Kapitulo Beinte

Lawas Nodnonoten so Agew nen Jehova

1. Sanen inmunan naaralan mo ya asingger la so kalukpos ed saray ey-ey ed sayan daan a mundo, anto so liknaan mo?

SAKEY ed saray unonan bengatlan naaralan mo ed Biblia et say gagala nen Jehova a say interon dalin so magmaliw a paraiso. Diad satan a balon mundo, naandi la so bakal, krimen, kairapan, sakit, ot-ot, tan naandi la so ipapatey. Anggan saray inaatey so napaoli la ed bilay. Agaylan makapakelaw iratan ya iilaloan! Say magano lan kasumpal na amin na saratan so nidadanet diad pakapatnagan a say agnanengneng a kiwawala nen Kristo bilang manuuley ya Ari so ginmapo la nen 1914 tan nanlapula’d saman et wala itayo ed kaunoran iran agew na sayan marelmeng a mundo. Diad sampot na sarayan kaunoran ya agew, deralen nen Jehova iyan peles a sistema na bengabengatla tan onsublay la so insipan a balon mundo!

2. Anto so “agew nen Jehova”?

² Sayan onsasabin panaon na kadederal so tinawag na Biblia ya “agew nen Jehova.” (2 Pedro 3:10, NW) Satan so “agew na sanok nen Jehova” a sumpad interon mundo nen Satanas. (Sofonias 2:3) Mamantok itan diad ‘bakal na baleg ya agew na Dios a Makapanyarin-amin . . . , a dia ed Hebreo et manngaran na Armagedon,’ a “saray arari na amin a mundo” so naderal. (Apocalipsis 16:14, 16) Kasin say dalan na panagbilay mo so mangipapatnag ed panagmatalek mo a sayan “agew nen Jehova” so asingger la?​—Sofonias 1:14-18; Jeremias 25:33.

3. (a) Kapigan so isabi na agew nen Jehova? (b) Panon ya apaneknekan a makagunggona so ag-impangipaamta nen Jehova ed “satan ya agew ono satan ya oras”?

³ Ag-ibabaga na Biblia ed sikatayo so eksakton petsa no kapigan so isabi nen Jesu-Kristo bilang Manamatey a tinuro nen Jehova sumpad sayan sistema na bengabengatla nen Satanas. “Balet ed satan ya agew ono satan ya oras anggapo so makapikabat, anggan saray angheles ed tawen, anggan say Anak, noag say Ama,” kuan nen Jesus. (Marcos 13:32) No wala so agmangaron peteg ed si Jehova, labay dan iguntang ed kanonotan da so agew to tan mamasya ni ra ed sekular iran trabaho. Balet saramay tuan mangaaro ed si Jehova so manlingkor ed sikato diad interon-kamarerwa, anggan kapigan so isabi anggaan na sayan marelmeng a sistema.​—Salmo 37:4; 1 Juan 5:3.

4. Anto so imbaga nen Jesus bilang pasakbay?

⁴ Bilang pasakbay ed saray manangaro ed si Jehova, inkuan nen Jesus: “Manlikas kayo, manbantay tan mikasi kayo, ta agyo amta no kapigan a panaon.” (Marcos 13:33-37) Papasesegen to itayon ag-aabuloyan a say panangan tan panag-inom odino “saray kapagaan ed bilay” so mangala na dakel ya imano tayo a naandi lay panmoria tayo ed inkaseryoso na panaon.​—Lucas 21:34-36; Mateo 24:37-42.

