Kapitulo Desisais
“Nawalaan na Ampetang ya Aro ed Balang Sakey”
1. Antoy mabetbet a pandidinayewan na saray balobalo ed pantitipon na saray Tasi nen Jehova?
DIAD primeron pakaatendi na totoo ed saray miting na Tastasi nen Jehova, mabetbet a mandinayew ira ed nipapanengneng ya aro. Satan so nanengneng da diad panangabrasa ed sikara tan diad ampetang ya ulopan. Sayan aro so naiimano met na saray bisita ed saray kombension tayo. Insulat na reporter ed sakey a peryodiko so nipaakar ed sakey a kombension: ‘Anggapo so aka-druga odino akainom na alak. Anggapo so eyagan tan ingalan. Anggapoy tulakan. Anggapoy desdesan. Anggapoy manaayewan. Anggaporay mabanday a lureyan odino mabanday a panagsalita. Anggapoy mansisigarilyo. Anggapoy mantatakew. Anggapoy mantatakatak na lata ed saray sular. Talagan nikadkaduma.’ Amin na saya so ebidensya na aro, say nengneng ya “agmanugalin mabanday, agto anapen so dili iran pankaabigan to.”—1 Corinto 13:4-8, NW.
2. (a) Nasabi panaon, anto so nepeg a napatnagan no nipaakar ed panangipanengneng tayo na aro? (b) Diad pangalig ed si Kristo, anton nengneng na aro so kaukolan tayon bayuboan?
2 Say inaagin aro so makatantandan pakabidbiran ed saray puron Kristiano. (Juan 13:35) Legan ya ombubulaslas itayo ed espiritual, naaralan tayon ibalikas so aro a lalon nagnap. Impikasi nen apostol Pablo a say aro na kapara ton Kristiano so “ondaak a lalo nin lalo.” (Filipos 1:9) Impanengneng nen apostol Juan a say aro tayo so nepeg a manangisakripisyo. Insulat to: “Dia ed saya abidbir tayo so aro, ta sikato [say Anak na Dios] inter to so bilay to nisesengeg ed sikatayo: tan sikatayo nepeg tayo met ya italaga so bilay tayo nisesengeg ed saray agagi.” (1 Juan 3:16; Juan 15:12, 13) Kasin aktual ya iter tayo so bilay tayo a nisesengeg ed saray agagi tayo? Anggaman maslak a kipapasen so agmankaukolan na ontan, kaunongay kalaknab na pambabanikel tayon ontulong ed sikara natan, anggan sano aliwan kombeniente?
3. (a) Diad anton dalan a nayarin nipatnag tayo a nagkalalo so aro tayo? (b) Akin a makanakana natan so pakawalaan na ampetang ya aro ed balang sakey?
3 Tekep na saray gawa tayon mangipatnag na dilin-manangisakripisyon espiritu, kaukolan a nawalaan itayo na puro tan maligsan liknaan ed saray agagi tayo. Ipapaseseg na Salita na Dios ed sikatayo: “[Diad] aroan na sanaagi, matamoy komon so aroan na sakey tan sakey.” (Roma 12:10) Ontan so liknaan tayon amin ed arum a totoo. Balet kasin naaralan tayon liknaen so ontan a panamabli ed arum ni? Legan a manasingger so anggaan na sayan daan a sistema, makana ed sikatayo so lalon iyapit ed saray kaparan Kristiano. Ibabaga na Biblia: “Say anggaan na amin a bengatla so manasingger. . . . Manuna ed amin a bengatla, nawalaan na ampetang ya aro ed balang sakey, lapud sakbongan na aro so dakel a kasalanan.”—1 Pedro 4:7, 8, NW.
Sano Onlesa Iray Problema
4. (a) Akin a nayarin onlesa iray problema ed baetan na saray agagi ed sakey a kongregasyon? (b) Anggaman nayarin ag-itayo onkiling a manggawa ed satan, anton kaabigan so pansumpalan no iyaplika tayo so simbawa na Biblia?
4 Siempre, leleg a sikatayo so ag-ayadyari, walaray bektan makagawa itayo na bengatlan makapasakit ed arum. Saray agagi tayo met so nayarin mankasalanan ed sikatayo diad nanduruman paraan. (1 Juan 1:8) No wala ka ed ontan a kipapasen, anto so nepeg mon gawaen? Mangiiter so Kasulatan na nakakaukolan a panangiwanwan. Balet nayarin agmitukoyan so ibabaga na satan ed labay tayon gawaen bilang ag-ayadyarin totoo. (Roma 7:21-23) Anggaman kuan, say magunaet a panangiyaplika tayo ed simbawa a lugan na Biblia so mangipatnag ed masimoon a pilalek tayon mamaliket ed si Jehova. Say panggawa ed satan so mamabulaslas met ed aro tayo ed arum.
