Ginmapo si Jesus ya Nananap na Disipulo

Kayari na 40 agew ed kalawakan tan antis ya pinmawil ed Galilea, linmay Jesus ed si Juan ya nambautismo ed sikato. Nen manasingger lay Jesus, oniay imbaga nen Juan ed saray wadman: “Nengneng yo, say Kordero na Dios a mangekal ed kasalanan na mundo! Saya imay tutukoyen kon: ‘Diad benegan ko et walay lakin onsasabi ya akauna la nen siak, ta sikatoy wala la sakbay ko.’” (Juan 1:29, 30) Anggano mas matatken ni Juan, amta ton nambilay lay Jesus bilang espiritu diad tawen.

Pigaran simba antis na satan, nen nampabautismoy Jesus, agsegurado si Juan no si Jesus so Mesias. Oniay inamin to: “Anggan siak et sikatoy agko kabat nensaman, balet ta say rason no akin a manbabautismo ak ed danum et pian sikatoy niparungtal ed Israel.”​—Juan 1:31.

Insalaysay nen Juan ed saray dumerengel to no antoy agawa nen binautismoan toy Jesus: “Anengneng koy espiritu ya onleleksab a singa malapati a nanlapud tawen, tan dinmapo itan ed sikato. Anggan siak et sikatoy agko kabat nensaman, balet imbagad siak na Dios ya angibaki ed siak a manbautismo ed danum: ‘Siopaman a nanengneng mon dapoan tan pansiansiaan na espiritu, sikato so manbautismo ed panamegley na masanton espiritu.’ Tan anengneng ko itan, tan tinasian ko a sikato so Anak na Dios.”​—Juan 1:32-34.

Kaiba nen Juan so duaran disipulo to diad tinmumbok ya agew nen sikatoy inasinggeran lamet nen Jesus. “Nengneng yo, say Kordero na Dios!” (Juan 1:36) Sarayan duaran disipulo nen Juan Bautista et tinumbok day Jesus. Say sakey ed sikara et si Andres. Nayarin say sakey et samay angisulat ed sayan agawa, ya Juan met so ngaran to. Sayan Juan ya anak nen Salome et nayarin kapinsan nen Jesus. Posiblin agi nen Maria si Salome ya asawa nen Zebedeo.

Nen linmingaw si Jesus tan anengneng toy Andres tan Juan ya ontutumbok ed sikato, intepet to: “Antoy aanapen yo?”

“Rabbi,” so intepet da, “iner so panaayaman mo?”

“Mila kayo, pian nanengneng yo,” so inyebat nen Jesus.​—Juan 1:37-39.

Manga alas kuatroy ngarem lad saman, tan akilad sikato si Andres tan Juan ed nakekeran oras diad saman ya agew. Eksayted si Andres nen anengneng toy agi ton si Simon, a tinawag met ya Pedro, tan inkuan tod sikato: “Aromog mi lay Mesias.” (Juan 1:41) Intagar nen Andres si Pedro ed si Jesus. Base ed sinmublay ya agawa, anengneng met nen Juan so agi ton si Santiago tan intagar tod si Jesus; balet, ag-impila nen Juan iyan detalye ed sulat to.

Diad sinmublay ya agew, anengneng nen Jesus si Felipe a taga Betsaida. Asingger iyad norte na Dayat na Galilea tan baley di Andres tan Pedro. Imbaga tod Felipe: “Magmaliw kan patumbok ko.”​—Juan 1:43.

Insan aromog nen Felipe si Natanael, ya tatawagen met ya Bartolome tan kuan to: “Aromog mi la imay tutukoyen ed sulsulat nen Moises, diad Ganggan, tan ed sulsulat na saray Propeta: si Jesus ya anak nen Jose, a taga Nazaret.” Manduaruwa si Natanael tan imbaga tod si Felipe: “Wala tay maong a too a manlapud Nazaret?”

“Gala, ta nengneng mo,” kuan nen Felipe. Nen anengneng nen Jesus si Natanael ya onaasingger, oniay inkuan to: “Nengneng yo, sakey a tuan Israelita, ya agmamapalikdo.”

“Panoy pakapikabat mod siak?” so intepet nen Natanael.

Inmebat si Jesus: “Antis kan tawagen nen Felipe, sanen wala kad silong na kiew ya igos et anengneng ta ka la.”

Mandinayew si Natanael tan inkuan to: “Rabbi, sika so Anak na Dios, sika so Ari na Israel.”

Intepet nen Jesus: “Lapud imbagak ya anengneng ta kad silong na kiew ya igos, manisia ka la? Makanengneng ka ni na angkakabaleg a bengatla nen saraya.” Inkuan to nid sikato: “Ibagak ed sikayoy tua, nanengneng yon akalukas so tawen, tan saray anghel na Dios et onsesegep tan oneepas ed Anak na too.”​—Juan 1:45-51.

Kayari na saya, tinmaynan ed Patar na Jordan si Jesus kaiba iray balon disipulo to, tan linma rad Galilea.