Libron Parad Sika?

“Say panggawa ed dakerakel a libro anggapo so anggaan,” imbaga itan nen Solomon ngalngalin 3,000 taon lay apalabas. (Eclesiastes 12:​12) Satan ya obserbasyon so matukoy natan nen say ed kapiganman. Nilikud ed kaslakan a klasika, nilibon balon libro so niiimprinta kada taon. Diad kinarakel na libron napanpilian, akin a nepeg yon basaen so Biblia?

DAKEL a totoo so manbabasa na saray libro balanglan pian naligliwa odino pian makaaral, odino anganko lapud parihon rason. Tua met itan ed panagbasay Biblia. Satan so makapaalagey, makaligliwa ni ingen a basaen. Balet say Biblia so mas ni nensay satan. Satan so nikadkaduman lapuan na pikakabat.​—Eclesiastes 12:​9, 10.

Eebatan na Biblia iray tepet ya abayag lan panuumamengan na totoo​—tepetepet nipaakar ed apalabas, kaplesan, tan ed arapen tayo. Dakel so manuumameng: Iner so nanlapuan tayo? Antoy gagala na bilay? Panon tayon naromog so liket ed bilay? Lawas kasin walay bilay ed dalin? Antoy itatarya na arapen parad sikatayo?

Say nantitipon a puersa na amin a paneknek a nipresinta’d dia so malinlinew a mangileletneg a say Biblia et susto tan autentiko. Nausisa tayo la a say praktikal a konseho to et makatulong ed sikatayo pian manbilay a makabaliksan tan maliket a kabibilay natan. Lapud saray ebat to nipaakar ed kaplesan et makapenek, maseguron saray ebat to nipaakar ed apalabas tan saray propesiya to nipaakar ed arapen so makanepegan na maalwar a panangimano.

No Panoy Pakagunggunaan a Tuloy

Dakel lan totoo so angigapon manbasa na Biblia balet ta tinmunda sanen naimano ran walaray kabiangan to a mairap a talosan. No naeksperiensiam la itan, walaray pigaran makatulong.

Mamili na napanmatalkan a patalos ed modernon-agew a lenguahe, a singa say New World Translation of the Holy Scriptures.a Arum a totoo so ginmapo diad pamabasa ed saray salaysay na Ebanghelyo na impanbilay nen Jesus, a saray makabat a bangat to, a singa saramay naromog ed Sermon ed Palandey, so mangisisindag na pirmin pakaamta ed inkatoo tan mangidadatak no panon tayon paaligwasen so kabibilay tayo.​—Nengnengen so Mateo kapitulo 5 ya anggad 7.

Likud ed panagbasan interaminti ed Biblia, makaibangat met so topikon metodo na panagaral. Lalanoren na saya so panganalisa ed ibabaga na Biblia ed partikular a tema. Nayarin nasurprisa kayo a makaamta no anton talagay ibabaga na Biblia ed saray tema a singa say kamarerwa, tawen, dalin, bilay, tan ipapatey, ontan met ed Panarian na Dios​—no anto itan tan no anto naani nagawaan to.b Walaan iray Tastasi nen Jehova na programan topikon panagaral na Biblia, a nitataryan libre. Nayari kayon manusisa nipaakar ed satan diad pansulat ed saray manangipalapag, ya uusaren so matukoy ya address a nilista ed pahina 2.

Kayari impangusisa da ed ebidensia, dakel a totoo so angikuan a say Biblia so nanlapud Dios, ya ipapaamta na Kasulatan bilang “Jehova.” (Salmo 83:18) Nayarin agkayo kombinsido a say Biblia et nanlapud Dios. Balet akin ya agmo usisaen a mismo? Matalek kami a kayari na sakey a prosesoy panagaral, panagdalepdep, tan anganko pakaeksperiensia ed praktikal a kablian na ag-onkupas a kakabatan a parad sikan mismo, naliknam a say Biblia so peteg a libron parad amin a totoo, tan nagkalalo ni​—libron parad sika.

[Saray paimano ed leksab]