Inkasusto na Ibaga

AKIN a nayarin makapangibaga so sakey a Kristiano na aliwan tua? Ompan uuliten to lambengat so bengatlan dengel-dengel to labat, ya agto la inusisa iray katuaan. Odino ompan asobraan ton imbaga so sakey a bengatla, agto amoria itan, aliwa so impakabasa to ed angalaan ton materyal. Sano imanoen tayon maong so inkasusto anggan diad saray ankelag a bengatla, natebek na saray dumerengel tayo a walaan ira na talek ed inkamatua na saray lalon importantin aspekto na mensahe tayo.

Diad Lawak na Ministeryo. Lapud pakakamoria a siansia nin dakel so nakaukolan dan aralen, dakel so talawan ya onggapo ed lawak na ministeryo. Ingen, tampol a naimano na saraya a nasarag da so mangiter na epektibon pantasi, anggano walaan labat na manunan pikakabat ed katuaan. Panon dan nagawaan iya? Say tombok et say panagparaan.

Sakbay ya ompaway ed lawak na kimeyan, kabisadoen so suheto a labay mon singbaten. Panggunaetan a nonoten la iray nayarin itepet na saray dumerengel mo. Mansukimat ed makapnek, nibase’d-Biblia iran ebat. Saya so mangiparaan ed sika a makapangiter na susto iran ebat a relaks so kanonotan. Kasin mangikondukta ka na panangiyaral ed Biblia? Repasoen a maong so materyal ya aralen. Seguroen a natatalosan mo so Makasulatan a basiyan parad saray ebat ed niprintan tepetepet.

Anto no say unabung odino katrabaho so nantepet ya agka akaparaan a mangebat? No agka segurado ed saray katuaan, agmo papalbengan. “Say puso na matunong so mandalepdep ta pian onebat.” (Uli. 15:28, NW) Nayarin naromog moy tulong a kaukolan mo ed libron Reasoning From the Scriptures odino ed “Bible Topics for Discussion” no saratan so wala ed lenguahem. No sarayan dua so agmo awit, iyopresim so pansukimat tan ompawil. No say nantepet so masimoon, sikato so agmasuyat a manalagar ed dugan ebat. Diad tua et nayarin pandinayewan toy inkamapaabebam.

Say pankimey ed lawak na ministeryo a kaiba iray atalitalin manangipalapag so ontulong ed sikan mamayubo na inkadunong diad dugan panangusar ed Salita na Dios. Imatonan no anto ran teksto so usaren da tan no panon so pankatunongan da unong ed saratan. Mapaabeban awaten so antokaman ya iter dan suhestion odino panangorihe. Say maseseg a disipulon si Apolo so agunggonaan ed tulong na arum. Deneskribe nen Lucas si Apolo bilang “marunong,” “mikabisado ed saray sulat,” tan “marlang ed espiritu,” sakey a lakin “mansasalita tan manbabangat a tekep na inkasusto ed saray bengatla nipaakar ed si Jesus.” Ingen, kulang ni so pakatalos to. Sanen naimano iya nen Priscilla tan Aquila, sikara so “angawit ed sikato tan impaliwawa ra ed sikato so dalan na Dios a lalon duga.”​—Gawa 18:24-28, NW.

‘Bembenan a Malet so Matoor a Salita.’ Saray presentasyon tayo ed miting so nepeg a mangipatnag na atagey a panangipasen ed betang na kongregasyon bilang “lusek tan sakurong na katuaan.” (1 Tim. 3:15) Ta pian nitandoro so katuaan, importante a natatalosan tayo iray teksto a nononoten tayon usaren ed saray paliwawa. Imanoen so konteksto tan gagala na saratan.

Say ibagam ed miting ed kongregasyon so nayarin naulit. Siempre, “nagapol itayon amin a maminpigapiga.” (Sant. 3:2, NW) Balet nagunggonaan ka diad pamayubo na saray ugalin ontulong ed suston panagsalita. Dakel ya agagin nampalista ed Teokratikon Eskuelaan Parad Ministeryo so, diad saginonor et magmaliw a mamatatken. “Mas nen say gendat” so nailaloan ed saramay angimatalekan ed ontan a responsabilidad. (Luc. 12:48, NW) No say sakey a matatken so andi-alwar a makapangiter na lingon simbawa a mansumpal ed seryoso iran problema ed saray membro na kongregasyon, eebatan na matatken so pamaermen ed Dios. (Mat. 12:36, 37) Kanian, say agin lakin onkualipika bilang sakey a matatken so nepeg a kabkabat a “mamebemben a malet ed matoor a salita no nipaakar ed dunong na panagbangat to.”​—Tito 1:9, NW.

