Eskuelaan a Mangikinlong ed Sikatayo Parad Sankaimportantian Iran Kimey
1 Maneeskuela iray totoo pian makagamor na edukasyon ya ontulong ed sikaran nadampot iray kalat da ed bilay. Balet, anto ni mas importantin kalat nen say pangidayew ed mismon Manangiter na bilay tan panulong ed arum a makaaral ed saray gagala tan saray paraan to? Anggapo la. Say gagala na Teokratikon Eskuelaan Parad Ministeryo et pian iparaan itayo a mangibangat ed arum nipaakar ed pananisia tayo. Kanian, diad iyaatendi tayo ed eskuelaan kada simba, makakagamor itayo na saray dunong a manginlong ed sikatayo ed saray sankaimportantian a kimey ed bilay.
2 Say “Eskedyul ed Teokratikon Eskuelaan Parad Ministeryo ed 2003” so nitarya ed imbeneg a bulan a paway na Ministeryo Tayo ed Panarian. Kalaktip ed eskedyul iray detalye no panon ya ikondukta so eskuelaan. Nayarin naimanom a praktikal so pangisigpit ed eskedyul diad kopyam a Minabang ed Edukasyon na Teokratikon Eskuelaan Parad Ministeryo, a kaukolan mon awiten kada simba ed Teokratikon Eskuelaan Parad Ministeryo. Konsideraen so pigaran importantin kabiangan na Teokratikon Eskuelaan Parad Ministeryo ed 2003.
3 Kalidad na Panagsalita: Onggapo ed Enero, kada sesyon so onggapo ed limaran-minuto a paliwawa nipaakar ed kalidad na panagsalita odino sakey ya aspekto na panagbasa, panagaral, odino panagbangat. Iparungtal na manangasikaso na eskuelaan irayan manangilukas a paliwawa, odino nayarin pabtangan toy sananey a kualipikadon matatken a mangiter ed sayan paliwawa. Nayarin singbaten na espiker so kabaliksan tan kaimportantian na kalidad na panagsalita. Kaukolan to sirin a palaknaben so materyal diad paningbat ed saray Makasulatan ya alimbawa tan ipanengneng no panon ya iyaplika so kalidad, ya iyapasakey so imano ed no panon a say panggawa ed satan et mamaaligwas ed ministeryo tayo ed lawak.
4 Asainmin Nu. 1: Saray agagin apabtangan a mangiter na instruksion a paliwawa so nabibilin lamet ya “iyapasakey so imano ed praktikal a kablian na impormasyon a sisingbaten.” Kabaliksan na saya so pangipanengneng ed kongregasyon no panon ya usaren so impormasyon. No naawat mo iyan asainmin, nengnengen so pahina 48-9 na Eskuelaan Parad Ministeryo a libron-panaralan parad saray suhestion no panon so pamparaan, tan aralen iray reperensya a nipanengneng ed indese na libro ed silong na “Praktikal ya aplikasyon.”
5 Eskedyul ed Panagbasa na Biblia: No, diad apalabas, et agmo asubaybayan so sinimban panagbasa ed Biblia, akin ya agdeterminadon tumboken so eskedyul ed sayan taon? Saramay manggawa ed satan so makakompleto ed Kristianon Griegon Kasulatan diad sampot na taon. Asingbat diad pahina 10, parapo 4, ed libron Eskuelaan Parad Ministeryo iray gunggona ed pangigapoy programan panagbasa ed Biblia ed Kristianon Griegon Kasulatan.
6 Saray Pabitar Manlapud Babasaen ed Biblia: Sayan parte so pinarukey ed samploran minuto ta pian makapankomento iray dumerengel ed sinimban babasaen. Kaukolan a tumboken na saramay apabtangan so nigeter ya oras. Iparungtal itan kada simba, pati ed simba na insalitan repaso. Legan mon babasaen iray niasain a kapitulo, anapen iray punto a pakagunggonaan mo diad panagaral yo bilang pamilya, diad ministeryom, odino ed paraan na panagbilay mo. Antoran kalidad nen Jehova so nipatnag ed saray impideneng to ed totoo tan ed saray nasyon? Antoy naaralan mo ya amabiskeg ed pananisiam tan amadaak na apresasyon mo ed si Jehova? Bulos kan mankomento ed dinanman a punto diad niasain iran kapitulo, anggan diad saray bersikulo a basaen ed Asainmin Nu. 2, lapud say agin akanbetang ed panagbasa et agto komentoan iray bersikulo.
