Kapitulo Trese
Sakey a Baleg ya Ulop ed Arap na Trono nen Jehova
1. (a) Sakbay a naawat na saray sakbay-Kristianon lingkor na Dios odino say 144,000 so tumang da, anto ni so nepeg dan sagmaken? (b) Anto so posible para ed “baleg ya ulop” a manbibilay ed sayan panaon?
SAY panaggawa ed linawa na Dios so manuna ed bilay na saray matoor a lingkor na Dios, manlapud si Abel ya anggad si Juan a Managbautismo. Ingen, amin da so inatey, a manaalagar na kioli ed bilay diad dalin ed balon mundo na Dios. Say 144,000, a miuley ed si Kristo diad mangatatawen a Panarian na Dios, so kaukolan met ya ompatey sakbay dan naawat so tumang da. Anggaman ontan, ipapanengneng na Apocalipsis 7:9 a diad sarayan kaunoran ya agew, wala so “baleg ya ulop” a manlapud amin a nasyones ya agla makasagmak na ipapatey noagta makapanilalo ed pambilay na ando lan ando ed dalin. Kasin sakey ka la ed sikara?
Pakabidbiran ed Baleg ya Ulop
2. Anto so angitonton ed malinew a pakatalos ed pakabidbiran na baleg ya ulop ed Apocalipsis 7:9?
2 Nen 1923, atebek na saray lingkor nen Jehova a “saray karnero” ed parabolo nen Jesus a naromog ed Mateo 25:31-46 tan say “arum a karnero” a tinukoy to a nikurit ed Juan 10:16 et totoon nawalaan na pankanawnawan manbilay na ando lan ando ed dalin. Nen 1931 saramay adeskribe ed Ezequiel 9:1-11 ya amarkaan ed kamolingan da so anengneng met bilang saraman so walaan na mangaraldalin ya ilalo. Insan nen 1935 naaralan a say baleg ya ulop so manibukel ed kabiangan na arum a karneron klase a sinalita nen Jesus. Natan, sayan apaboran a baleg ya ulop so minilyon la.
3. Akin a say balikas a ‘manal-alagey ed arap na trono’ so agmanutukoy ed mangatatawen a klase?
3 Diad Apocalipsis 7:9, say baleg ya ulop so ag-anengneng a walad tawen. Say ‘panal-alagey da ed arap na trono’ na Dios so agmankaukolan a sikara so walad tawen. Sikara so basta wala ed imaton na Dios. (Salmo 11:4) Say punton say baleg ya ulop, ya “agnayari a bilangen na too,” so aliwan sakey a mangatatawen a klase a nipanengneng diad impangikompara ed agnapihon bilang da diad saman so nisulat ed Apocalipsis 7:4-8 tan Apocalipsis 14:1-4. Ditan et say bilang na inala ed dalin pian onla’d tawen so niparungtal a 144,000.
4. (a) Anto so ‘baleg a kairapan’ a pakaliktaran na baleg ya ulop? (b) Singa nibaga ed Apocalipsis 7:11, 12, siopa so mangiimaton ed baleg ya ulop tan miulop ed sikara diad panagdayew?
4 Ibabaga na Apocalipsis 7:14 so nipaakar ed baleg ya ulop: “Saraya sikara so nanlapu ed baleg ya irap.” Naliktaran da so sankaugsan a gulon nasagmak ed kapiganman diad awaran na too. (Mateo 24:21) Sano sikara so misalsalamat ed Dios tan si Kristo lapud kilalaban da, saman la mikasakey ed sikara so amin a matoor a pinalsa ed tawen diad pangikuan: “Amen! Say bendisyon, tan say gloria, tan say kakabatan, tan say pisasalamat, tan say dayew, tan say pakayari, tan say biskeg, so niiter komon ed Dios tayo ed ando lan ando. Amen.”—Apocalipsis 7:11, 12.
