Say Teokratikon Eskuelaan Parad Panagministro ed 2001
1 Walaray magenap a Makasulatan a rason no akin ya amin tayo so kaukolan a mibiang a sigpot no nayadyari diad Teokratikon Eskuelaan Parad Panagministro.—Uli. 15:23; Mat. 28:19, 20; Gawa 15:32; 1 Tim. 4:12, 13; 2 Tim. 2:2; 1 Ped. 3:15.
2 Abayag lan kabiangan na eskuelaan so programa parad sinimban babasaen ed Biblia. Mipara itan ed pambasa na ngalngalin sakey a pahina na Biblia ya agew-agew. Onggapo ed sayan taon, niasain met so panagbasa na Biblia ed simba na kada insulat a repaso. Asumpal lay kaaruman a babasaen ed Biblia, a niyeskedyul ed loob na apalabas a taloy taon. Balet no labay yo ni manbasa na malaglaem ed Biblia nen say inyeskedyul, manggawa kayo lay programa na dilin panagbasa yo.
3 Nipapasal ed Asainmin Nu. 2 iray agagin lalaki parad “lapag a panagbasa” na Salitay Dios. (1 Tim. 4:13, NW) Sano walay asainmin yon manbasa, ipasal itan a maksil tan maminpiga. Nayarin usaren yo iray nirekord a nanlapud Biblia ya audiocassette na Sosyedad pian napaaligwas so panangibalikas, panguman-uman na tono, tan arum nin aspekto na maabig a panagbasa yo.
4 Nibase’d libron Reasoning iray Asainmin Nu. 3 tan Nu. 4, a niparaan pian usaren ed lawak na ministeryo. No say nipabtang a materyal et mairap yon singbaten unong ed nigeter ya oras, pilien labat so sankapraktikalan ed teritorya na kongregasyon yo. Nayarin usaren so antokaman a setting a matukoy parad teritorya yo.
5 Manggaway makatunongan a sagpot pian nagawaan yo iray asainmin yo ed eskuelaan. Ipanaon so pamparaan a maong, tan maligsan manpaliwawa. Napaseseg so kongregasyon lapud sikayo, tan nagunggunaan kayon personal diad intiron-puson pibiang diad Teokratikon Eskuelaan Parad Panagministro legan na 2001.