Binautismoan nen Juan si Jesus

NENGNENG mo tay malapati ya ondadapo ed ulo na laki. Sayan laki et si Jesus. Manga 30 so taon to. Tan satay kaiba to et si Juan. Natandaan mo ni may impasyar nen Maria ed si Elizabet tan ginmalaw so ugaw ed eges nen Elizabet? Si Juan iman ya ugaw. Balet anto yay gagawaen natan di Jesus tan Juan?

Inlereg nen Juan si Jesus diad Ilog Jordan. Ontan so gagawaen ed toon babautismoan. Unona et ilereg ed danum, insan agwaten. Lapud ontan so gagawaen nen Juan ed saray totoo, sikatoy tinawag ya Juan a Managbautismo. Pero akin et binautismoan nen Juan si Jesus?

Ta kinerew itan nen Jesus. Babautismoan nen Juan iray totoon labay dan ipanengneng ya magbabawi rad saray kasalanan da. Balet, anggapoy kasalanan nen Jesus. Kanian akin et manpabautismo? Nengnengen tayo.

Antis ya linmay Jesus ed si Juan, sikatoy sakey a karpentero. Say asawa nen Maria a si Jose et karpentero, tan imbangat toy Jesus. Balet, ag-imbaki nen Jehova so Anak to diad dalin pian magmaliw a karpentero. Walay espisyal a trabahon ipapagawa na Dios, tan asabi lay panaon pian igapo itan nen Jesus. Kanian pian ipanengneng ya gapoan to lan gawaey linawa na Ama to, nampabautismo ed si Juan. Kasin aliketan so Dios ed saya?

On, ta nen kaimwas nen Jesus ed danum, walay boses manlapud tawen ya angibaga: ‘Saya so Anako, say inad-arok, ya pakaliliketan ko.’ Insan, singa linmukas so tawen tan dinmapo ed si Jesus iyan malapati. Balet aliwa yan tuan malapati. Diad tua et masanton espiritu iya na Dios.

Natan et dakel so kaukolan ya nodnonoten nen Jesus, kanian linmad mareen ya pasen diad loob na 40 ya agew. Diman et inasinggeran nen Satanas. Amitlon tinukso nen Satanas si Jesus pian ag-unorey ganggan na Dios. Balet, ag-itan ginawa nen Jesus.

Kayari to, linma lay Jesus tan akabat to si Andres, Pedro (tatawagen met ya Simon), Felipe, tan Natanael (tatawagen met ya Bartolome). Sarayan lalaki et nagmaliw ya unonan papatumbok odino disipulo to. Si Jesus tan sarayan balon disipulo to et linmad distrito na Galilea. Dinmalan irad Cana, ya lugar di Natanael. Tan inmatendi rad baleg a bansal, tan ginawa to so sankaunaan ya milagro to. Antam no anto itan? Ginawa ton alak so danum.