5. Singa impaliwawa nen Pedro, anto so itarok na agew nen Jehova?

⁵ Sikatayo met so sisimbawaen nen Pedro a lawas nodnonoten “so kiwawala na agew nen Jehova, a diad panamegley na satan et saray katawenan a napoolan so natunaw tan saray elemento so natunaw ed manliob a petang.” Amin a gobierno na too​—“saray katawenan”—​so naderal, singa ed marelmeng a sosyedad na too ed inkalapagan​—“dalin”—​tan “saray elemento” na satan, saray ideya tan gawagawa na sayan mauges a mundo, singa say awawey ya isisian na satan ed Dios tan say imoral tan materyalistikon paraan na panagbilay to. Saraya so sandian na “balon katawenan [mangatatawen a Panarian na Dios] tan sakey a balon dalin [sakey a balon mangaraldalin a sosyedad]” a ditan et “panayaman na inkatunong.” (2 Pedro 3:10-13, NW) Sarayan makapakigtot ed mundon nagagawgawa so onggapon bigla tan diad sakey ya agew tan oras ya ag-inilaloan.​—Mateo 24:44.

Lawas Sililiing ed Tanda

6. (a) Diad anton kalaknab a say ebat nen Jesus ed tepet na saray babangatan to so onaplika ed anggaan na Judion sistema? (b) Antoran kabiangan na ebat nen Jesus so angiyapasakey na imano ed saray nagagawgawa tan awawey nanlapula’d 1914 a manpatuloy?

⁶ Nisesengeg ed panaon a pambibilayan tayo, nepeg a kabisado tayon maong iray detalye na atugyop a tandan mangipapabidbir ed kaunoran iran agew​—‘say kasampotan na sistema na bengabengatla.’ Lawas nodnonoten a sanen inebatan nen Jesus so tepet na saray babangatan to, a nikurit ed Mateo 24:3, arum ed saray sinaglawi to ed bersikulo 4 ya anggad 22 so walaan na melag a kasumpalan ed Judion sistema ed baetan na 33 tan 70 K.P. Balet say propesiya so walaan na baleg a kasumpalan ed panaon nanlapula’d 1914, say panaon na ‘kiwawala [nen Kristo] tan say kasampotan na sistema na bengabengatla.’ Ibabaga na Mateo 24:23-28 so nagawa manlapud 70 K.P. ya anggad panaon na kiwawala nen Kristo. Saray kipapasen ya adeskribe ed Mateo 24:29–​25:46 so nagawa legan na panaon na anggaan.

7. (a) Akin a nepeg itayon sililiing ed no panon a saray peles a kipapasen so manusumpal ed tanda? (b) Ebatan iray tepet ed sampot na sayan parapo, a mangipanengneng no panon so kasusumpal na tanda nanlapula’d 1914.

⁷ Nepeg a magmaliw itayon maimano ed saray nagagawgawa tan ed awawey a manusumpal ed tanda. Say pangisiglaot ed sarayan bengatla ed propesiya na Biblia so ontulong ed sikatayon lawas nodnonoten so agew nen Jehova. Satan so ontulong met ed sikatayo a magmaliw a makatangguyor sano papasakbayan so arum nipaakar ed kinaasingger la na satan ya agew. (Isaias 61:1, 2) Diad pannonot ed sarayan gagala, repasoen tayoray onggendan a tepet a mangipapabitar ed kabiangan na tanda, a singa nikurit ed Mateo 24:7 tan Lucas 21:10, 11.

Diad anton nikadkaduman dalan a say nipasakbay ya italindeg na ‘nasyon a sumpad nasyon tan panarian a sumpad panarian’ so nasusumpal nanlapula’d 1914? Nipaakar ed saray bakal, anto la so nagagawa nanlapula’d saman?

Nen 1918, anton salot so anigway na mas dakel a bilay nen say Guerra Mundial I? Anggaman ed pikakabat na too ed medisina, antoran sakit so siansia nin mamapatey na minilyon?

Diad anton kalaknab ya inapektaan na kakisiran na tagano so dalin anggaman ed inyabante na siensia ed apalabas a siglo?

Anto so mangombinse ed sika a say dedeskribien na 2 Timoteo 3:1-5, 13, et aliwan say lawas kipapasen na dalan na panagbilay, noagta say iloor na saray mauges a kipapasen legan a mamapaarap itayo ed anggaan na kaunoran iran agew?

Panangibiig ed Totoo

8. (a) Diad samay adeskribe ed Mateo 13:24-30, 36-43, anto ni so insiglaot nen Jesus ed konklusyon na sistema na bengabengatla? (b) Anto so kabaliksan na ilustrasyon nen Jesus?

