Makapasagyat-interes ya Introduksion

SAY introduksion so makanakanan parte na anggan dinan a paliwawa. No talagan asagyat mo so interes na saray dumerengel mo, sikara so lalon ontalineng ed ontumbok ya ibaga. Diad lawak na ministeryo, no agmakasagyat na imano so introduksion mo, nayarin agmo nituloy so presentasyon mo. No manpapaliwawa ka ed Kingdom Hall, ag-ompaway iray dumerengel, balet nayarin saray indibidual so onggapon manisip na arum a bengatla no agmo asagyat so interes da.

Sano ipaparaan mo so introduksion mo, isipen iray onggendan a gagala: (1) pangalay imano na saray dumerengel mo, (2) malinew a salambiten so suhetom, tan (3) ipanengneng no akin a say tema so importante ed saray dumerengel mo. Diad arum a kipapasen, sayan taloran gagala so nagawaan a manbabansag. Anggaman ontan, no maminsan et saratan so sansakeyen ya ikdan na imano, tan nayarin mandurumay inka-alasir da.

No Panon a Naalay Imano na Saray Dumerengel Mo. Say impandaragup na totoo pian ondengel ed sakey a paliwawa so agmankabaliksan ya akaparaan iran mangiyapasakey na imano ra ed tema. Akin ya andi? Saray bilay da so okupado’d dakel a bengatla a mankaukolan na panangimano ra. Nayarin sikara so nanaaburido lapud sakey a problema ed abung odino lapud kapagaan ed bilay. Bilang managpaliwawa et sakey ya angat so panagyat tan pamasiansia ed imano na saray dumerengel. Walay pigaran paraan a nagawaan mo itan.

Sakey ed saray sankabantogan a diskurso et samay Sermon ed Palandey. Panon so inkigapo na satan? Unong ed salaysay nen Lucas, inkuan nen Jesus: “Maliket kayon duruka, . . . maliket kayon nanaerasan natan, . . . maliket kayon managogol natan, . . . maliket kayo sano gulaen kayo na totoo.” (Luc. 6:20-22, NW) Akin a satan so anagyat na interes? Diad pigaran salita, binidbir nen Jesus so arum ed seryoso iran problema a kaukolan ya arapen na saray ondedengel ed sikato. Insan, imbes a palaknaben to so nipaakar ed saray problema, impanengneng to a saray totoon walaan na ontan iran problema so nayarin siansian magmaliw a maliket, tan ginawa to itan diad paraan a saray ondedengel et labay da ni so ondengel.

Nayarin nausar ya epektibo iray tepet diad panagyat ed interes, balet saratan so nepeg a matukoy. No napatnagan ed saray tepet mo ya ipaliwawam labat iray bengatlan nadngel la na saray dumerengel, nayarin naekalan iran tampol na interes. Agka mangitetepet na mamabaing odino mamasiki ed saray dumerengel mo. Imbes, panggunaetan a tibukelen iray tepet mo diad paraan a managyat na panisip. Ontundan magano kayari na kada tepet ta pian saray dumerengel mo so nawalaan na panaon a manibukel na ebat diad nonot da. Sano nalikna ran sikara so mitotongtong ed sika diad nonot, nalam la so imano ra.

Say pangusar na peteg-ed-bilay ya eksperiensya so sananey a maabig a paraan ed panagyat na imano. Balet say basta pangistorya so agmakagegemtan ed gagalam no say eksperiensya so makapabaing ed sakey ed saray dumerengel. No atandaan so estorya balet ta alingwanan so leksion ed satan, agmo adampot so kalat mo. Sano nausar so sakey ya eksperiensya ed introduksion, nepeg a mangiletneg itan na pundasyon para ed makanakanan aspekto na lugan na paliwawam. Anggaman nayarin nakaukolan so pigaran detalye ta pian nagawan mabilabilay so panangisalaysay, alwaran ya agpadudukeyen iray eksperiensya.

Arum a managpaliwawa so mangigapo ed paliwawa ra panamegley na agano niran balita, sakey ya inaon ed lokal a peryodiko, odino ed balikas na sakey a bibidbiren ya autoridad. Saraya met so nayarin epektibo no peteg ya onnepeg ed tema tan ontukoy ed saray dumerengel.

