Nibilang a Makanepegan ya Iwanwan ed Subo-subol na Danum na Bilay
“Say Kordero . . . sikatoy pastol da, tan sikara so irawa’to ed saray subol na danudanum na bilay.”—APO. 7:17.
1. Diad Biblia, panon a tinukoy iray alanaan a Kristiano, tan anton responsabilidad so inter nen Jesus ed sikara?
DIAD Biblia, saray alanaan a Kristianon mangaasikaso ed kaykayarian nen Kristo ed dalin et tinukoy a “matoor tan makabat ya aripen.” Sinuri nen Kristo iyan “aripen” nen 1918 tan anengneng ton sarayan alanaan et matoor a mangitatarya na espiritual a “tagano ed panaon a kinepeg to.” Kanian manlapu la’d satan, aliketan si Jesus, say Katawan, a mangipudir ed sikara na saray “amin a wala ed sikato.” (Basaen so Mateo 24:45-47.) Diad onian paraan a lilingkoran na saray alanaan so arum a managdayew nen Jehova ed dalin, sakbay dan naawat so tawir da ed tawen.
2. Ideskribe iray kaykayarian nen Jesus.
2 No sakey kan amo odino katawan, walay kanepegan mo ed amin a kayarian mo tan sarag mon usaren iratan diad antokaman a paraan a labay mo. Saray kaykayarian nen Jesu-Kristo, say introno nen Jehova ya Ari, et laktipen toy amin a bengatlan walad dalin a misiglaotan ed Panarian ontan met ed saray sakop na satan. Kabiangan ed satan imay “baleg ya ulop” ya anengneng nen apostol Juan ed pasingawey. Oniay impaneskribe nen Juan ed satan: “Kayari sarayan bengatla ninmengneng ak, tan nia, so sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita, a manalalagey ira’d arap na trono, tan ed arap na Kordero, a nankawes ira na kawekawes ya amputi, tan wala so palmas ed saray kalimaan da.”—Apo. 7:9.
3, 4. Panon a nibagan saramay kabiangan ed baleg ya ulop et apribilehyoan a maong?
3 Saray membro na baleg ya ulop et sikara lanlamang imay ‘arum a karnero’ a tinukoy nen Jesus. (Juan 10:16) Say ilalo ra et pambilay na andi anggaan diad paraison dalin. Matalek iran sikaray iwanwan nen Jesus ed “subol na danudanum na bilay, tan say Dios et punasen to so balang lua ed kamataan da.” Lapud satan, “inurasan da so kawekawes da, tan sikara so pinaputi ra ed dala na Kordero.” (Apo. 7:14, 17) Ipapatnag day pananisia ed bagat nen Jesus, kanian diad imaton na Dios et sikaray ‘akakawes na amputi’ tan nipasen a matunong a kakaaro na Dios a singa si Abraham.
4 Sakey ni, lapud sarayan ondarakel a baleg ya ulop na arum a karnero et ipapasen na Dios a matunong, makapanilalo iran niliktar no deralen la iyan sistema na bengabengatla diad baleg ya irap. (Sant. 2:23-26) Sarag day onapit ed si Jehova, tan bilang grupo et walaan ira na alay abig ya ilalon niliktar diad Armagedon. (Sant. 4:8; Apo. 7:15) Ag-ira mankukurang ya independente, noagta mabulbulos iran manlilingkor diad panangiwanwan na mangatatawen ya Ari ra tan saray alanaan ya agagi to ed dalin.
5. Panon a susuportaan na saramay kabiangan ed baleg ya ulop iray alanaan ya agagi nen Kristo?
5 Saray alanaan a Kristiano so akasagmak tan mantultuloy nin managmak na pirmin isusumpa manlapud mundo nen Satanas. Anggaman ontan, makapanmatalek ira ed suporta na baleg ya ulop a kakaiba ra. Bangta dagdaiset la natan iray alanaan a Kristiano, say baleg ya ulop balet et ondarakel na nilasus libo kada taon. Agnayarian na saray alanaan a personal ya asikasoen so kada kongregasyon ed interon mundo a manbilang lay manga 100,000. Kanian, sikaray nasusuportaan na arum a karnero diad panlilingkor na saray kualipikadon lalaki, a kabiangan na baleg ya ulop, bilang elder diad saray kongregasyon. Ontutulong iraya a mangasikaso ed minilyon a Kristianon nimatalek ed “matoor tan makabat ya aripen.”
