario ed interon panariean to: ‘Nepeg a respetoen na amin a totoo so Dios nen Daniel. Dakel so ginawa ton milagro. Inliktar toy Daniel pian agnabuag na saray leon.’