No say paliwawam so kabiangan na sakey a simposium odino kabiangan na Service Meeting, sirin kaslakan lan maabig no say introduksion mo so antikey tan direkta ed punto. No mangiter ka na paliwawa ed publiko, agmo lalampasan so oras a nigeter para ed introduksion. Say lugan na paliwawa so mangipasabi ed impormasyon a sankablian ed saray dumerengel mo.

No maminsan et nayarin naimanom a sika so manpapaliwawa ed arap na dumerengel a manduaruwa odino sumpa ni ingen. Panon mon naala so imano ra? Si Esteban, sakey ya inmunan Kristiano ya adeskribin “napno na espiritu tan kakabatan,” so pinaskar ya inyarap ed Judion Sanhedrin. Diman et angiter na mabekas a depensa nipaakar ed Inkakristiano. Panon so impangigapo to? Diad magalang a paraan tan diad impanukoy ed bengatlan kaslakan ya awaten. “Lalakin agagi, tan atateng, dengel yo: Say Dios na gloria so pinmanengneng ed ama tayo a si Abraham.” (Gawa 6:3; 7:2) Diad Areopago ed Atenas, intukoy nen apostol Pablo so introduksion to diad nidumaduma iran dumerengel, a kuanto: “Lalakin taga Atenas, anengneng ko a diad amin a bengatla et sikayo so lalon matakot ed saray dirios nen saray arum.” (Gawa 17:22, NW) Bilang resulta na epektibo iran introduksion, saray dumerengel ed satan a duaran inkagawa so maliket ya ondengel ni.

Sano wala ka ed lawak na kimeyan, kaukolan mo met a sagyaten so imano na totoo. No ag-inyuksoy ya akauna so indalaw mo, nayarin okupado so unabung ed arum a bengatla. Diad arum a parte na mundo, saray bisitan ag-inimbitaan so nailaloan a mangibagan tampol ed pegdat da. Diad arum a pasen, kakaukolan na kustombre a natumbok so pormalidad sakbay ya ibagam so rason na indalaw mo.​—Luc. 10:5.

Diad anggan dinan a kipapasen, say puron inkamakaaro so makapawala na atmosperan makapasagyat ed pantotongtong. Mabetbet a makagunggona so pangigapo ed bengatlan direkta a manasaglawi ed no anto so wala ed kanonotan na too. Panon mon nadetermina no anto so usaren? Bueno, sanen inasinggeran mo so too, kasin wala so gagawaen to? Nayarin sikato so mantatanem, manlilinis ed sular na abung, mangaapiger na luluganan, manluluto, manpepesak, odino mankokomis. Kasin walay bengatlan nenengnengen to​—peryodiko odino nagagawa ed karsada? Kasin saray kaliberliber to so pakapatnagan na nikaduman interes ed panagbanwit na sira, galaw, musika, panagbiahe, komputer, odino arum nin bengatla? Mabetbet a mapaga so totoo nipaakar ed agano nin nadngel da ed radio odino anengneng da ed telebisyon. Say pantepet odino antikey a pankomento ed anggan dinan ed saratan a bengatla so nayarin mangitonton ed makaaron pantotongtong.

Say kipapasen sanen akitongtong si Jesus ed sakey a Samaritana diad bobon ya asingger ed Sicar so sakey a matalonggaring ya ehemplo ed no panon so pangigapo na tongtongan diad gagalan mantasi.​—Juan 4:5-26.

Kaukolan mon iparaan a maong so introduksion mo, nagkalautla no mabetbet a nakikimeyan na kongregasyon so teritorya to. Tano andi, agka makapangiter na pantasi.

Ipabitar Mo so Suhetom. Diad Kristianon kongregasyon, say tsirman odino samay tumbokan mo ed programa so kaslakan a mangibaga ed tema na paliwawam tan iparungtal to ka. Anggaman ontan, makagunggona ed sika no ipanonot mo ed saray dumerengel so suhetom legan na introduksion mo. Saya so nayarin nagawaan, balet agnakaukolan a salita-por-salita so pangibaga ed tema. Diad anggan anton kipapasen, say tema so nepeg a kalkalnan niparungtal legan na paliwawa. Diad arum a paraan ed introduksion, nepeg mon iteen so imano ed suhetom.

