Epektibon Inkiparungtal na Kasulatan

SAY Kasulatan so mangitarya na basiyan na instruksion a niiiter ed saray miting tayo ed kongregasyon. Saray teksto ed Biblia so pangisentroan met iran punto ed no anto so ibabaga tayo diad lawak na ministeryo. Anggaman ontan, no kaunongan karakel so itulong na saraya ed diskusyon tayo so mandependi ed no panon inkaepektibo so inkiparungtal na saratan.

Mas ni so nakaukolan nen say basta panukoy ed teksto tan imbitaan so sakey a bansagan to kan mamasa ed satan. Sano ipaparungtal so teksto, panggunaetan a gawaen so duaran gagala: (1) Sagyaten so pantalaran, tan (2) ipaimano so rason na impangusar ed teksto. Sarayan gagala so nadampot diad nanduruman paraan.

Mantepet. Saya so sankaepektiboan no say ebat so agni amta na saray dumerengel mo. Panggunaetan ya idalatdat so tepet ed paraan a mannonot so totoo. Ontan so ginawa nen Jesus. Sanen sikatoy inasinggeran na saray Fariseo ed templo tan mapublikon sinubok da so pakatalos to ed Kasulatan, tinepetan ira nen Jesus: “Anto so isisip yo ed Kristo? Siopa so makan-anak?” Inmebat ira: “Anak nen David.” Insan intepet nen Jesus: “Panon sirin nen David dia ed espiritu a sikatoy tawagen to na ‘Katawan’?” Tan diad saya et ginapoan ton inaon so Salmo 110:1. Ag-akasel iray Fariseo. Anggaman ontan, say ulop so tinmalineng a maong ed si Jesus.​—Mat. 22:41-46.

Diad lawak na ministeryo, nayarian mon usaren so manangiparungtal a tepet a singa say onggendan: “Sika tan siak so walaan na personal a ngaran. Kasin say Dios so walaan na personal a ngaran? Naromog tayo so ebat ed Salmo 83:18.” “Kasin niwala ni so sakey a gobierno parad amin a katooan? Imanoen no panon iyan naebatan ed Daniel 2:44.” “Talaga kasin sasaglawien na Biblia iray kipapasen a nagagawa ed panaon tayo? Ipareng so nibaga ed 2 Timoteo 3:1-5 ed saray kipapasen a kabisadom.” “Kasin wala ni so anggaan na paniirap tan patey? Naromog so ebat na Biblia ed Apocalipsis 21:4, 5.”

Diad paliwawa, say maalwar a panangusar ed tepetepet pian iparungtal iray teksto so nayarin mamakiwas ed saray dumerengel mo ya onnengneng ed saray teksto a walaan na apasimbalon interes, anggan saraman so kabisado da la. Balet kasin gawaen da so ontan? Nayarin mandependi itan ed no kasin saray intetepet mo so peteg a manasaglawi ed sikara odino andi. Anggan sano say suheto so paninteresan na saray dumerengel, nayarin nipalir so kanonotan da sano babasaen moray teksto a nadngel da lan aminpiga-piga. Pian aliwan ontan so nagawa, nakaukolan a magenap mon isipen so pamaakaran pian magmaliw a makapasagyat so presentasyon mo.

Mangiyarap na Problema. Nayarin mangiyarap ka na problema insan ipaimano so sakey a teksto a mangiter na solusyon. Agmo paniilaloen iray dumerengel na mas ni nen say nagamoran da. Mabetbet a say sakey a teksto so mangiter labat na kabiangan na solusyon. Anggaman ontan, nayarin kerewen ed saray dumerengel a mannonot, legan a babasaen mo so teksto, no anton panangiwanwan so iter na satan diad pangarap ed situasyon.

Diad miulibay a paraan, nayarin mamitla ka na sakey a prinsipyo nipaakar ed maridios a kondukta insan usaren so sakey a salaysay ed Biblia a mangiyilustra ed kakabatan na panumbok ed satan. No say sakey a teksto so nankarga na duara (odino nayarin masulok ni) ya espesipikon punto a misiglaotan ed walan nasisingbat, arum a managpaliwawa so mangerew ed saray dumerengel ya imanoen iraya. No say problema so ompatnag a sankairapan ed partikular a dumerengel, naliing mo so kanonotan diad pangipresenta ed pigaran posibilidad insan abuloyan ya onebat so teksto tan say kiyaplikaan na satan.

