Parte 4

Ipapakabat Na Dios ed Sikatayo Iray Gagala To

1, 2. Panon tayon amta ya itatarok na Dios iray ebat ed saraman so sisimoon ya onkerew?

SAY sakey a maaron Dios so peteg a mangiparungtal na saray gagala to ed saray masimoon a mananap ed sikato. Itarok to ed maupapet iran totoo so ebaebat ed tepetepet a singa no akin ya inabuloyan to so kairapan.

² Ikuan na Biblia: “No anapen mo [so Dios], abuloyan to so inkasikato a naromog mo.” “Wala so Dios ed kata­wenan a Manangiparungtal na saray sekreto.” “Anggapo naani so gawaen na Soberanon Katawan a Jehova no agto ni imparungtal ed ariripen ton propeta so maamot a pamaakaran to.”​—1 Awaran 28:9; Daniel 2:28; Amos 3:7.

Iner so Kawalaan na Saray Ebat?

3. Iner so pakaromogan tayo no akin ya inabuloyan na Dios so kairapan?

³ Saray ebat ed saray tepet a singa no akin ya inabuloyan na Dios so kairapan tan no anto so gawaen to nipaakar ed atan et naromog ed kurit ya impuyan to parad kagunggunaan tayo. Atan a rekord et say Salita to, say Masanton Biblia. “Amin a Kasulatan so impuyan na Dios tan makagunggunan pakaaralan, pakasumalan, pakasimbawaan, tan pakapanontonan a sikato so wala ed katunongan, pian say too na Dios anggapo komon so pankulangan to, a nabangatan a maong ed amin a gawa a maabig.”​—2 Timoteo 3:16, 17.

4, 5. Anto so manggawa ed Biblia a nikadkaduman libro?

⁴ Tuan nikaduman libro so Biblia. Atan so mankarga na sankasustoan a rekord ed awaran na too tan onlabas ni ed inkapalsa na katooan. Atan met so wala ed bansag-ed-petsa, ta saray propesiya to so mitukoyan ed saray ebento ed panaon tayo tan ed asingger met ya arapen.

⁵ Anggapo so arum a libron walaan na ontan iran kredensiyal parad maawaran ya inkasusto. Alimbawa, pigpigaran manuskrito ed kadaanan a primera klasen managsulat so wala. Balet dakel iran manuskrito, arum et kabiangan tan arum et kumpleto, so wala ed Biblia: ngalngali 6,000 ed Hebreon Kasulatan (say 39 libro na “Daan a Sipan”) tan ngalngalin 13,000 ed Kristianon Griegon Kasulatan (27 libro na “Balon Sipan”).

6. Akin a makapanseguro itayon say Biblia natan et parehon tuloy a singa sanen impuyan itan na Dios?

⁶ Deniside na Makapanyarin-amin a Dios, ya angipuyan ed Biblia, a say tekstual a katooran to so nipreserba ed saraman a kopya na manuskrito. Kanian saray Biblia tayo natan so parehon tuloy a singa ed orihinal ya impuyan a sulsulat. Sananey nin bengatla ya ontulong ed sikatayon mangapresya ed saya et lapud arum ed saray kopya na manuskrito na Kristianon Griegon Kasulatan so abalang ed loob na sanlasus iran taon ed panaon na orihinal ya inkisulat. Saray pigaran kopya na manuskrito na kadaanan a sekular iran managsulat a wala ni so matalag a manpetsa ya angga ni ed pigaran siglo na orihinal iran otor.

Regalo na Dios

7. Panon kalaknab so sirkulasyon na Biblia?

⁷ Say Biblia so sankalaknaban a libron nibunog ed awaran. Ngalngali taloran bilyon iran kopya so inimprinta. Anggapoy arum a libron aka-asingger ed atan a bilang. Tan say Biblia ­odino ­saray kabiangan to so nipatalos ed ngalngalin 2,000 iran lenguahe. Kanian, akalkulan 98 porsiento ed populasyon na planeta tayo so makaromog ed Biblia.

8-10. Antoray arum a rason no akin a say Biblia so makanepegan na panangusisa tayo?

⁸ Maseguron say libron mangibabaga a nanlapud Dios tan walaan na amin ya akinpaway tan akindalem iran ebidensya na inka-autentisidad so makanepegan na panangusisa tayo.a Isalaysay to so gagala na bilay, say kabaliksan na kipapasen na mundo, tan no anto so itarok na arapen. Anggapo so arum a libron makagawa na ontan.

⁹ On, say Biblia so pitatalosan na Dios ed atooan a pamilya. Inwanwan to so inkisulat na atan diad panamegley na aktibon puersa to, odino espiritu, tekep na ngalngalin 40 totoo a nansulat. Kanian say Dios so mitotongtong ed sikatayo diad panamegley na Salita to, say Masanton Biblia. ­Insulat nen apostol Pablo: “Sanen inawat yo so sali­ta na Dios, a nadngel yo ed sikami, inako yo itan, ya aliwan bilang salita na totoo, noagta unong ed katuaan, bilang say salita na Dios.”​—1 Tesalonica 2:13.

¹⁰ Si Abraham Lincoln, say koma-16 a presidente na Estados Unidos, so anawag ed Biblia a “say sankaabigan a regalon inter na Dios ed too . . . No anggapo itan agtayo amta no anto so maptek manlapud mauges.” Sirin, anto so ibaga ed sikatayo na sayan superlatibon regalo nipaakar ed inggapo na kairapan, akin ya inabuloyan itan na Dios, tan anto so gawaen to ed atan?

[Saray paimano ed leksab]

[Litrato ed pahina 10]

Say Biblia, ya impuyan na Dios, so pitatalosan to ed atooan a pamilya