7 Asainmin Nu. 2: Say unonan estudyante ed kada simba et panagpasal ed publikon panagbasa. Likud labat ed unor a panagbasa ed kada bulan, amin la so alaen manlapud sinimban babasaen ed Biblia. Say unor a babasaen ed bulan so alaen ed Say Panag-Bantayan. Kaukolan a basaen na estudyante so niasain a materyal ya agmangiiter na introduksion odino konklusyon. Diad onian paraan et niyapasakey ton maong so imano to ed saray dunong to ed panagbasa.—1 Tim. 4:13.
8 Asainmin Nu. 3 tan Nu. 4: Arum ed sarayan asainmin so kaslakan a nibase ed libron Reasoning nen say arum; saray arum et tema labat. Saramay naikdan na asainmin a limitado so reperensya odino tema labat et walaan na pankanawnawan manibukel ed saray presentasyon da diad pan-research ed saray Makristianon publikasyon tayo. Saya so mamainomay ed saray agagin bibii ya iyadapta iray komento ra ed saray assistant da.
9 Saray Eksena: Singa nipabitar ed pahina 45 na libron Ministeryo Parad Eskuelaan, say manangasikaso na eskuelaan so nayarin mangi-asain na sakey ya eksena. No anggapoy inyasain to, saray agagin bibii so nayarin mamili na sakey ya eksena diad listaan ed pahina 82. No say agin bii so walaan na asainmin kada duay bulan, saray 30 eksena so mangitarya na magenap a panduruma a sabien toy limay taon. Saray agagin bibii a mamili ed Nu. 30, salanti, “Arum niran eksena a matukoy ed lugar yo,” so nepeg a mangisulat ed eksena diad leksab odino ed beneg na assignment slip (S-89). Say manangasikaso na eskuelaan so mangisulat ed petsa na betang na estudyante ed pahina 82 ed libro to a kapetekan na eksena ya inusar to. Ibansag to iya sano markaan to la so porma na pakakonsehoan na estudyante.
10 Porma na Pakakonsehoan: Say porma na pakakonsehoan mo so akatekep ed librom. Wala itan ed pahina 79-81. Kanian, kaukolan mon iter so librom ed manangasikaso na eskuelaan kada kayarim ya imparungtal so asainmin mo. Kaukolan na manangasikaso na eskuelaan a mantinien so rekord na pakakonsehoan iran punto a papaaligwasen na saray estudyante.
11 Insalitan Repaso: Say repaso ed Teokratikon Eskuelaan Parad Ministeryo so ikondukta diad insalitan paraan. Nagawa itan a maminsan ed kada duay bulan tan sabien toy 30 minutos. Saray tepet a konsideraen legan na repaso so itultuloy ya itekep ed Ministeryo Tayo ed Panarian. No say aka-eskedyul a simba parad insalitan repaso et ombana ed simba na sirkiton asamblea odino bisita na manangasikaso na sirkito, diad ontan et saray aka-eskedyul a betang ed ontumbok a simba so singbaten tan say insalitan repaso so iyeskedyul ed ontumbok a simba.
12 Kaaruman Iran Klase: Diad saray kongregasyon ya onsulok ed 50 so nampalista ed eskuelaan, saray mamatatken so mangikonsidera ed pangusar na kaaruman iran klase. “Nayarin usaren iyan uksoyan para ed amin a presentasyon na estudyante odino para lambengat ed duaran unor ya asainmin [3 tan 4].” (Eskuelaan Parad Ministeryo, p. 285) Say komaduan suhestion so ginawa pian ikonsidera iray kongregasyon a ditan et dakel iray agagin bibii balet ta daiset iray agagin lalaki pian pabtangan na panagbasa iran asainmin. Nepeg a mamili iray mamatatken na saray kualipikadon agagin lalaki a mangikondukta ed sarayan klase.