Manalwar a saray panagkatunongan mo so mitunosan ed “uliran na saray maabig a salita” a nipatnag ed interon lugan na Makasulatan a katuaan. (2 Tim. 1:13) Saya so agnepeg a mangiter na kapagaan ed sika. Anganko ta sumpalen mo ni lambengat a basaen so interon Biblia. Satan so itultuloy mon kimeyan. Balet kaleganan to, imanoen no panon a saray onggendan a suhestion so makatulong ed sika a manganalisa ed materyal ya iisipen mon usaren ed panagbangat mo.

Unona, tepetan mo so inkasika: ‘Kasin sayan materyal so mitunosan ed samay naaralan ko la ed Biblia? Kasin iyasingger toray dumerengel ko ed si Jehova, odino kasi ta itandoro to so kakabatan na mundo, a pasesegen toray totoon paigiya ed satan?’ Inkuan nen Jesus: ‘Say salitam so katuaan.’ (Juan 17:17; Deut. 13:1-5; 1 Cor. 1:19-21) Ontumbok, usaren a maong iray katulongan ed panagaral ya intarya na matoor tan makabat ya aripen a klase. Saraya so ontulong ed sika ya aliwa labat lan pian natalosan a susto iray kasulatan noagta pian iyaplika met iratan tekep na inkasimbang tan inkamakatunongan. No ibasim iray paliwawam ed “uliran na saray maabig a salita” tan onsaral ed uusaren nen Jehova a pitatalosan sano ipapaliwawa tan iyaaplika iray kasulatan, saray ibagam so susto.

Pangusisa ed Inkasusto na Impormasyon. Saray peles a nagagawa, saray inaon, tan saray eksperiensya so makatulong sano iyiilustram tan iyaaplikam iray partikular a punto. Panoy pakasegurom a susto iratan? Sakey a paraan et say pangala na saratan manlapud napanmatalkan iran lapuan. Seguroen a say impormasyon et unong ed petsa. Saray estatistika so napaso; saray sientipikon diskobre so maples a napalumbasan; tan legan ya ombubulaslas so too diad pakatalos to ed awaran tan kadaanan iran lenguahe, saray konklusyon a nibase ed inmunan pikakabat so kaukolan a narebisa. Manalwar a maong no nononoten mon usaren so impormasyon a manlapud saray peryodiko, telebisyon, radio, electronic mail, odino Internet. Isisimbawa na Uliran 14:15 unong ed New World Translation: “Siopaman ya andian na eksperiensya so manisia ed amin a salita, balet say makabat so mangimano ed saray kundang to.” Tepetan mo so inkasika: ‘Kasin say angalaan na impormasyon so bibidbiren a susto? Kasin say impormasyon so napamintuaan na arum a paraan?’ No panduaruwaan mo so inkamatua na sakey ya impormasyon, agmo uusaren itan.

Niarum ni’d pangusisa ed inkanapanmatalkan na saray lapuan, konsideraen a maong no panon mon iplano ya usaren so impormasyon. Seguroen a say panangusar mo ed saray inaon tan estatistika so mitukoyan ed konteksto ya angalaan ed saratan. Diad panggunaet mon idanet so puntom, manalwar pian saray pamaakaran a manasaglawi labat ed “pigaran totoo” so agmagmaliw a “karaklan ed totoo,” a say “dakel a totoo” so agmagmaliw ya “amin,” tan say “diad arum a kipapasen” so agmagmaliw a “diad amin a kipapasen.” Say sobran pangibaga ed pamaakaran odino asulukan iran balita a manasaglawi ed bilang, kalaknab, odino inkaseryoso so mamalesa na panduaruwa ed kredibilidad mo.

No susto ya amin so ibabagam, sika so nakabat bilang toon manrerespeto ed katuaan. Saya so napatnagan a maong ed saray Tastasi nen Jehova bilang grupo. Lalon importante, napagalangan si ‘Jehova a Dios na katuaan.’​—Sal. 31:5.