6. Panon a nipropesiya so panuporta na arum a karnero ed saray alanaan a Kristiano?
6 Sayan mabulos a pananuporta na kakaiba ran arum a karnero ed saray alanaan et impasakbay nen propeta Isaias. Oniay insulat to: “Onia so kuan nen Jehova, say gawa [“agbabayaran iran trabahador,” NW] na Ehipto, tan say lako na Etiopia, tan Saba, totoo ya atagey, onla ra naani ed sika, tan sikara naani kayarian mo: ontumbok ira naani ed sika.” (Isa. 45:14) Natan, say arum a karnero et ontutumbok ed panangiwanwan na alanaan ya aripen tan say Mananguley ya Ulop na satan. Bilang “agbabayaran iran trabahador,” sarayan arum a karnero et mabulbulos tan interon puson manguusar ed biskeg tan kaykayarian da pian suportaan so sankamundoan a panagpulong a kimey ya impudir nen Kristo ed saray patumbok ton alanaan diad dalin.—Gawa 1:8; Apo. 12:17.
7. Antoy gagala na pangipapasal ed baleg ya ulop?
7 Legan a susuportaan na baleg ya ulop iray alanaan ya agagi ra, sikaray nipapasal met a magmaliw a pinagka-pundasyon na balon sosyedad na totoo a manbilay kayari na Armagedon. Sayan pundasyon et nepeg a malet, tan saray membro to et nepeg ya aglabat mabulos noagta makasarag met a manumpal ed saray ganggan na Katawan. Iikdan na pankanawnawa so kada Kristiano a mamaneknek a sikatoy nausar nen Jesu-Kristo ya Ari. No natan ni labat et ipapatnag to lay pananisia tan katooran to, ipapanengneng to sirin a sano sikatoy iganggan na Ari diad balon mundo et sikatoy aliston mangunor.
Papaneknekan na Baleg ya Ulop so Pananisia Ra
8, 9. Panon a papaneknekan na saray membro na baleg ya ulop so pananisia ra?
8 Say arum a karnero a kakaiba na saray alanaan a Kristiano so mamapaneknek ed pananisia ra diad nanduruman paraan. Unona, susuportaan da iray alanaan diad pangiyaabawag ed maong a balita na Panarian na Dios. (Mat. 24:14; 28:19, 20) Komadua, mabulos iran manpapasakop ed panangiwanwan na Mananguley ya Ulop.—Heb. 13:17; basaen so Zacarias 8:23.
9 Say komatlo et diad pangiyaaplika ra ed saray matunong a prinsipyo nen Jehova. Panggugunaetan dan paaligwasen so “aro, liket, deen, kasungdoan, kauyamoan, kaabigan, sisia, tayadno, [tan] dangka.” (Gal. 5:22, 23) Natan, tua a dagdaiset so totoon mangitutunos na kabibilay da unong ed saratan a kalidad, tan say aagamilen da laingen et “saray gawa na laman.” Balet siansian determinado iray membro na baleg ya ulop ya ompaliis ed “pikakalugoran, karutakan, kaalakan na laman, pididios ed saray talintao, panag-anito, pambubusolan, pankokolkol, imon, sanok, pansesepakan, inka-apag-apag, saray pamipikewet ed pananisia, saray sibletan, pampapateyan, panagbuanges, panduroypo, tan saray miulibay ed saraya.”—Gal. 5:19-21.
10. Anto so determinasyon na saray membro na baleg ya ulop?
10 Lapud ag-itayo ayadyari, walay irap-irap na pamawala tayo na saray bunga na espiritu, napaliisan iray gawa na laman, tan naresistian so desdes na mundo nen Satanas. Anggaman ontan, determinado itayon agpadaeg ed pakakadismaya tayo ed saray kakapuyan tayo, sagpaminsan ya isasaew tayon mangalig ed si Jesus, odino ed kaleteyay laman tayo, diad ontan et ag-onkapuy so pananisia tayo odino ombetel so panangaro tayo ed si Jehova. Amta tayon sumpalen a sumpalen nen Aman Jehova so impromiso ton iliktar so baleg ya ulop diad baleg ya irap.
