Matukoy a Kakasil na Boses

NO KULANG na nakaukolan a kakasil so manpapaliwawa ed publiko, nayarin arum ed saray dumerengel so makatemeg. No melmelag so boses na manangipalapag dia ed lawak na ministeryo, nayarin agto naalay imano na onabung. Tan no diad saray miting et kulang so kakasil na saray komento ed limog na saray dumerengel, saray inmatendi so agmakaawat na nakaukolan a panamaseseg. (Heb. 10:24, 25) Diad biek a dapag, no pakasilen na sakey a managpaliwawa so boses to ed agmatukoy a panaon, nayarin iri-iri iray dumerengel​—naingongotan nira ingen.​—Uli. 27:14.

Ikonsidera so Dumerengel Mo. Siopa so pitotongtongan mo? diad sakey a too? diad sakey a pamilya? diad melag a grupon nantitipon para ed lawak na kimeyan? diad interon kongregasyon? odino diad baleg a kombension? Mapatnag a say kakasil na boses a matukoy ed sakey a situasyon so nayarin aliwan matukoy ed sananey.

Diad nanduruman inkagawa, saray lingkor na Dios so nansalita ed arap na dakel a dumerengel. Diad samay inagurasyon na templo diad Jerusalem ed panaon nen Solomon, anggapo so kagawaan a pampakasil na tanol. Kanian si Solomon so inmalagey ed niyatagey a plataporma tan benendito to iray totoo “ed maksil a boses.” (1 Ara. 8:55; 2 Awa. 6:13) Pigaran siglo ed saginonor, kayari na inkikalbo na masanton espiritu nen Pentecostes 33 K.P., sakey a karaklan​—a tugyopen na saray interesado tan manluludlurey—​et nilimpog da so melag a grupo na saray Kristiano ed Jerusalem. Diad impangipanengneng na praktikal a kakabatan, si Pedro so “inmalagey . . . tan inkasil to so boses to.” (Gawa 2:14, NW) Niiter so mabiskeg a pantasi.

Panon mon nibaga a matukoy lay kakasil na boses mo ed sakey a situasyon? Say reaksion na dumerengel so sakey ed sankaabigan iran pakadeterminaan. No naimanom ya arum ed saray dumerengel so nanairapan ya ondengel, panggunaetan ya itukoy so kakasil na boses mo.

Balanglan sikatayo so mitotongtong ed sakey a too odino ed sakey a grupo, makabat ya ikonsideray klase na saray dumerengel. No walay medyo telek, nakaukolan mon ikasil so boses mo. Balet say pankulyaot et agmakapaliket ed totoon medyo matantan ya onkiwas lapud inkatakken la. Nipasen ni ingen itan a tanda na inkagarambasal. Diad arum a kultura, say makmaksil a boses so pakapatnagan a say too so mamapasnok odino agmakankaanos.

Ikonsidera so Makadisturbon Ungol. Sano manpupulong ka, saray sirkumstansyan naabet mo so talagan mangapekta ed nakaukolan a kakasil na boses pian makapanpulong. Nayarin kaukolan mon talonaan so ungol na onlalabas a luluganan, maingal ya ugugaw, dangol na saray aso, manyabeng a musika, odino maksil a telebisyon. Diad biek a dapag, diad saray lugar a nanaabay iray abung, nayarin nabaingan so onabung no mansalita kan makmaksil a natawag mo lay imano na kakaabay.

Talonaan met na saray agagin lalakin manpaliwawa ed kongregasyon odino diad saray kombension so nanduruman tuloy iran sirkumstansya. Say pansalita ed saray dumerengel a walad paway so miduman tuloy diad pampaliwawa ed sakey a hall a walaay marakep a balandra na tanol. Diad Latin America duaran misionaryo so nansublayan ya angiter na publikon paliwawa diad patio na abung na sakey ya interesadon laki legan a mapalakapak so bebentarol diad asingger a plasa tan wala met so lalong ya ag-ontundan onkukaok!

Legan na paliwawa, nayarin wala so nagawa a mankaukolay itunda ya anggad onkepa so pakadisturboan odino pakasilen so boses. Alimbawa, no nagawa so sakey a miting ed paalagey a naatepay sim, say biglan uran so sengegay ngalngalin agpakadngel na saray dumerengel ed manpapaliwawa. Say ugaw a manakis odino say pakadisturbo lapud saray atrasadon sinmabi so seguradon mamalesa na angat. Aralen a talonaan so pakadisturboan ta pian sigpot a nagunggonaan iray dumerengel mo ed impormasyon ya ipresentam.

