Programa Pian Paaligwasen so Abilidad Bilang Managpaliwawa tan Managbangat

BALANGLAN ugaw ka ni odino maedad la, laki odino bii, sayan kurso so ontulong ed sika ed pangibesngaw moy inkasika a lalon epektibo tan ontulong ed sikan magmaliw a magmaong a managbangat ed Salita na Dios.

Saray asainmin para ed saramay nampalista ed Teokratikon Eskuelaan Parad Ministeryo so gawaen na manangasikaso na eskuelaan. Diad onggendan a taloran pahina, nanengneng mo so personal a porma na pakakonsehoan mo. Saray numero antis na nanduruman punto so mipetekan ed saray aaralen ed ontumbok iran pahina. Diad saratan ya aaralen, naromog mo so panangipalinew ed no anto so lalanoren na pagmaliw ya onsiano ed sarayan aspekto na panagsalita tan panagbangat tan no akin ya importante so balang sakey. Naromog mo met so makatulong a panangiwanwan ed no panon a gawaen so nirerekomenda.

Saray panandaan a kolor ed porma na pakakonsehoan so pakapatnagan no dinan iran punto so onaplika ed saray asainmin a manasaglawi na (1) pangibasa ed dumerengel, (2) panangidemostra ed duara odino onsulok ni, odino (3) diskurso ed kongregasyon. Ipabtang na manangasikaso na eskuelaan so punton kimeyan mo. Magmaong no sansasakey labat so kimeyan a punto. Nagunggonaan ka diad pangipasal mo ed nirekomenda diad sampot na nipabtang ya aaralen. No nipatnag mo a matalonam a niyaplika so konseho ed niganan aaralen, sika so pabtangan na managkonsehom na sananey a punto.

No say asainmin mo so iparungtal bilang demostrasyon, nakaukolan mo so sakey ya eksena. Ompatnag ed pahina 82 so listaan na saray setting, balet agka mandedependi ed saya lambengat a listaan. Nayarin irekomenda na managkonsehom a salien mo so sakey ya eksena ta pian nawalaan kay eksperiensya, odino abuloyan to ka lan manpili.

Diad pambasa ed sayan libro tan panggawa ed saray panagpasal anggano anggapoy ipaparaan mon asainmin mo ed eskuelaan so ontulong a maong ed iyaligwas mo. Nayarin sarag mon kobrian so nanduruman aaralen ed kada simba.

Anggan abayag ka lan mibibiang ed eskuelaan odino manpupulong, wala nin siansiay papaaligwasen mo. Komon ta sigpot kan minabang ed edukasyon a nitatarya diad Teokratikon Eskuelaan Parad Ministeryo.