5. No sikatayo so apasakitan na sakey, akin ya ag-itayo ombales?
5 Sano nasakitan so totoo, no maminsan et labay day ombawi ed samay akaopendi. Balet ta lalon palooren to so kipapasen. No nakaukolan so ibales, satan so ipalima tayo la ed Dios. (Uliran 24:29; Roma 12:17-21) Nayarin salien na arum a paliisan so piarap ed akaopendi. Balet agtayo itan gagawaen ed saray kapara tayon managdayew, lapud ta mandedependi met so pakaabobon na mismon panagdayew tayo diad pangaaro tayo ed agagi tayo. (1 Juan 4:20) Sirin, insulat nen Pablo: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidaleman to ed siopaman; unong ed impamerdona na Katawan ed sikayo, ontan met so gawaen yo.” (Colosas 3:13) Kasin nagawaan yo itan?
6. (a) Panon kabetbet so pamerdona tayo ed agi tayo? (b) Say pakatalos ed anto so ontulong ed sikatayon mangarap ed kasalanan a sumpad sikatayo?
6 Komusta balet no ulit-uliten na sakey so mankasalanan ed sikatayo anggaman aliwan grabe iran kasalanan a sengeg na pakaekalan to ed kongregasyon? Para ed ontan iran memelag a kasalanan, insuheri nen apostol Pedro so pamerdona ya “angga ed maminpito.” Balet inkuan nen Jesus: “[Aliwan] angga ed maminpito, ingen, angga ed maminpitomplo a pito.” Impabitar to so kinabaleg na otang tayo ed Dios no ipareng ed nayarin otang na anggan siopan too ed sikatayo. (Mateo 18:21-35) Diad dakel a paraan et makapankakasalanan itayo ed Dios ya agew-agew—no maminsan et diad sinisiblet a kiwas, ed no anto so ibaga odino isipen tayo, odino ed no anto so agtayo agawaan—ya agtayo anggan namomoria a sikatayo so mankakasalanan. (Roma 3:23) Ingen, mantutultuloy a say Dios so mapangasi ed sikatayo. (Salmo 103:10-14; 130:3, 4) Kakaukolanen ton ipanengneng tayo met so ontan ed balang sakey. (Mateo 6:14, 15; Efeso 4:1-3) Diad ontan et aagamilen tayo so nengneng na aro ya “agmanbibilang na inkasakitan.”—1 Corinto 13:4, 5, NW; 1 Pedro 3:8, 9.
7. Anto so nepeg tayon gawaen no wala so paniimbelan na sakey ya agi ed sikatayo?
7 No maminsan et nayarin namoria tayo ya anggaman andian itayo na irap na linawa ed agi tayo, wala so paniimbelan to ed sikatayo. Desidien tayo komon a ‘sakbongan itan na aro,’ a singa isusuheri na 1 Pedro 4:8. Odino nayarin unona itayo lan mitongtong ed sikato tan panggunaetan ya ipawil so mareen a relasyon.—Mateo 5:23, 24.
8. No akagawa so sakey a kapananisiaan na bengatlan makapagonigon ed sikatayo, anto so nayarin gawaen nipaakar ed satan?
8 Nayarin say sakey a kapananisiaan so manggagawa na bengatlan mangogonigon ya aliwa lambengat ed sika noagta ontan met ed arum. Agta maabig so pitongtong ed sikato? Nayari pa lagi. No ipaliwawam a mismo ed sikato so problema diad mauyamon paraan, saya so nayarin mamawala na maabig a resulta. Balet nepeg mon tepetan ya unona so inkasika: ‘Talaga kasin agmakasulatan so gagawaen to? Odino kasin say problema so nisesengeg ed binalegan tan inkipasalan ko so miduma ed sikato?’ Manalwar ya agmangileletneg na saray dilin estandartem a pangukoman mo met ed arum. (Santiago 4:11, 12) Anggapoy panangiduman aawaten nen Jehova so totoon manlalapud amin a nengneng na binalegan tan maanos ed sikara legan ya ombubulaslas ira ed espiritual.
9. (a) Siopa so mangasikaso ed saray kaso na graben gawan-mauges ed kongregasyon? (b) Kapigan a responsabilidad na samay nankasalananan ya onkiwas ya unona, tan diad anton gagala?
9 No sakey ed kongregasyon so nalalanor ed graben gawan-mauges, a singa say imoralidad, tampol a saya so asikasoen. Na siopa? Saray mamatatken. (Santiago 5:14, 15) Anggaman ontan, no say kasalanan so agawaan a sumpad sakey, anganko ta diad pamaakaran na negosyo odino diad makapasakit ya impangusar ed dila, sirin samay nankasalananan so nepeg ya unonan manbanikel ya onasingger ed nankasalanan. (Mateo 18:15) No agnasolbar na satan so pamaakaran, kaukolan a gawaen so ontumbok a kundang, unong a nidatak ed Mateo 18:16, 17. Say panangaro ed nalilingon agi tayo tan say pilalek a sikatoy ‘nagamoran’ so ontulong ed sikatayon manggawa ed saya diad paraan a nasabi tayo so puso.—Uliran 16:23.