Tukoyen so Biblia Bilang Autoridad. No asagyat mo la so interes ed walan lugan na suhetom tan akapangibaga ka la na sakey odino masulok niran panmoria ed arum ya aspekto na satan, nayarin iparungtal mo so sakey a teksto diad basta pangibagan: “Imanoen so ibabaga na Salita na Dios ed sayan punto.” Saya so mangipanengneng no akin a say materyal ya ibasam so walaan na autoridad.

Inusar nen Jehova iray lalakin singa si Juan, Lucas, Pablo, tan Pedro a mangisulat ed saray porsyon na Biblia. Balet sikara lambengat so managsulat; si Jehova so Autor. Nagkalalo la sano mitotongtong ed totoon agmanaaral na Masanton Kasulatan, say pangiparungtal ed sakey a teksto diad pangibagay “insulat nen Pedro” odino “imbaga nen Pablo” so nayarin andian na parehon puersa a singa ed say introduksion a mangipabitar ed teksto bilang salita na Dios. Makatantanda a diad arum a kipapasen, binilin nen Jehova si Jeremias ya iparungtal so panangiyabawag diad pangikuan: “Dengelen yo so salita nen Jehova.” (Jer. 7:2; 17:20; 19:3; 22:2) Balanglan usaren tayo odino andi so ngaran nen Jehova diad pangiparungtal ed saray kasulatan, sakbay tayon panampoten so tongtongan et nepeg tayon panggunaetan ya ipabitar a say lugan na Biblia et salita to.

Konsideraen so Konteksto: Nepeg a maimano ka ed konteksto sano desidien mon iparungtal so sakey a teksto. Diad arum a kipapasen et direktan salambiten mo so konteksto; bangbalet, say konteksto so nayarin diad arum a dalan et mangimpluensya ed ibagam. Singa bilang, mipara kasi pangiparungtal mo ed saray salita na matakot –​ed Dios a Job tan ed samay balikas na sakey ed saray palson managligliwa to? Say libro na Gawa so insulat nen Lucas, balet sikato so angaon ed saray arum a singa di Santiago, Pedro, Pablo, Felipe, Esteban, tan saray anghel, ontan met ed si Gamaliel tan arum iran Judio ya aliwan Kristiano. Diad siopa so panukoyan mo ed tekston inaon mo? Alimbawa, tandaan ya aliwan amin ed saray salmo so tinugyop nen David tan aliwan amin ed libro na Uliran so insulat nen Solomon. Makagunggona met a naamtaan no siopa so pangipapaarapan na managsulat na Biblia tan no anton inkalapagan a suheto so nasisingbat.

Mangusar na Kaaruman ya Impormasyon. Saya so nagkalalo lan epektibo no nipanengneng mo a saray walan sirkumstansya ed samay panaon ed salaysay na Biblia so miulibay ed saraman so sisingbaten mo. Diad arum a kipapasen nakaukolan so kaaruman ya impormasyon ta pian natalosan so partikular a teksto. Alimbawa, no usaren mo so Hebreos 9:12, 24 diad sakey a paliwawa a nipaakar ed dondon, nayarin nakaukolan mon salambiten ya unona so panbasam ed teksto diad antikey a pangi-eksplika ed niseleselek a kuarto na tabernakulo, ya ipapanengneng na kasulatan, a mangireretrato ed pasen a nilooban nen Jesus sanen tinmokotok ed tawen. Balet ta agmo la ilalaktip so dakerakel a materyal a talonaan to lay tekston ipaparungtal mo.

Pian napaaligwas so paraan na pangiparungtal mo ed saray teksto, analisaen so panggagawa na saray atalitalin managpaliwawa. Imanoen iray nanduruman metodon uusaren da. Analisaen so inkaepektibo na sarayan metodo. Diad pangiparaan mo ed saray paliwawam, nengnengen iray manunan teksto, tan isipen mon maong so nepeg a nagawaan na kada teksto. Iplanon maong so introduksion a para ed kada teksto ta pian nausar itan diad sanka-epektiboan. Diad saginonor, palaknaben ya ilaktip so amin a tekston usaren mo. Legan ya onaaligwas iyan aspekto na presentasyon mo, lalom a niteteen so imanom ed Salita na Dios.