⁸ Wala niray arum a nikadkaduman nagawgawa ya insiglaot nen Jesus ed konklusyon na sistema na bengabengatla. Sakey ed saraya et say panangibiig ed saray “anak na panarian” manlapud saray “anak na mauges.” Saya so sinaglawi nen Jesus ed samay parabolo to nipaakar ed uma na trigo a tinaneman met na kabusol na saray sisanyas. “Say trigo” ed ilustrasyon to so mangirerepresenta ed saray tuan alanaan a Kristiano. “Saray sisanyas” et saraman so mangibabagan Kristiano balet ta pinaneknekan day inkasikaran “anak na mauges” lapud sikara so nigalet ed mundo ya uuleyan na Diablo. Saraya so insian a manlapud saray “anak na panarian [na Dios]” tan amarkaan a para ed kadederal. (Mateo 13:24-30, 36-43) Kasin say panangibiig so peteg a nagagawa?

9. (a) Kayari na Guerra Mundial I, anton baleg a panangibiig so agawa ed amin a mankuan Kristiano? (b) Panon ya impatnag na saray alanaan a Kristiano a sikara so tuan lingkor na Panarian?

⁹ Kayari na Guerra Mundial I, wala so panangibiig ed amin a mangibabagan Kristiano diad duaran klase: (1) Saray klero na Kakristianoan tan saray patumbok da, a mabiskeg a manusuporta ed Liga na Nasyones (natan et say Nasyones Unidas) legan a mansiasiansia ra ed katooran da ed nasyon da, tan (2) saray tuan Kristiano ed saman a panaon kayari na bakal, a sigpot a manusuporta ed Mesianikon Panarian na Dios, ya aliwan diad saray nasyones na sayan mundo. (Juan 17:16) Pinaneknekan na saraya so inkasikara a tuan lingkor na Panarian na Dios diad pangipupulong da ed “sayan maong a balita na panarian” diad sankadalinan. (Mateo 24:14, NW) Antoray nansumpalan?

10. Anto so inmunan resulta na kimey ed panangipulong ed Panarian?

¹⁰ Unona, wala so panagtipon ed nakdaan na saramay alanaan na espiritu na Dios, a walaan na ilalon miiba ed si Kristo bilang kabiangan na mangatatawen a Panarian. Anggaman saratan so nitaytayak ed limog na saray nasyones, sikara so nitarok ed organisasyonal ya inkasaksakey. Manasingger lay kakompleto na panagtatak ed sarayan alanaan.​—Apocalipsis 7:3, 4.

11. (a) Anton panagtipon a kimey so mantutultuloy, tan mitunosan ed anton propesiya? (b) Anto so ipapabitar na kasumpalan na sayan propesiya?

¹¹ Ginmapo la’d satan, diad silong na panangiwanwan nen Kristo, so panagtipon na “sakey a baleg ya ulop . . . a nanlapu ed balang nasyon tan amin na saray kailalakan, tan binaleybaley, tan salita.” Saraya so manitibukel na “arum a karnero” a makaliktar ‘ed baleg a kairapan’ ya onloob ed balon mundo na Dios. (Apocalipsis 7:9, 14; Juan 10:16) Sayan kimey na panagpulong ed Panarian na Dios so mantutultuloy ya anggad kaplesan sakbay ya onsabi so anggaan. Say baleg ya ulop na arum a karnero, a minilyon la natan so bilang da, so matoor ya ontutulong ed alanaan a nakdaan diad pangipapalapag ed importantin mensahe na Panarian. Sayan mensahe so narerengel ed amin a nasyones.

Anto so Nagawa ed Arapen?

