No Panon Itayon Minanabang ed Teokratikon Eskuelaan Parad Ministeryo
1 Saray totoo nen Jehova so walaan na nikaduman pribilehyo a makaawat na teokratikon edukasyon. (Isa. 54:13; Juan 6:45) Balet, akadependin tuloy ed gagawaen tayon sagpot so kalaknab na nagunggona tayo ed satan. Natetebek mo ta so makagunggona iran epekto na Teokratikon Eskuelaan Parad Ministeryo ed espiritualidad mo?
2 Saray Komento na Pisasalamat: Naimano na dakel a manangasikaso na eskuelaan a say panguusisa a maong ed saray kalidad ed panagsalita so amaaligwas ed inka-epektibo na saray kongregasyon da ed lawak na ministeryo. Niarum ni, naimano na sakey a manangasikaso na eskuelaan a bilang resulta na uksoyan a mibiang iray dumerengel ed saray pabitar ed Biblia, mas dakel lay makapibabansag ed eskedyul ed panagbasa na Biblia. Nipaakar met ed Asainmin No. 2, dakel ya agagin lalaki so walaay maabig a komento ed saray gunggona na pangiyapasakey ed materyal ya agla iparaan so introduksion tan konklusyon. Saramay apabtangan na sayan parte so mas mangiimano la natan ed pamaaligwas na dunong da ed panagbasa.—1 Tim. 4:13.
3 Nagunggonaan so Amin: Makapaliket so pakapankomento diad saray pantitipon. (Uli. 15:23) Lapud masakbay lan nipapanengneng iray tepet ed insalitan repaso, napanparaanan tayo la itan tan makapibiang itayon tampol ed repaso. Niarum ni, nilaktip ed isyu na Enero 1, 2004, na Say Panag-Bantayan iray pabitar manlapud saray libro na Biblia a mipetekan ed niasain ed sikatayon babasaen ed Teokratikon Eskuelaan parad Ministeryo. Sarayan artikulo so akatulong ed dakel pian makapangiter na makapabiskeg iran komento legan na saray pabitar ed Biblia. Saray arapen ya isyu na Ministeryo Tayo ed Panarian so mangiparungtal na pigaran insalitan repaso a nibase ed sarayan artikulo ed Panag-Bantayan.
4 Amin a nampalista ed eskuelaan so walaan na nikaduman pribilehyon manparaan tan mangipresenta na saray asainmin. Amin tayo so nagunggonaan ed saray komendasyon na manangasikaso na eskuelaan diad plataporma. Saray sinansakey ya estudyante so nagkalalon nagunggonaan ed saray konseho na manangasikaso a nayarin itarya to ed pribado kayari na pantitipon. Saray panagpasal ed kada sampot na kapitulo a manisingbat ed kalidad na saray panagsalita diad libron Minabang ed Edukasyon na Teokratikon Eskuelaan Parad Ministeryo so mangitatarya na kaaruman a tulong.
5 Sano nipapaimano ed sika iray praktikal tan Makasulatan ya ideya legan tan kasumpal na pantitipon, isulat iraya ed kopyam a libron-panaralan ya Eskuelaan Parad Ministeryo. Morekdeken iray naaralan mo tan konsideraen no panon a sarayan aspekto na madibinon edukasyon so mamapaaligwas ed espiritualidad mo.