Makatulong so kagawaan ed panagpakasil na tanol no wala, balet siansian kaukolan a pakasilen so boses ed biang na managpaliwawa sano say kipapasen so mankaukolan. Diad arum a pasen a mabetbet so kaerep na koryenti, saray managpaliwawa so naobligan mangituloy ed paliwawa ra ya anggapoy mikropono.

Ikonsidera so Materyal a Sisingbaten. Say ipaliwawam a materyal so walaan met na pisiglaotan ed nakaukolan a kakasil na boses. No say tema et mankaukolay biskeg, agpakakapuyen so presentasyon diad pansalitan melmelag so boses. Alimbawa, no babasaen mo iray panangukom a manlapud Kasulatan, nepeg a mamaksil so boses mo nen say sano babasaen mo so simbawa diad panangipanengneng na aro. Itukoy so kakasil na boses mo ed materyal, balet alwaran ya ag-itan mangipaarap na imano ed sika.

Ikonsidera so Gagalam. No kaliktan mon sagyaten iray dumerengel mo nipaakar ed maseseg a kimey, nayarin kaukolan mon ikasil so boses mo. No kaliktan mon umanen so kaisipan da, agmo ra aablogen panamegley na makmaksil a boses. No panggugunaetan mo so manambayo, mabetbet a magmaong so makakalnan boses.

Epektibon Panangusar ed Maksil a Boses. Sano sasalien mon alaen so imano na sakey ya okupado, mabetbet a makatulong so maksil a boses. Kabat iya na atateng, kanian ikasil day boses da no tawagen daray anak da pian pasempeten da la ra manlapud panggagalaw. Nayarin nakaukolan met so maksil a boses sano manpayurong la so tsirman diad igapo na miting na kongregasyon odino asamblea. Legan a manpupulong iray manangipalapag, nayarin onkelyaw iran mangibano diad iyasingger da’d totoon mantratrabaho ed paway.

Anggano naalam lay imano na sakey a too, importantin itultuloy ya usaren so magenap a kakasil na boses. Say makalkalnan maong a boses so nayarin mangiter na impresyon a say mansasalita so ag-akaparaan odino andiay kombiksyon.

Sano atekepan na panangiganggan, say pangitagey na boses so mamakiwas ed totoo. (Gawa 14:9, 10) Mipadpara, say imbandon ganggan so nayarin mangamper na desyang. Diad Filipos ngalngali lan manbikkel so sakey a manangipangaw lapud abaloan ton akatakas laray priso. “Si Pablo so kinmelyaw ed maksil a boses, a kuanto: ‘Agmo sasakitan so inkasika, ta wadia kamin amin!’” Diad ontan et naamper so pambikkel. Insan pinulongan nen Pablo tan si Silas so manangipangaw tan say sankaabungan to, ya amin da so angawat ed katuaan.​—Gawa 16:27-33, NW.

No Panon Mon Paaligwasen so Kakasil na Boses. Para ed arum, nakaukolan so malaglaem a sagpot diad panaral no panon so pangusar ed matukoy a kakasil na boses. Nayarin mansalitan medyo maksil so sakey a too lapud makapuy so boses to. Anggaman ontan, diad pansagpot et posibli so iyaligwas, anggaman sikato so siansian mapalnan mansalita. Imanoen so panaglinawa tan postura. Ipasal so iyurong tan iyalagey a maptek. Inatnat moy takeb mo, tan onlinawa na aralem. Seguroen a papanoen mo so leksab a parte na saray balam. Say suplay na dagem, no suston nakontrol, so sengegay pakakontrol mo ed kakasil na boses mo sano mansasalita.

Para ed arum, say problema et sikara so mansalitan makmaksil. Anganko ta apasalan da so ontan lapud pantratrabaho ra ed paway odino diad maungol a kaliberliber. Diad biek a dapag, nayarin sikara so apabaleg ed atmosperan amin so mankulyaot tan misasalaok. Bilang resulta, liknaen dan say paraan lambengat a pakapibiang da ed tongtongan et say pansalita ran maksil nen saray arum. No progresibon unoren da so simbawa na Biblia a mangisulong ira “na matamoy a lugor na panangabagey, panangasi, kaabebaan na nonot, kauyamoan, tan andukey a panagtepel,” nasarag dan itukoy so kakasil na boses da sano mitongtong ed arum.​—Col. 3:12, NW.

Say maabig a panagparaan, eksperiensya manlapud maparanay a pampupulong, tan pikakasi ed si Jehova so ontulong ed sikan mansalita a walaay matukoy a kakasil na boses. Balanglan mansasalita ed plataporma odino ed sakey sano manpupulong, panggunaetan ya iteen iray nonot mo ed no panon a natulongan so arum a too diad idengel da ed ibabagam.​—Uli. 18:21.