Pamaneknek a Makana ed Kilalaban
5. Panon tayon nadetermina so nakaukolan pian magmaliw a kabiangan na baleg ya ulop?
5 Say kisalba na baleg ya ulop ed baleg a kairapan so nagawan mitunosan ed matunong iran estandarte nen Jehova. Saray panamidbiran a kalidad na saramay niliktar so malinlinew ya asingbat ed Biblia. Sirin, posible ed saray manangaro ed inkatunong so onkiwas natan diad gagalan pamaneknek ed inka-makana ra ed kilalaban. Anto so nepeg a gawaen na saraya?
6. Akin a say baleg ya ulop so manepeg a niyaliling ed karnero?
6 Saray karnero so mauyamo tan matulok. Kanian sanen imbaga nen Jesus a sikato so walaan na arum a karnero ya agkabiangan na mangatatawen a klase, tutukoyen to so totoon aglabat la malabay a manbilay na ando lan ando ed dalin noagta matulok met ed saray bangat to. “Saray karnerok dengelen da so boses ko, et kabat ko ra, tan ontumbok ira ed siak,” so inkuan to. (Juan 10:16, 27) Saraya so totoon peteg ya ondengel tan matulok a manggawa ed ibabaga nen Jesus, a magmaliw iran babangatan to.
7. Antoran kalidad so kaukolan a bayuboan na saray patumbok nen Jesus?
7 Anto ni so arum a kalidad a kaukolan a bayuboan na balang sakey ed sarayan patumbok nen Jesus? Oneebat so Salita na Dios: “Ipulisay yo komon so nipaakar ed abangonan a panagbilay yo, say toon daan . . . tan ikawes yo so too a balo, a sikato so pinalsay Dios ed loob na kaptekan tan matuan kasantosan.” (Efeso 4:22-24) Bayuboan daray kalidad a mamaelet ed pankakasakey na saray lingkor na Dios—“aro, liket, deen, kasungdoan, kauyamoan, kaabigan, sisia, tayadno, dangka.”—Galacia 5:22, 23.
8. Anto so kidungetan na baleg ya ulop legan a susuportaan da so nakdaan?
8 Susuportaan na baleg ya ulop so melag a bilang na saramay walaan na mangatatawen ya ilalo, a mangidadaulo ed kimey na panagpulong. (Mateo 24:14; 25:40) Iiter na arum a karnero iyan suporta, anggaman amta ra a nidunget ira ed isusumpa lapud ta nen kagapo na sarayan kaunoran ya agew, si Kristo Jesus tan saray anghel to so amagit ed si Satanas tan saray demonyo to manlapud tawen. Kabaliksan na saya a “kasi lara so dalin . . . ta say Diablo inmakseb ed sikayo, a wala ed baleg a sanok to, ya amta to a daiset la so panaon to.” (Apocalipsis 12:7-12) Sirin, papalooren nen Satanas so isusumpa to ed saray lingkor na Dios legan a manasingger lay anggaan na sayan sistema.
9. Kaunongay aligwas na saray lingkor na Dios diad panangipulong ed maong a balita, tan akin?
9 Anggaman ed maruksan panamasegsegang, mantutultuloy ya onaabante so kimey na panagpulong. Manlapud pigaran libo labat a managpulong na Panarian nen mansampot so Guerra Mundial I, natan et minilyon la, lapud insipan nen Jehova: “Anggapo so ayura ya agawa a sumpa ed sika ya onaligwas naani.” (Isaias 54:17) Binidbir na anggan say membro na Judion atagey a korte a say kimey na Dios so agnapatunda. Oniay imbaga to ed saray Fariseo nen inmunan siglo nipaakar ed saray babangatan: “Agyo pibiangan so sarayan totoo, et paulyan yo ra lambengat: ta no sayan kanonotan odino sayan gawa nanlapu ed saray totoo, nabuyak naani; balet no nanlapu ed Dios agyo ra nayarian a bagbagen; ompan la ingen no ompatnag kayo a misepakan ed Dios.”—Gawa 5:38, 39.