13 Katulongan a Managkonseho: Singa nipatnag ed eskedyul ed Teokratikon Eskuelaan Parad Ministeryo, say katulongan a managkonseho so nepeg a pilien na ulop na mamatatken pian mangiter na pribadon konseho ed saray mamatatken tan ministeryal iran lingkor a mangiparungtal ed saray pabitar na Biblia tan saray instruksion a paliwawa. Nepeg ya eksperiensyado so agin laki ya apabtangan a manggawa ed saya, samay say konseho to et respetoen na arum a mamatatken. Nepeg a makapabiskeg so konseho to, mangomenda ed maabig a panagsalita tan paraan na panagbangat tan mangikonseho na sakey odino duaran punto a paaligwasen. Agla kaukolan so pangiter na konseho kayari na kada impanpaliwawa na agin mabetbet a manpaliwawa. Anggaman ontan, nepeg a natebek tan natalosan na agin laki ya apabtangan na sayan panagkonseho ya anggan saray agagin manpapaliwawa la ed publiko so natulongan ni pian lalon onaligwas.—1 Tim. 4:15.
14 No Anto so Imanoen: Anto so makatulong ed managkonseho a man-analisa ed presentasyon? Say komatlon kahon a walad maslak a 53 ya anumeroan iran kapitulo ed libron Eskuelaan Parad Ministeryo so walaan na antikey a sumaryo no antoy talinengen. Nepeg met ya imanoen na manangasikaso na eskuelaan so arum a panonot odino suhestion a walad libro ya ontulong ed sikaton nadetermina a tampol so pantutunosan tan inka-epektibo na presentasyon. Alimbawa, imanoen iray nantutumbokan a tepet a walad tagey na pahina 55 tan saray ideya a walad unor a parapo ed pahina 163.
15 Sulatan Iray Blanko: Niarum ed maawang iran margin, say libron Eskuelaan Parad Ministeryo so walaan na pigaran blankon espasyo a nigana parad sika pian pangisulatan mo na kaaruman iran nota legan na personal a panagaral mo tan sano onatendi ka ed Teokratikon Eskuelaan Parad Ministeryo. (Nengnengen so pahina 77, 92, 165, 243, 246, tan 250.) Seguroen ya awit moy librom kada simba. Itumbok ed manangilukas a paliwawa. Pansiansiaen ya akalukas so librom sanlegan na klase. Imanoen iray suhestion na manangasikaso na eskuelaan. Imanoen met iray metodo ed panagbangat, saray tepet, alimbawa, panagsalita, ilustrasyon, visual aid, tan panangikompara ya inusar na saray espiker. Diad pangala na mausar iran nota, nanonotan tan nausar mo iray dakel a maabig a punto a nagamoran ed eskuelaan.
16 Amta nen Jesu-Kristo a say panangipulong ed maong a balita na Panarian na Dios so sankaabigan a pribilehyo a nayarin ipabtang ed siopaman. Satan so manunan kimey to. (Mar. 1:38) Inkuan to: “Kaukolan ko met ya ipulong so ebanghelyo na panariay Dios ed saray arum a syudad; ta sikatoya so nibakian ko.” (Luc. 4:43) Singa ed saraman so angawat ed imbitasyon ya ontumbok ed sikato, sikatayo met so okupadon maong ed panangipulong na maong a balita, tan lawas tayon panggunaetan a paaligwasen so kalidad na ‘bagat na panangidayew’ tayo. (Heb. 13:15) Pian nadampot itan a gagala, komon ta determinado itayon mibiang a regular ed Teokratikon Eskuelaan Parad Ministeryo, salanti, eskuelaan a mangiparaan ed sikatayo parad sankaimportantian iran kimey ed bilay.