11. Antoran taktika so uusaren nen Satanas diad getman pakapuyen so pananisia na saray Kristiano?
11 Balet, siansia nin alerto itayon naynay lapud amta tayon say peteg a kalaban tayo et say Diablo, ya agbasta-basta onsusuko. (Basaen so 1 Pedro 5:8.) Sinali to lan usaren iray apostata tan say arum ni ra pian napanisia itayon saray tutumboken tayon bangat et palso. Balet, mabetbet lan onsasaew itan a taktika. Ontan met, anggaman no maminsan et patayatayen na panamasegsegang so panagpulong a kimey tayo, diad kaslakan et papabiskegen laingen na satan so pananisia na saramay napapasegsegang. Kanian, mabetbet lan uusaren nen Satanas so pakana ya isisipen ton mas epektibo a mamaletey ed pananisia tayo. Aanamoten toy inkadismaya tayo. Saramay Kristiano nen inmunan siglo et apasakbayan nipaakar ed sayan peligro. Oniay inkuan ed sikara: “Motektek yo sirin so nansungdo [si Kristo] ed ontan la ya insumlang na saray managkasalanan ed sikaton dili.” Akin? “Pian agkayo komon nakesawan, ya onkapuy kayo ed saray kamarerwa yo.”—Heb. 12:3.
12. Panon a mamabiskeg ed saray nadidismaya so simbawa na Biblia?
12 Asali yo ta lan alikna a labay yo lay onsuko? Kasin say pakalikna yo no maminsan et anggapo lay maong a nagagawaan yo? No ontan so nalilikna yo, agyo aabuloyan si Satanas a manganamot ed satan pian patundaen kayo lan manlingkor ed si Jehova. Say mapetepet a panagaral na Biblia, masimoon a panagpikasi, tan regular a pipiaral tan pililimog ed saray agagi so mamabiskeg ed sikayo diad ontan et ‘ag-onkapuy so kamarerwa yo.’ Insipan nen Jehova ed saray manlilingkor ed sikato a pasimbaloen toy biskeg da, tan talagan nailaloan tayo itan. (Basaen so Isaias 40:30, 31.) Manpokus kayo ed saray Kristianon aktibidad. Paliisan yo iray makaupot na oras a pakaabalaan, tan usar yoy panaon yo ed panulong ed arum, diad ontan et napabiskeg kayo a mansungdo anggano walaray pakakadismayaan yo.—Gal. 6:1, 2.
Niliktar Manlapud Baleg ya Irap tan Onloob ed Balon Mundo
13. Anton kimey so manatalaran ed saray makaliktar ed Armagedon?
13 Kayari na Armagedon, minilyon ya agmatunong so napaoli tan kaukolan a bangatan na saray dalan nen Jehova. (Gawa 24:15) Kaukolan dan naaralan so nipaakar ed dondon bagat nen Jesus; mas nagkalalo ni, nepeg iran nabangatan a mangipatnag na pananisia ed satan pian nagunggonaan ira. Kaukolan dan iwaklit iray palson sisisiaen da tan italirak so dati ran kabibilay. Nepeg dan naaralan no panon ya ikawes so too a balo a pakapangibiigan ed sakey a tuan Kristiano. (Efe. 4:22-24; Col. 3:9, 10) Talagan amayamay so gawaen na saray arum a karnero a niliktar ed Armagedon. Seguradon makapalikliket so pangisaklang ed si Jehova na ontan a serbisyo, ta anggapo la’d satan iray pakadesdesan tan pakaabalaan a walad sayan marelmeng a mundo!
14, 15. Ideskribe no antoray pantongtongan na saramay akaliktar ed baleg ya irap tan saramay apaolin matunong.
14 Diad satan et dakel met so aralen na saramay matoor a lingkor nen Jehova a nambilay antis na impanministeryo nen Jesus diad dalin. Naamtaan da no siopa so insipan a Mesias, a tinaltalaranan da balet ta agda la anengneng. Nen mabilay ni ra, apaneknekan da lan mabulos iran paibangat ed si Jehova. Isipen pa labat so agaylan pribilehyo tan liket diad panulong ed sikara, alimbawa, say pangipaliwawa ed si Daniel no panon ya asumpal iramay propesiyan insulat to balet ta agto atalosan!—Dan. 12:8, 9.