Sanen imbaki nen Jesus iray babangatan ton manpulong, malinew ton impabitar so mensahen ipasabi ra. “Sano onla kayon manpulong, kuan yo, ‘Say panarian na katawenan so asingger la.’” (Mat. 10:7, NW) Nipaakar ed agew tayo, inkuan nen Jesus: “Sayan maong a balita na panarian so nipulong.” (Mat. 24:14, NW) Sikatayo so niganggan a “mangipulong ed salita,” salanti, usaren so Biblia sano mantatasi. (2 Tim. 4:2) Balet, sakbay a lukasan so Biblia odino ipaarap so imano ed Panarian, mabetbet a nakaukolan so pangipabitar ed bengatlan peles a kapapagaan da. Nayarin komentoan mo so nipaakar ed krimen, kaandiay trabaho, ag-inkahustisya, guerra, no panon a tulongan iray walad kalangweran, sakit, odino patey. Balet ag-iyaapasakey ed saray negatibon pamaakaran; say mensahem et positibo. Panggunaetan ya ipaarap so tongtongan diad Salita na Dios tan diad ilalo ed Panarian.

Ipabitar no Akin a say Suheto so Importante ed Saray Dumerengel Mo. No sika so mansalita ed kongregasyon, nayarin makaseguro kan saray dumerengel mo so inkalapagan lan interesado ed walan singbaten mo. Balet kasin sikara so ontalineng a singa idedengel na sakey a too a makakaaral na bengatlan peteg a manasaglawi ed sikato? Kasin ontatalineng ira lapud namomoria ran say narerengel da so matukoy ed kipapasen da ed bilay tan lapud sasagyaten mo ra a panpilalekay panggawa na bengatlan nipaakar ed satan? Satan so nagawa lambengat no kinonsideram a maong iray dumerengel mo​—saray sirkumstansya ra, saray kapagaan da, saray awawey da—​sanen ipaparaan mo so paliwawam. No ginawam itan, sirin ilaktip mo ed introduksion mo so bengatlan pakapatnagan ed satan.

Balanglan manpapaliwawa ka ed plataporma odino mantatasi ed sakey a too, sakey ed saray sankaabigan a paraan a panagyat na interes ed sakey a suheto et say pangibali ed dumerengel mo. Ipanengneng no panon a saray problema ra, nakakaukolan da, odino saray tepet a walad nonot da so misiglaotan ed suheton sisingbaten mo. No nipabitar mo a nilikud ed inkalapagan iran aspekto na tema, et singbaten moray espesipikon aspekto na pamaakaran, sikara so lalon ontalineng a mapetepet. Pian satan so nagawaan, nepeg a manparaan kan maong.

Say Paraan a Pangipresentam ed Satan. No anto so ibagam ed introduksion mo so manunan importante, balet say makasagyat met na interes et say no panon so pangibagam ed satan. Nisengeg ed saya et nakaukolan a say panagparaan mo so aglabat la managlawi ed no anto so ibagam noagta no panon met so pangibagam ed satan.

Importante so pangusar ed saray dugan salita pian nagawaan mo so gagalam, kanian naromog mon maabig so pangiparaan mon maong ed unonan duara odino taloran estansa. Say antikey, simple iran estansa so mabetbet a sankaabigan. Parad paliwawa ed kongregasyon, nayarin labay mon isulat iratan ed saray notam, odino nayarin lablabayen mon ipatlep iratan ta pian saray manangilukas a salitam so mangitarok ed nakakaukolan a puersa pian nipaslep. Say pangidalatdat ed epektibon introduksion diad agmanggaganat a paraan so ontulong pian magmaliw kan kalmado a nakaukolan ed ekstemporanyon pangituloy mo ed paliwawam.

No Kapigan Itan Iparaan. Nanduruma so opinyon ed sayan suheto. Arum ya atalitalin managpaliwawa so manisian say panagparaan ed sakey a paliwawa so nepeg ya onggapo ed introduksion. Arum a nanaral na panagpaliwawa ed publiko so mangikuan a say introduksion so nepeg ya iparaan kayarin akompleto la so lugan na paliwawa.

Seguradon kaukolan mon amtaen no anto so suhetom tan no antoran manunan punto so nononoten mon tibukelen sakbay kan manggawa na matukoy ya introduksion. Balet anto no iparaan mo so paliwawam manlapud impalapag ya outline? Kayarim a nabasa so outline, no walaan ka la na ideya ed usaren mon introduksion, peteg ya anggapoy suppiat ed pangisulat ed satan. Tandaan, met, a pian epektibo so introduksion mo, nepeg mon konsideraen iray dumerengel mo tan ontan met ed walan lugan na outline.