Apalinew so Praktikal a Kablian

BALANGLAN mitotongtong ka ed sakey odino ed dakel a dumerengel, aliwan makabat so pangipasen a (say/saray) dumerengel mo so interesado ed suhetom lapud ta interesado ka ed satan. Say mensahem so importante, balet no agmo nipabitar so praktikal a kablian na satan, nayarin agmo napansiansia so interes na dumerengel mo.

Saya so tua anggan dia ed saray dumerengel ed Kingdom Hall. Nayarin ontalineng ira sano mangusar ka na sakey ya ilustrasyon odino eksperiensya ya agda ni nadngel. Balet nayarin agla ra ontalineng no tongtongen mo so nipaakar ed teman kabat da la, nagkalalo la no onsaew kan mamalaknab ed saratan a bengatla. Kaukolan mo ran tulongan a makatebek no akin tan no panon a say ibabagam so peteg a pakagunggonaan da.

Sikatayo so papasesegen na Biblia a mannonot ed praktikal a paraan. (Uli. 3:21) Inusar nen Jehova si Juan a Managbautismo a mangiwanwan ed totoo “ed kakabatan na saray matunong.” (Luc. 1:17) Saya so kakabatan a nilamut ed mabunigas a takot ed si Jehova. (Sal. 111:10) Saramay mangapresya ed sayan kakabatan so natulongan a matalonan mangarap ed bilay natan tan ombemben ed peteg a bilay, say onsabin maandon bilay.​—1 Tim. 4:8; 6:19.

Gawaen a Praktikal so Paliwawa. Pian nagawan praktikal so paliwawam, nepeg mon nonoten met a maong iray dumerengel ya aliwan say materyal lambengat. Agmo ira momoriaen bilang sakey a grupo labat. Satan a grupo so tugyopen na saray sinansakey tan pamilya. Nayarin walaray ugugaw nin maong, katayatdang, wala la’d edad, tan arum so maedad la. Nayarin walaray balobalon interesado ontan met ed saramay manlilingkor la ed si Jehova sakbay ni na inkianak mo. Arum so nayarin matatken la ed espiritual; arum so nayarin naiimpluensyaan nin maong na awawey tan agagamil na mundo. Tepetan mo so inkasika: ‘Panon a nagunggonaan so dumerengel ed materyal a singbaten ko? Panon ko ran natulongan a natalosan so punto?’ Nayarin labay mon imanoen a manuna so sakey lambengat odino duara ed saray grupon abitla dia. Balet, siansian ikonsideram so arum.

Anto no apabtangan kan maningbat ed sakey a manunan bangat na Biblia? Panon mon nipaliwawa itan a makagunggona ed dumerengel a mananisia la ed satan a bangat? Pambanikelan a pabiskegen so kombiksyon da ed satan. Panon? Diad pankatunongan ed Makasulatan a paneknek a manusuporta ed satan. Napaaralem mo met so pakatebek da ed satan a bangat na Biblia. Saya so nagawaan diad pangipanengneng no panon a say bangat so mitukoyan ed arum niran katuaan na Biblia tan ed mismon personalidad nen Jehova. Mangusar na saray alimbawa​—peteg-ed-bilay iran eksperiensya no posibli—​a mangipapanengneng no panon a say impakatalos ed sayan partikular a bangat so mangugunggona la ed totoo tan mangiimpluensya la ed panmoria ra ed arapen.

Ag-iyaapasakey so praktikal ya aplikasyon ed pigara tan antikey iran komento sano konklusyon la na paliwawam. Diad gapo lambengat et nepeg a nalikna la na kada dumerengel mo a “saya so manasaglawi ed siak.” No niletneg mo la itan a pundasyon, itultuloy so panggawa na praktikal ya aplikasyon legan mon papalaknaben so kada manunan punto ed lugan na paliwawa ontan met ed konklusyon na paliwawam.

Sano manggagawa na aplikasyon, seguroen a gawaen itan ed paraan a mitukoyan ed saray prinsipyo na Biblia. Antoy kabaliksan na satan? Kabaliksan ton gawaen itan ed maaron paraan tan ipatnag so empatya. (1 Ped. 3:8; 1 Juan 4:8) Anggan sanen aarapen nen apostol Pablo iray mairap a problema ed Tesalonica, sineguro ton ipabitar iray positibon aspekto na espiritual ya iyaaligwas na saray Kristianon agagi ton lalaki tan bibii diman. Imbalikas to met so kompiyansa a diad pamaakaran a nasisingbat ed saman et labay dan gawaen so duga. (1 Tes. 4:1-12) Agaylan maabig a pangaligan!