15 Siempre, aliwa labat a saramay apaoli so makaaral ed sikatayo, anggan sikatayo met et dakel so nitepet tayo ed sikara. Nibaga ra ed sikatayo iray arum nin impormasyon nipaakar ed saray ebenton asalambit ed Biblia, balet ta ag-nidetalye. Nonot yo pa so liket na pakaamta ed saray personal a detalye na bilay nen Jesus manlapud say kapinsan ton Juan Bautista! Seguradon diad saray naaralan tayo ed sarayan matoor a tasi et lalon natalo-talosan tayo so Salita na Dios nen say natan. Saray inatey lan matoor a lingkor nen Jehova, kaiba la iramay kabiangan na baleg ya ulop ya inatey legan na panaon na anggaan, so makaawat na “magmaong a kioli.” Ginmapo iran nanlingkor ed si Jehova diad mundon uuleyan nen Satanas. Seguradon malikeliket iran mangituloy ed satan diad balon mundo, sano say kipapasen na bengabengatla et talagan alay abig la!—Heb. 11:35; 1 Juan 5:19.
16. Unong ed propesiya, panon so kagawa na Agew na Panangukom?
16 Walay panaon legan na samay Agew na Panangukom a “saray libro” odino lukot et nibuskag. Saraya, pati say Biblia, so pangibasiyan na pangukom ed amin a mabilay no kasin makanepegan iran makagamor na bilay ya andi-anggaan. (Basaen so Apocalipsis 20:12, 13.) Diad pansamposampot na Agew na Panangukom, naikdan la’d satan na magenap a pankanawnawa so kada indibidual pian nipanengneng no iner so dadapagan to ed isyu na sankatalbaan ya inkasoberano. Sikato kasi manpasakop ed Panarian na Dios tan paiwanwan ed Kordero diad “subol na danudanum na bilay,” odino andi? (Apo. 7:17; Isa. 65:20) Naikdan met lay pankanawnawa so amin pian personal a mandesisyon, ya agla iimpluensyaan na atawir a kasalanan odino marelmeng a kaliberliber. Anggapoy makapankuestion ed inkaptek na kaunoran a panangukom nen Jehova. Say naderal labat et saramay marelmeng.—Apo. 20:14, 15.
17, 18. Antoran bengatla so maliket a tatalaranan na saray alanaan a Kristiano tan arum a karnero diad Agew na Panangukom?
17 Natan et manpirpirawat lan manguley ed Agew na Panangukom iray alanaan a Kristiano a nibilang a makanepegan a makaawat na Panarian. Talagan engrande so pribilehyo ra! Satan a mismon ilalo so mamapakiwas ed sikaran ontumbok ed samay insimbawa nen Pedro ed saramay agagi ra nen inmunan-siglo: “Pampelengan yo ni komon a paligenen so inkatawag tan inkapili yo: ta dia ed panggawa yo ed sarayan bengatla, agkayo natiror anggan kapigan. Ta dia ed onia masulo-sulok so kiabuloy ed sikayo ed iloloob ed andi anggaan a nanarian na Katawan tan Manangilaban tayo a Jesu-Kristo.”—2 Ped. 1:10, 11.
18 Mililiket so arum a karnero ed saray alanaan ya agagi ra tan determinado iran manuporta ed sikara. Bilang kakaaro na Dios natan, napapakiwas iran manggawa ed anggaay nayarian da ed panaglingkor ed Dios. Diad Agew na Panangukom, sikaray maliket a manuportan sigpot-puso ed saray uksoyan na Dios legan iran iwawanwan nen Jesus ed subosubol na danum na bilay. Insan, sikaray nibilang a siansia a makanepegan a lingkor nen Jehova diad dalin ed andi-anggaan!—Roma 8:20, 21; Apo. 21:1-7.
Kasin Nanonotan Yo?
• Antoray laktipen na saray kaykayarian nen Jesus?
• Panon a susuportaan na saray kabiangan ed baleg ya ulop iray alanaan ya agagi ra?
• Antoran pribilehyo tan ilalo so panggagayagaan na baleg ya ulop?
• Anto so panmoria yo ed Agew na Panangukom?
[Litrato ed pahina 25]
Inurasan na saray kabiangan ed baleg ya ulop iray kawes da tan pinaputi ra ed dala na Kordero
[Litrato ed pahina 27]
Anto so pitamitam yo lan naaralan ed saramay napaolin matoor?