10. (a) Anto so kabaliksan na “tanda” ed saramay kabiangan na baleg ya ulop? (b) Panon a tutuloken na saray lingkor na Dios so “boses a manlapud tawen”?
10 Saramay kabiangan na baleg ya ulop so niretrato bilang atandaan a para ed kililiktar. (Ezequiel 9:4-6) Say “tanda” so ebidensyan sikara so dedikado ed si Jehova, abautismoan bilang babangatan nen Jesus, tan pambabanikelan dan bayuboan so singa-Kriston personalidad. Tuloken da so “boses a manlapud tawen” a mangibabaga nipaakar ed sankamundoan ya empiryo na palson relihyon nen Satanas: “Ompaway kayo ed sikato, baley ko, pian agkayo nalanor ed saray kasalanan to, tan agkayo manlikna ed saray bakbak to.”—Apocalipsis 18:1-5.
11. Diad anton importantin dalan ya ipapanengneng na baleg ya ulop a sikara so lingkor nen Jehova?
11 Ontan met, imbaga nen Jesus ed saray patumbok to: “Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.” (Juan 13:35) Diad kabaliktaran, saray membro na saray relihyon ed sayan mundo so manpapateyan ed bakal, a mabetbet et makasengeg ed pandurumaan day nasyonalidad! Ibabaga na Salita na Dios: “Dia ed saya mapatnag ira so anak na Dios, tan saray anak na Diablo: anggan siopa a manggawa na agkatunongan agkien na Dios, anggan say agto aroen so agi to. . . . A manaaroan so sakey tan sakey ed sikatayo; aliwan singa si Cain, a betang na maramsak, tan pinatey to so agi to.”—1 Juan 3:10-12.
12. Diad baleg a kairapan, anto so gawaen nen Jehova ed saray relihyoson ‘kakiewan’ a mamapawala na agmakanan bunga?
12 Inyabawag nen Jesus: “Amin a maong a kiew mangiter na maong a bunga, sabalet so aderal a kiew mangiter na aliwan maong a bunga; say maong a kiew agnayarin manbunga na mauges a bunga, et agmet nayarian na aderal a kiew so manbunga na maong a bunga. Balang kiew ya agmanbunga na maong a bunga sikato so nabatang tan ibuntok ed apuy. Kanian diad saray bunga ra so nibiig yo ra.” (Mateo 7:17-20) Say bungan papawalaen na saray relihyon na sayan mundo so mangipapabidbir ed sikara bilang aderal a ‘kakiewan,’ a magano lan deralen nen Jehova diad baleg a kairapan.—Apocalipsis 17:16.
13. Panon ya ipapanengneng na baleg ya ulop a sikara so nankakasakey ya ‘akaalagey ed arap na trono’ nen Jehova?
13 Ipapaimano na Apocalipsis 7:9-15 iray katuaan a mangipaarap ed kiliktar na baleg ya ulop. Nipanengneng iran nankakasakey ya ‘akaalagey ed arap na trono’ nen Jehova, a mangitatandoro ed sankatalbaan ya inkasoberano to. “Inurasan da so kawekawes da, tan sikara pinaputi ra ed dala na Kordero,” ya ipapanengneng ton bibidbiren da so mananakbong-kasalanan a bagat nen Jesus. (Juan 1:29) Indedika ra so inkasikara ed Dios tan saya so insimbolo ra diad inkipalgep ed danum. Panggagayagaan da sirin so malinis a talindeg ed arap na Dios, ya inretrato na amputin kawekawes, tan mangisasaklang ira ed sikato na ‘sagradon serbisyo ed agew tan labi.’ Kasin walaray paraan a nitunos mon nagkalalo so bilay mo ed saman so adeskribe dia?