Kasin say paliwawam so ginagalan managyat na pibibiang ed kimey a panagpulong tan panagbangat ed maong a balita ed arum? Pabiskegen so entusiasmo tan apresasyon ed satan a pribilehyo. Balet, legan mon gawaen so ontan, tandaan a say kalaknab na pakapibiang na sinansakey ed saya so nanduruma, tan saya so kokonsideraen na Biblia. (Mat. 13:23) Agmo ipapalikna ed agagim a mankakasalanan ira. Ipapaseseg ed sikatayo na Hebreos 10:24 “a manaayatan itayo ed aro tan dia ed saray maabig a gawa.” No mangayat itayon mangaro, ontumbok iray gawa a nibase ed maong a motibo. Imbes ya idikta so tumboken da, bidbiren a say labay nen Jehova et say pangiyalibansa tayo na “katutulok ed panamegley na pananisia.” (Roma 16:26, NW) Diad pannonot ed saya, napabiskeg tayo so pananisia​—namparan pananisia tayo tan pananisia na agagi tayo.

Tulongan so Arum a Natalosan so Punto. Kapag no mantasi ka ed arum, agsasaewen ya ipabitar so praktikal a kablian na maong a balita. Diad panggawa na ontan et kaukolan mon konsideraen no anto so wala ed kanonotan na totoo ed teritorya yo. Panon mon naamtaan? Ondengel na balita ed radio odino telebisyon. Onnengneng ed arap a pahina na peryodiko. Ontan met, panggunaetan a napitongtongan so totoo, tan ondengel sano mansalita ra. Nayarin naamtaan mon mipupuligesgesan ira ed makapadesdes iran problema​—kaandi na trabaho, panagbayar ed abang, sakit, impatey na sakey a membro na pamilya, kapeligroan ed krimen, ag-inkahustisya manlapud sakey a wala’d autoridad, kabubuyak na panamaley, panamanlong ed saray ankelag ya anak, tan arum nira. Kasin natulongan ira na Biblia? Petepeteg.

Sano igapoy tongtongan, maseguron mannononot ka na sakey a suheto. Anggaman ontan, no napatnagan ed toon wala so sananey ya isyun paninteresan to a maong, tampol ya isingbat itan no nagawaan mo, odino ibagam ya ompawil ka a tarok so pigaran makatulong ya impormasyon. Siempre, paliisan tayo so ‘pibabali ed saman so anggapoy pibibiangan tayo,’ balet maliket itayon inabang ed arum so praktikal a simbawan iyoopresi na Biblia. (2 Tes. 3:11, NW) Mapatnag, say managyat a maong ed totoo et say simbawa na Biblia a manasaglawi ed mismon bilay da.

No agnatalosan na totoo no panon a say mensahe tayo so personal a mangapekta ed sikara, nayarin sampotan dan tampol so tongtongan. Anggano abuloyan da itayon mansalita, no agtayo nipanengneng so praktikal a kablian na tema et nayarin mankabaliksan a say mensahe tayo so walaan na samet ya epekto ed bilay da. Diad pidumaan, no nipabitar tayo so praktikal a kablian na mensahe, say tongtongan tayo so mananda na baleg a pananguman ed bilay na totoo.

Sano mangiyaaral na Biblia, itultuloy ya ipabitar so praktikal ya aplikasyon. (Uli. 4:7) Tulongan iray iyaaralan a natalosan so Makasulatan a simbawa, saray prinsipyo, tan saray ehemplon mangipanengneng ed sikara no panon so panakar ed saray dalan nen Jehova. Idanet iray gunggona a manlapud panggawa na ontan. (Isa. 48:17, 18) Saya so mamakiwas ed saray iyaaralan a manggawa na nakaukolan iran pananguman ed bilay da. Pabiskegen ed sikara so aro ed si Jehova tan say pilalek a sikatoy paliketen, tan saya komon so mamakiwas ed sikara pian iyaplika so simbawa a manlapud Salita na Dios.