12. Kaunongan nin kalaknab na panagpulong a kimey so gawaen sakbay ya onsabi so agew nen Jehova?

¹² Amin ya ebidensya so mangipapabitar a manasingger itayo la ed anggaan na kaunoran iran agew tan say agew nen Jehova so asingsingger la. Balet kasin wala niray propesiyan nasumpal sakbay ya onggapo itan a makapataktakot ya agew? On. Nisengeg ed sakey a bengatla, say panangibiig ed totoo nipaakar ed isyu na Panarian so agni asumpal. Diad arum iran pasen ya asagmak so pirmin isusumpa ed loob na dakel a taon, natan et wala la so indaak na saray balon babangatan. Anggan diad pasen ya ag-awaten na totoo so maong a balita, nipapatnag so panangasi nen Jehova diad pampupulong tayo. Sirin, mantultuloy ed kimey! Pinaseguroan itayo nen Jesus a sano nasumpal so kimey, say anggaan so onsabi la.

13. Singa nikurit ed 1 Tesalonica 5:2, 3, anton makatantandan ebento so nagawa ni, tan anto so kabaliksan na satan ed sikatayo?

¹³ Nipasakbay so sananey nin makabkabaliksan a propesiya na Biblia: “Kapiganman ya ibabaga ra: ‘Kareenan tan kaligenan!’ insan biglan kadederal so tamtampol ya onsabi ed sikara a singa pasakit na sakey a biin malukon; et ag-iran balot makaliktar.” (1 Tesalonica 5:2, 3, NW) Alagaren no panon so kagawa na satan a panangiyabawag na “kareenan tan kaligenan.” Balet seguradon agto kabaliksan a petepeteg a nasolbar na papangulo na mundo iray problema na katooan. Saramay lawas sinononot ed agew nen Jehova so agnapalikdo ed satan a panangiyabawag. Amta ra a tampol kayari to, biglan kadederal so onsabi.

14. Antoran ebento so nagawa legan na baleg a kairapan, tan diad anton panggegendanan?

¹⁴ Diad gapo na baleg a kairapan, saray manuley so ombuelta sumpa ed Babilonia a Baleg, say sankamundoan ya empiryo na palson relihyon, insan to deralen. (Mateo 24:21; Apocalipsis 17:15, 16) Kayari na satan, saray nasyon so ombaling ed saraman so mangitatandoro ed inkasoberano nen Jehova, patuloen to lay sanok nen Jehova sumpad saray mapolitikan gobierno tan saray manusuporta ed sikara, a mansumpal ed sigpot a kadederal da. Satan la so Armagedon a kapantokan na baleg a kairapan. Insan, si Satanas tan saray demonyo to so nimedmer ed kaaralman, ya aglan balot makayarin mangimpluensya ed katooan. Saya so mangisara ed agew nen Jehova sano say ngaran to so nitandoro.​—Ezequiel 38:18, 22, 23; Apocalipsis 19:11–​​20:3.

15. Akin ya aliwan makabat so pangikatunongan a mabayag ni so agew nen Jehova?

¹⁵ Say anggaan na sayan sistema so onsabin eksakto ed oras, unong ed eskedyul na Dios. Agnaatrasado. (Habacuc 2:3) Tandaan, sinmabin tampol so inkaderal na Jerusalem nen 70 K.P., sanen satan so ag-inilaloan na saray Judio, sanen inisip dan anggapo la so kaatapan. Tan anto so nipaakar ed kadaanan a Babilonia? Saman so mabiskeg, matalek, tan asalimbengan na angkakabaleg iran bakor. Balet ta nagba ed sakey a labi. Ontan met, biglan kaderal so ondapo ed peles a marelmeng a sistema. Sano onsabi itan, komon ta naromog itayon nikasakey ed tuan panagdayew, a lawas nodnonoten so agew nen Jehova.

Repason Pantongtongan

• Akin ya importantin lawas nodnonoten so agew nen Jehova? Panon tayon gawaen itan?

• Panon a sikatayo so naapektaan diad nagagawan panangibiig ed totoo?

• Anto so nagawa ed arapen sakbay ya onggapo so agew nen Jehova? Sirin, anto so nepeg a gagawaen tayon mismo?

[Saray litrato ed pahina 180, 181]

Magano la et mangangga so kaunoran iran agew diad kaderal na sistema nen Satanas