Ugaw ya Akaugip

AGI! Antoy agawad sayay ugaw? Nengneng mo! Sakey si Pablo ed saray ompapaway ed abung. Nanenengneng moy Timoteo? Naplag amo tay ugaw ed bintana!

Manpapaliwaway Pablo ed saray disipulo diad Troas. Amta ton mabayag to ra lamet ya napinengnengan ta onsipot la. Kanian kinatongtong to ra anggad pegley-labi.

Sayay ugaw a manngaray Eutico et akayurong ed bintana, tan akaugip. Kanian naplag manlapud komatlon grado! Abigla irayay totoo. Sanen inalsa da so ugaw, duga may inisip da. Inatey so ugaw!

Sanen anengneng itan nen Pablo, tinikleban tan nilakap to so ugaw. Insan to imbaga: ‘Agkayo mapaga. Abilay so ugaw!’ Sakey iyan milagro! Sikatoy binilay nen Pablo! Akaakis ed liket iray totoo.

Sinmegep ira lamet tan angan. Intuloy nen Pablo so akitongtong anggad palbangon. Balet seguradon agla inmugip si Eutico ed saman! Insan la linmugan ed barko si Pablo, Timoteo, tan saray kakaiba ra. Antam no iner so nila ra?

Mansampot lay komatlon impanbiahe nen Pablo, tan pasempet la. Diad sayan impanbiahe to et taloy taon a nanayam a bukor ed Efeso. Kanian mas andukey ni ya nen samay komaduan impanbiahe to.

Kaalis dad Troas, tinmundan agano so barko diad Mileto. Lapud asingger labat so Efeso, impatawag nen Pablo iray mamasiken ed kongregasyon ya onlad Mileto pian napitongtongan to ra diad sampot lan pankanawnawa. Sanen onalis lay barko, agaylay ermen dan amasipot ed si Pablo!

Akasabin siansia so barko ed Cesarea. Legan ya miaayam si Pablo ed abung na disipulo a si Felipe, pinasakbayan nen propeta Agabo si Pablo ya napriso no onlad Jerusalem. Tan ontan so agawa. Insan, kayarin apriso na duaran taon ed Cesarea, sikatoy impatawag na korte na Roma pian onarap ed si Cesar. Nengnengen tayo no antoy agawa sanen paarap lad Roma.