10. Sano onlesa so problema, anto so ontulong ed sikatayo pian sustoy panmoria ed pamaakaran?
10 Sano onlesa so problema, balanglan baleg odino melag, nagunggonaan itayo no pambanikelan tayon talosan no panon so panmoria nen Jehova ed satan. Agto abobonan so kasalanan ed antokaman a nengneng, tan diad inggeter ton panaon, saray anggapoy panagbabawin managgawa na graben kasalanan so nalinisan ed organisasyon to. Anggaman ontan, agtayo lilingwanan ya amin tayo so mankakasalanan ed memelag a paraan tan mankaukolan na andukey-a-panangitepel tan panangasi to. Sirin si Jehova so angiletneg na pangaligan a kaukolan ya aligen tayo sano sikatayo so nipaarap ed saray kasalanan na arum. Sano mapangasi itayo, iyaaninag tayo so panangaro to.—Efeso 5:1, 2.
Anapen Iray Dalan Pian “Manpalaknab”
11. Akin a pinaseseg nen Pablo iray taga- Corinto pian “manpalaknab”?
11 Pigaran bulan a pinabiskeg nen Pablo so kongregasyon diad Corinto, Gresya. Sikatoy nankimey na impasya diad impanulong ed saray agagi diman, tan inaro to ra. Balet arum ed sikara so andian na maligsan liknaan parad sikato. Mabalabalaw ira. Sikara so pinaseseg ton “manpalaknab” diad panangibalikas ed panangaro ra. (2 Corinto 6:11-13, NW; 12:15) Maabig no konsideraen tayon amin so kalaknab na panangipatnag tayo na panangaro ed arum tan anapen iray dalan pian manpalaknab.—1 Juan 3:14.
12. Panon tayon napabulaslas so panangaro tayo ed amin diad kongregasyon?
12 Kasin wala ra ed kongregasyon so mairap tayon nakaimel-imel? No palabasen tayo so antokaman a nayarin pandurumaan tayo ed personalidad—a singa unong na labay tayon gawaen da ed sikatayo—saya so ontulong a mamaligsa ed relasyon tayo. Napaaligwas met so liknaan tayo ed sikara no nengnengen tayoray maabig a kalidad da tan iyapasakey ed saraya. Saya so seguradon mamabulaslas na panangaro tayo ed sikara.—Lucas 6:32, 33, 36.
13. Panon tayon makapanpalaknab diad panangipanengneng na aro ed saray kakongregasyonan tayo?
13 Akoen tayon walaray limitasyon na nagawaan tayo parad arum. Ompan agtayo nayarian ya ibano so balang sakey ed kada pantitipon. Nayarin imposible ya ipibali so balang sakey sano imbitaan tayoray kakaaro ed sakey a panangan. Balet kasin makapanpalaknab itayo dia ed anggan pigaran minuto labat a pikabisado tayon maong ed sakey diad kongregasyon tayo? Nayari kasin sagpaminsan ya imbitaan tayo so sakey ya agtayo tanto kabkabat a miulop ed sikatayon manpulong?
14. Sano walaray Kristianon agtayo niran balot akabkabat, panon tayon nipanengneng so ampetang ya aro ed balang sinansakey?
14 Maabig iran pankanawnawa iray Kristianon kombension a pamalaknaban na aro tayo. Nayarin wadtan so nilibo-libo. Agtayo nakabat iran amin, balet makakiwas itayo ed paraan a mangipanengneng na panangiyuna tayo ed pankaabigan da nen say inkakombiniente tayo. Diad baetan na saray sesyon, nayarian tayon ipanengneng so personal ya interes diad ikiwas tayon unona a mitongtong ed saray asingger ed sikatayo. Nasabi agew et amin a manaayam ed dalin so magmaliw a sanaagi, nankakasakey diad panagdayew ed tuan Dios tan Ama na amin. Agaylan gayaga so pakapankakabat na balang sinansakey! Sikatayo so pakiwasen na ampetang ya aro diad panggawa na ontan. Akin ya agla igapo natan?
Repason Pantongtongan
• Sano onlesa iray problema ed baetan na saray Kristiano, panon irayan solbaren, tan akin?
• Legan a sikatayo so ombubulaslas ed espiritual, diad antoran dalan a say panangaro tayo so ombulaslas met?
• Panon a posible so pangipanengneng na ampetang ya aro ed aliwa lambengat ed saray maapit a kakaaro?
[Litrato ed pahina 148]
Nipanengneng so Kristianon aro ed dakel a paraan, a singa diad saray pantitipon ed kongregasyon