Saray Gunggona Natan
14. Anto so arum ed saray nikadkaduman gunggonan panggagayagaan la natan na saray lingkor nen Jehova?
14 Nayarin nanenengneng mo iray nikadkaduman gunggona a panggagayagaan la natan na saramay manlilingkor ed si Jehova. Alimbawa, sanen naaralan mo so nipaakar ed saray matunong a gagala nen Jehova, atalosan mo a wala so masnag ya ilalo ed arapen. Kanian walaan ka la natan na peteg a gagala ed bilay—a panserbian so tuan Dios a walaay magayagan panilalo ed maandon bilay diad paraison dalin. On, say Arin Jesu-Kristo “irawat to [so baleg ya ulop] ed saray subol na danudanum na bilay.”—Apocalipsis 7:17.
15. Panon a nagugunggonaan iray Tastasi nen Jehova diad panutumbok da ed saray prinsipyo na Biblia nipaakar ed politika tan moral?
15 Say sakey a makapakelaw a gunggonan panggagayagaan na baleg ya ulop et say aro, pankakasakey, tan pantutunosan a naromog ed limog na saray lingkor nen Jehova ed sankamundoan. Lapud amin tayo so natatagano ed parehon espiritual a tagano, amin tayo so manguunor ed parehon ganggan tan prinsipyo a naromog ed Salita na Dios. Satan so rason no akin ya ag-itayo naapag-apag na saray ideolohiya na politika odino nasyon. Ontan met, pansiasiansiaen tayo so atagey iran estandarte ed moral a kakaukolanen na Dios ed saray totoo to. (1 Corinto 6:9-11) Kanian, imbes a sagmaken so panggugulo, agpankakasakey, tan imoralidad a kasmak ed mundo, panggagayagaan na saray totoo nen Jehova so tatawagen ya espiritual a paraiso. Imanoen no panon so inkadeskribe na saya ed Isaias 65:13, 14.
16. Anggaman ed saray probleman kaslakan ed bilay, saray kabiangan na baleg ya ulop so walaan na anton ilalo?
16 Andi, saray totoon lingkor nen Jehova so aliwan ayadyari. Tan apektado ira na saray probleman kaslakan ed bilay ed sayan mundo, a singa say panasagmak ed kairapan odino pagmamaliw ya inosentin biktima na pambabakal na nasyones. Sasagmaken da met so sakit, paniirap, tan patey. Balet walaan ira na pananisia a dia ed balon mundo, “punasen [na Dios] so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot.”—Apocalipsis 21:4.
17. Anggan anto so nayarin nagawa ed sikatayo natan, anton makapakelaw ya arapen so manatalaran ed saraman so mandadayew ed tuan Dios?
17 Anggan naandi bilay mo natan lapud inkatakken, sakit, aksidente, odino panamasegsegang, sika so paolien nen Jehova ed bilay diad Paraiso. (Gawa 24:15) Saman la et mantultuloy kan manggayaga ed espiritual a piesta legan na Milenyon Uley nen Kristo. Onaralem so panangarom ed Dios legan mon nanenengneng so sankaliketan a kasusumpal na saray gagala to. Tan saray pisikal a bendisyon ya itarya ed satan nen Jehova so lalon mamaaralem na panangarom ed sikato. (Isaias 25:6-9) Agaylan makapakelkelaw ya arapen so manatalaran ed saray totoo na Dios!
Repason Pantongtongan
• Anton nikadkaduman nagawa so isisiglaot na Biblia ed baleg ya ulop?
• No tuan labay tayo so napibilang ed satan a baleg ya ulop a manggagayaga ed pabor na Dios, anto so nepeg a gawaen tayo la natan?
• Panon kaimportante ed sika iray bendisyon a panggagayagaan natan na baleg ya ulop tan panggayagaan da ni ed balon mundo na Dios?
[Litrato ed pahina 123]
Minilyon a baleg ya ulop so nankakasakey a mandadayew ed tuan Dios