Manmatalek ed Tulong na Dios

NILIBO-LIBON totoo so sinmempet ed Jerusalem. Balet kasabi rad man, ageray so Jerusalem. Anggapoy manaayam diman. Kanian kaukolan day manpaalagey na balo.

Say unonan ipaalagey da et say altar. Ditan iyaapay odino ireregalo ed si Jehova iray ayayep. Kayari na pigaran bulan, ginapoan da lan ipaalagey so templo. Balet sinebelan ira na saray kalaban da. Tinaktakot da ra. Insan, sinugsogan na sarayan kalaban so balon ari na Persia pian iganggan ton itunda ray pampapaalagey da.

Linmabas so 17 a taon manlapu nen sinmempet iray Israelita. Imbaki nen Jehova si propetan Aggeo tan Zacarias pian bagaan iray totoo ya ituloy day manpaalagey. Nanmatalek ed tulong na Dios iray totoo, tan inunor da ray propeta. Intuloy day nampaalagey anggano sesebelan ira.

Kanian nila ira nen Tatenai ya opisyal na Persia tan tinepet to no siopay angiganggan ed sikaran ipaalagey so templo. Inkuan na saray Israelita ya sanen wala rad Babilonia, imbaga nen Arin Ciro: ‘Sempet ki lad Jerusalem, tan ipaalagey yo so templo nen Jehova a Dios yo.’

Angipawit natan na sulat si Tatenai ed Babilonia tan tinepet to no wala kasi ontan ya imbaga nen Ciro nensaman. Ag-abayag, inmebat so balon ari na Persia. Imbaga ton talagan ingganggan nen Ciro itan. Onya ni insulat na ari: ‘Paulyan yo ray Israelitan manpaalagey ed templo na Dios da. Tan tulongan yo ra.’ Diad loob na apat taon, asumpal so templo tan malikeliket iray Israelita.

Linmabas so ngalngali 48 a taon manlapu nen asumpal so templo. Mairap so bilay na totoo ed Jerusalem, aliwliwa so syudad tan templo na Dios. Diad Babilonia, akabatan na Israelitan si Esdras a kaukolan ya apigeren so templo. Kanian antam no antoy ginawa to?

Nila nen Esdras si Artaxerxes ya ari na Persia. Tan sayan maong ya ari et inikdan toy Esdras na dakel a regalo ya awiten ed Jerusalem. Insan nampaibay Esdras ed saray Israelitan walad Babilonia pian naawit da irayan regalo ed Jerusalem. Manga 6,000 a totoo so kaiba to. Dakel so awit dan pilak, balitok, tan arum ni ran mablin bengatla.

Mapaga si Esdras ta dakel so mauges a totoo ed dalan. Ompan alaen da ray pilak tan balitok da, tan pateyen da ra. Kanian tinawag to ray totoo ya singa nanenengneng mod litrato. Insan ira nampikasi ed si Jehova pian protektaan to rad dalan.

Sikaray inasikaso nen Jehova. Apat bulan iran nambyahe, tan akasabi rad Jerusalem. Agta ipapanengneng na saya a sarag nen Jehova ya protektaan iray manmamatalek ed sikato?