Nambangat si Jesus Diad Palandey

NENGNENG moy Jesus ya manbabangat diad palandey ed Galilea. Sarayay walad abay to et saray disipulo to. Nampili na 12 ed sikara pian magmaliw ya apostol. Saray apostol et espisyal ya disipulo nen Jesus. Antam so kangaranan da?

Wadtan si Simon Pedro tan say agi ton si Andres. Kaiba met so sanagin Santiago tan Juan. Wala ni sakey ya Santiago, tan sakey ya Simon. Duaran apostol so manngaran na Judas, si Judas Iscariote tan si Judas a tatawagen ya Tadeo. Kaiba met si Felipe tan Natanael (a tatawagen met ya Bartolome), tan si Mateo tan Tomas.

Kalapu dad Samaria, ginmapo lan nampulong si Jesus. Imbaga to: ‘Say panarian ed tawen et asingger la.’ Antam no anto tay panarian? Gobierno itan na Dios. Si Jesus so ari na satan. Sikatoy man-ari ed tawen tan mangiter na kareenan ed dalin. Gawaen na panarian na Dios ya balibalin paraiso so interon dalin.

Diad litrato, ibabangat nen Jesus so nipaakar ed panarian. Inkuan to: ‘Oniay nepeg a pampikasi yo, Ama min walad tawen, nagalang komon so ngaran mo. Onsabi komon so panarian mo. Nagawa komon so linawam diad dalin, a singa ed tawen.’ Say tawag na dakel ed saya et ‘Pikakasi na Katawan.’ Saray arum et tatawagen da iyan ‘Ama Mi.’ Kabisadom iyan pikakasi?

Ibabangat met nen Jesus iray totoo no panon dan tratoen so balang sakey. Imbaga to: ‘Gawa yod arum so labay yon gawaen dad sikayo.’ Di ba labay mon ontan so pantrato na arum ed sika? Kanian ibabaga nen Jesus ya dapat maong so pantrato tayod arum. Balibali anto no diad paraison dalin et ontan so gawaen na amin?